OʻQITUVChILAR DAVLAT VA JAMIYaT EʼTIBORIDA

Jadal surʼatlarda oʻzgarib, yangilanib borayotgan hayot biri-biridan dolzarb masalalarni hal qilishning eng muhim yechimi aynan taʼlim-tarbiya bilan, yoshlarning dunyoqarashini zamonaviy bilim, yuksak maʼnaviyat va maʼrifat asosida shakllantirish bilan bogʻliq ekanligini koʻrsatmoqda. Shu boisdan ham bugungi kunda yoshlarni ezgu ideallar ruhida kamol toptirish, zamonaviy bilim asoslari, ilm-fan yutuqlari bilan qurollantirish hamda ota-onasiga, yurtiga mehr-oqibat, sadoqat tuygʻularini singdirish Xalq taʼlimining asosiy faoliyat mezoniga aylandi.

Buningdek koʻlamdor vazifalar tumanimizda qanday amalga oshirilmoqda? Muxbirimiz 1-oktyabr – Oʻqituvchi va murabbiylar kuni arafasida tuman Xalq taʼlimi boʻlimi mudiri Otabek Yoʻldoshov bilan uchrashib, shu haqda suhbatlashdi.

– Joriy yilning 29-aprel kuni Yurtboshimiz “Oʻzbekiston Respublikasi Xalq taʼlimi tizimini 2030-yilgacha rivojlantirish kontseptsiyasini tasdiqlash toʻgʻrisida”gi Farmonini imzoladi. Ushbu Farmon bilan Xalq taʼlimi tizimini 2030-yilgacha rivojlantirish kontseptsiyasi va uni amalga oshirish uchun “yoʻl xaritasi” tasdiqlandi. Mazkur kontseptsiyada taʼlim tizimini rivojlantirishning bir qancha yoʻnalishlari belgilab berildi. Shu asosda oʻz faoliyatini olib borayotgan tumanimiz maktablarida oʻqitish samaradorligi tobora yuksalmoqda.

Jamiyatning buguni va ertasi, uning maʼrifiy-maʼnaviy salohiyati taʼlim tizimining qay darajada rivojlanganligi bilan belgilanadi. Sohada amalga oshirilayotgan islohotlar muvaffaqiyati esa tom maʼnoda oʻqituvchi va murabbiylar mehnatiga bogʻliqdir. Bugungi kunda taʼlim sohasiga qaratilayotgan eʼtibor, oʻqituvchi va murabbiylarning mavqei oshirilib, moddiy-maʼnaviy qoʻllab-quvvatlanayotgani boisi ham shundandir.

Biz kim boʻlmaylik, oldida doimo oʻzimizni qarzdorday sezadigan, xizmatlari oldida doimo boshimizni egib taʼzim qilishga tayyor turadigan insonlarimiz bor. Ularning yosh avlod kamolidagi beqiyos xizmatlarini hech narsa bilan oʻlchab boʻlmaydi. Ular – onamizday mehribon, otamizday gʻamxoʻr, har birimiz uchun aziz va moʻʼtabar insonlar – ustoz va murabbiylar.

Ustoz va murabbiylarga azal-azaldan hurmat-ehtirom koʻrsatib, otaday ulugʻ sanalgan. Alloma bobolarimiz adabiy merosida bu haqda juda koʻp oʻgit-nasihatlar oʻrin olgan.

Mamlakatimizda 1997-yildan boshlab, 1-oktyabr – Oʻqituvchi va murabbiylar kuni umumxalq bayrami sifatida nishonlanayotgani ham soha xodimlari mehnatiga eʼtibor va eʼtirof namunasidir.

“Odamlarga bir yil yaxshilik qilmoqchi boʻlsang, bugʻdoy ek, umrbod yaxshilik qilmoqchi boʻlsang, taʼlim-tarbiya ber”, degan xalqimiz naqlida juda teran maʼno bor.

Prezidentimiz Sh.Mirziyoyevning shu yil 23-avgustdagi yoshlarni vatanparvarlik ruhida tarbiyalash va jamiyatda oʻqituvchi mavqeini oshirish yuzasidan oʻtkazilgan yigʻilishda “Har bir islohot oʻzimizdan boshlanadi, oʻzimiz oʻzgarmasak, hech kimni oʻzgartira olmaymiz” degan soʻzlarini oʻzlariga dasturilamal qilib olib, koʻtarinki ruhda 2019-2020 oʻquv yilini boshlagan tumanimiz oʻqituvchi va murabbiylari sohaga qaratilayotgan gʻamxoʻrliklarga munosib mehnat qilishga intilishmoqda. Taʼlim-tarbiya samaradorligi, oʻquvchilarning oʻzlashtirishlari boʻyicha respublikada joriy yilda oldingilar qatoridan joy olishga harakat qilishmoqda.

Yangi oʻquv yili oldidan tumanimizdagi ehtiyoj mavjud maktablarda 18 mlrd. soʻmga yaqin mablagʻ evaziga qurilish-taʼmirlash ishlari bajarilib, zamonaviy, shinam holga keltirilib, barcha qulayliklar yaratilgani soha xodimlari uchun ham, oʻquvchilar uchun ham munosib tuhfa boʻldi.

Taʼlimdagi oʻzgarishlar, innovatsion texnologiyalar, yangiliklarni oʻz faoliyatlariga tatbiq etib, darslar samaradorligiga intilib, ezgu maqsadlar yoʻlida mehnat qilayotgan hazrati insonlar – tumanimizning barcha oʻqituvchi va murabbiylarini kasb bayramlari bilan qizgʻin qutlayman, mehnatlarining rohatlarini koʻrib uzoq umr koʻrishlarini tilayman.

Suhbatdosh Oygul RAJABOVA.