12-SONLI UMUMTAʼLIM MAKTABIDA PREZIDENTIMIZNING 5 TA TAShABBUSIGA USTUVOR VAZIFA SIFATIDA QARALADI

Tumanimizdagi 12-sonli umumtaʼlim maktabi

616 nafar oʻquvchi oʻringa moʻljallangan boʻlib, ayni kunda oʻquv muassasasida 630 nafar oʻquvchi-yoshlar 60 nafardan ziyod tajribali oʻqituvchilardan taʼlim-tarbiya olishmoqda.

Oʻzbekiston Xalq taʼlimi aʼlochisi Mahmudjon Qutlimurodov rahbarlik qilayotgan maktab pedagogik jamoasi va oʻquvchi-yoshlar qator yutuqlarga erishmoqdalar. Xususan, fanlar olimpiadasining tuman va respublika bosqichida chizmachilik fani oʻqituvchisi Maqsuda Avezovaning oʻquvchilari bir necha yillardan buyon gʻoliblikni qoʻldan bermay kelishmoqda.

2017-2018 oʻquv yilida innovatsion olimpiadada chizmachilik fanidan mamlakat miqyosida faxrli 1-oʻrinni egallagan Zebo Omonboyeva oʻtgan oʻquv yilida fanlar olimpiadasida chizmachilik fanidan Qoraqalpogʻiston Respublikasi gʻolibligini qoʻlga kiritdi.

10-sinf oʻquvchisi Oʻtkirjon Soatboyev fanlar olimpiadasida geografiya fanidan Qoraqalpogʻiston Respublikasi bosqichida muvaffaqiyatli ishtirok etdi.

Salkam 1000 taga yaqin badiiy adabiyotlarga ega maktab kutubxonasi hamisha kitobxon yoshlar bilan gavjum boʻladi. Maktab jamoasi 2018-yilda “Dono kitobxon” tanlovining tuman bosqichida faxrli 3-oʻrinni egalladi. “Kitobxon oʻqituvchi” tanlovida yosh oʻqituvchilar jamoasi faxriy yorliq bilan taqdirlandi. Maktab yoshlar yetakchisi Nigora Saidmurodova esa “Eng bilimdon yoshlar yetakchisi” deb tan olinib, Diplom va esdalik sovgʻalari bilan taqdirlandi.

Maktabda musiqa fani oʻqituvchisi Shuhrat Murodov musiqa va anʼanaviy ijrochilik yoʻnalishi boʻyicha toʻgarak mashgʻulotlarini yoʻlga qoʻygan.

Informatika fani boʻyicha Zuhra Yusupova, Muhiddin Toʻxtaboyev, Bahrom Avezov kabi oʻz kasbining fidoyisi boʻlgan mutaxassis-oʻqituvchilar ham boshqalarga oʻrnak boʻlmoqda.

Maktabning sportsevar yoshlari voleybol, basketbol, mini futbol turlari boʻyicha tuman miqyosidagi umumtaʼlim maktablari jamoalari oʻrtasida faxrli 1-oʻrinlarni egallashdi. Yoshlar oʻrtasida tumandagi toʻrtta sektorlar boʻyicha oʻtkazilgan musobaqalarda esa maktabning jismoniy tarbiya fani oʻqituvchisi sportning ham yengil atletika, ham belbogʻli kurash turlari boʻyicha faxrli 2-oʻrinni, “Yoshlar shaxmat taxtasi” respublika turnirida esa 6-sinf oʻquvchisi Sohiba Ashirova 3-oʻrinni egalladi.

2018-2019 oʻquv yilida maktabni tugatgan 29 nafar yoshlar orasida chevarlik, toʻquvchilik kabi hunarlarni egallab, ish boshlagan, oliy oʻquv yurtlarida oʻqishni davom ettirayotgan bilimdon yoshlar ham talaygina.

Maktab pedagogika jamoasi va oʻquvchi-yoshlar erishayotgan barcha yutuqlar negizida Prezidentimiz tomonidan yoshlar taʼlim-tarbiyasi sohasini yanada yuksaltirishga qaratilgan 5 ta muhim tashabbusni tizimga tatbiq etish borasida olib borilayotgan ishlar oʻz ifodasini topmoqda.

Robiya YOʻLDOShEVA.