Ona tilimizning fidoyi targʻibotchisi

Bugun yurtimizda taʼlim tizimiga berilayotgan katta eʼtibor shu sohada faoliyat koʻrsatayotgan har bir xodimning oʻz kasbiga, faoliyatiga boʻlgan masʼuliyatini oshirib, oʻqituvchilar qalbida faxru iftixori tuygʻularini yuksaltirmoqda.

Ayniqsa bu eʼtibor va ragʻbat pedagog xodimlarni oʻz sohasida chuqur izlanishlar olib borib, yoshlarga berilayotgan taʼlimning sifat va samaradorligini yanada oshirishga undamoqda.

2013-yilda Nukus Davlat pedagogika institutini tamomlab, tumanimizdagi 16-sonli ixtisoslashgan davlat umumtaʼlim maktabida ona tili va adabiyot fanidan dars berayotgan Nigora Ismoilova ham mana shu maqsad yoʻlida harakat qilayotgan fidoyi oʻqituvchilarning biridir.

Nigora oliy oʻquv yurtini tugatib, ushbu maktabda ish boshlagan dastlabki davrlarida unga maktabda koʻp yillardan buyon faoliyat koʻrsatib kelayotgan Hulkar Qurbonboyeva va Aziza Abdurahmonova singari tajribali hamkasblari ona tilini oʻqitish uslublarini va kasb sirlarini oʻrgatdi.

Oʻz ustida tinmay ishlashi, dars oʻtishning ilgʻor usullaridan foydalanishi, ustoz oʻqituvchilar tajribalariga suyanishi natijasida koʻp oʻtmayoq u faol oʻqituvchilar safidan oʻrin oldi.

Ayni kunda Nigora Ismoilova tomonidan oʻquvchilar oʻrtasida oʻtkazilayotgan “Yosh kitobxon” musobaqasi, mushoira va maqol aytishuv tadbirlari oʻquvchilarning ona tili va adabiyot fanlariga boʻlgan qiziqishni yanada oshirmoqda.

Yosh oʻqituvchining taʼlim berishda bor bilim va mahoratidan, ilgʻor tajribalardan foydalanib ish koʻrishi uning oʻquvchilari erishayotgan muvaffaqiyatlarda koʻzga tashlanmoqda. Maktab oʻquvchisi Diyora Boltaboyeva kabi shogirdlari “Bilimlar bellashuvi”ning tuman va Qoraqalpogʻiston Respublikasi bosqichlarida qator yutuqlarni qoʻlga kiritgani Nigorani yanada koʻproq mehnat qilishga, oʻquvchilar bilan yanada faol ishlashga ruhlantirmoqda.

Dars oʻtish jarayonida interfaol uslublardan foydalanish Nigora uchun katta imkoniyatlar eshiklarini ochib berayapti. Malakali oʻqituvchi oktyabr oyi davomida oʻtkazilayotgan “Ona tili va adabiyot fan oyligi” doirasida koʻplab tadbirlar tashkil qilib, oʻqituvchilarning ona tiliga, adabiyotga boʻlgan qiziqishlarini yanada oshirishga harakat qilmoqda.

15-oktyabr kuni maktabning 10-sinfida oʻquvchilarning bilimini oshirish, fikrlash doirasini kengaytirish maqsadida ochiq dars oʻtkazilib, unda oʻquvchilarning ona tilimizni qanchalik chuqur oʻzlashtirgani, oʻzbek adabiyotidan qanchalik darajada xabardor ekani yana bir bora sinovdan oʻtkazildi.

Ochiq dars paytida oʻquvchilar guruhlarga ajratilib, ularga har xil qiziqarli mavzularda matnlar yozish vazifalari topshirildi. Mashgʻulotlar va musobaqalarda oʻquvchilar faol ishtirok etishib, munosib tarzda ragʻbatlantirildi.

Nigora Ismoilova faqat fan oyligi doirasidagina emas, doimiy ravishda oʻquvchilar oʻrtasida turli qiziqarli tadbirlarni oʻtkazib, yoshlar qalbida ona tilimizga boʻlgan hurmat-eʼtiborni, undan faxrlanish tuygʻularini oshirish yoʻlida izlanib, faol ish olib bormoqda.

Biz oʻz kasbiga ixlos qoʻygan jonkuyar muallima Nigora Ismoilovaning kelgusi ishlarida muvaffaqiyatlar tilaymiz. Mana shunday fidoyi va jonkuyar oʻqituvchilar bor ekan, ona tilimizning qadru qimmatini his qilib, unga hurmat bilan munosabatda boʻladigan yoshlar safi ortib boraveradi.

A.Jumaniyozov