“AmuKids” oʻquv markazi yosh avlod kamoliga xizmat qiladi

Mamlakatimizda oʻsib kelayotgan yosh avlodni chuqur bilimli, tafakkuri keng, yuksak ijodiy qobiliyatli qilib tarbiyalashga alohida eʼtibor qaratilmoqda. Iqtidorli bolalar maktablari, ixtisoslashgan maktablar tarzida tashkil etilayotgan Prezident maktablari aynan shu maqsadga xizmat qiladi.

Tumanimizda iyun oyining boshida oʻz faoliyatini boshlagan “AmuKids” oʻquv markazi faoliyati ham boshlangʻich taʼlimni rivojlantirishga qaratilgan. Chunki boshlangʻich taʼlimni puxta va chuqur egallab, mustahkam bilim poydevoriga ega boʻlgan bola yuqori sinflarga oʻtganida dars mashgʻulotlari murakkablashganidan yo koʻpayib borishidan qiynalmaydi, oson oʻzlashtira boradi. Ayniqsa bolalarning mental arifmetika bilan shugʻullanishi bolalarning aqliy qobiliyatini, tafakkurini oʻstirishga va boshqa fanlardan ham mustahkam bilimga ega boʻlishiga zamin yaratishi tajribalarda aniqlangan.

Maktab dasturida bolalar odatda matematikani oʻrganish, raqamlarni  oʻzlashtirish va odatiy arifmetik hisoblash jarayonida faqatgina  miya yarim sharining bir tarafidangina foydalanadi, faqat mantiqiy fikrlaydilar. Pasm chizish yoki mehnat darslarida yaratuvchanlik qobiliyati shakllanadi.

Mental arifmetika bilan shugʻullanish va shu uslubda misollar yechish natijasida bolaning ikkala miya yarim shari ham baravariga ishlaydi. Va yana bola oʻzi sezmagan holda miyasini ham mantiqiy fikrlashga, ham yaratuvchanlik qobiliyatini qoʻllashga majburlaydi. Bu dastlabki uch oy ichida oʻz natijalarini bera boshlaydi.

Mental arifmetika orqali fikrlashga oʻrgangan bola olgan koʻnikmalarini taʼlimning barcha darsliklarini oʻzlashtirishga hamda hayotining har bir lahzasida qoʻllay oladi, aqliy qobiliyati boshqa tengdoshlaridan keskin farq qiladi.

Bu satrlarni oʻqigan ota-onalarning koʻnglidan albatta, mening ham farzandim shunday bilimlarga ega boʻlsa edi, degan oʻy oʻtishi shubhasiz. Axir farzandlarimiz umrimiz davomchilari, barcha orzu-umidlarimiz roʻyobi ularga bogʻliqda.

Nizomiy nomidagi Toshkent Davlat pedagogika universitetining boshlangʻich taʼlim fakultetini muvaffaqiyatli tugatib kelib, oʻz pedagogik faoliyatini 40-sonli oʻrta maktabda boshlagan Zuhra Yernafasova ham bu haqda davriy matbuotda, ijtimoiy tarmoqlarda oʻqib, qiziqib qoldi, oʻz hududimizda ham bolalarga shunday taʼlim beruvchi markaz tashkil qilish, tumanimiz bolalarining  intellektini rivojlantirish fikri unga tinchlik bermay qoʻydi. Bu haqda tuman Xalq taʼlimi boʻlimiga murojaat qildi, respublika intellektni rivojlantirish markazi seminar treninglarida qatnashib, bu borada avval oʻz bilimlarini boyitdi. Nihoyat bir necha oy qilgan harakatlari natijasida  Mangʻit shahrida “AmuKids” oʻquv markazini tashkil etishga muvaffaq boʻldi.

Yakka tadbirkor sifatida tashkil etgan oʻquv markazida bolalarni maktabga tayyorlov guruhi, mental arifmetika, ingliz tili, rus tili, ona tili, matematika, Prezident maktablariga tayyorlov kurslari faoliyati yoʻlga qoʻyilgan.

- Ish boshlaganimizga bir necha kungina boʻlgan boʻlsa-da, hozir markazimiz oʻquv kurslariga qatnashayotgan bolalar soni 100 nafardan oshib ketdi. Murojaat qilayotgan ota-onalar soni esa koʻp. Imkoniyatimiz darajasida ularni qamrab olishga intilamiz, - deydi Zuhra Yerlafasova.

Kelgusi avlod kamoloti yoʻlidagi har bir xayrli ish eʼtiroflarga munosibdir. Biz ham yosh tadbirkor muallim qizga boshlagan ishi oʻngidan kelishini tilab qolamiz.

Oygul PAJABOVA.