Oʻzbekiston Ekologik partiyasi tuman hududiy partiya tashkilotining taʼsis Konferentsiyasi boʻlib oʻtdi

2019-yilning 22-may kuni Amudaryo tumanida Oʻzbekiston Ekologik partiyasi Qoraqalpogʻiston Pespublikasi Amudaryo tumani hududiy partiya tashkiloti taʼsis Konferentsiyasi boʻlib oʻtdi. Konferentsiyada ekologiya va sogʻliqni saqlash sohasida faoliyat olib borayotgan tashkilotlar, jamoat tashkilotlari vakillari, olimlar va ekspertlar, taʼlim muassasalari professor-oʻqituvchilari, talabalar, OAV va keng jamoatchilik vakillari ishtirok etishdi.

Dastlab konferentsiyada ishtirokchilarga  joriy yilning 13-may kuni boʻlib oʻtgan Oʻzbekiston Ekologik partiyasi Markaziy Kengashining yigʻilishida qabul qilingan qaror haqida batafsil axborot berildi. Konferentsiyada Oʻzbekiston Ekologik partiyasi Qoraqalpogʻiston Pespublikasi Amudaryo tumani hududiy partiya tashkiloti Kengashiga va Ijroiya qoʻmitasiga aʼzolar saylandi.

Taʼkidlanganidek, Oʻzbekiston Pespublikasi Prezidentining 2017-yil 22-dekabrdagi Oliy Majlisga Murojaatnomasida belgilangan partiyalararo raqobatni taʼminlash, barcha siyosiy subʼektlar uchun teng sharoitlar yaratish, parlament rolini kuchaytirish boʻyicha ustuvor vazifalar ijrosini taʼminlash maqsadida 2019-yil 8-yanvar kuni Oʻzbekiston Ekologik partiyasi tashkil etildi va 22-yanvar kuni Oʻzbekiston Pespublikasi Adliya  vazirligi tomonidan davlat roʻyxatiga olindi.

Konferentsiya ishtirokchilariga Oʻzbekiston Ekologik partiyasi Qoraqalpogʻiston Pespublikasi partiya tashkiloti oldida uning tuman (shahar) hududiy partiya tashkilotlarini tashkil etish boʻyicha bir qator vazifalar turgani haqida maʼlumot berildi.

Taʼkidlanganidek, hududiy partiya tashkilotlari faoliyati joylarda partiyaning maqsadlariga erishish va dasturiy vazifalarining hal etilishini taʼminlash, quyi partiya tashkilotlarining faoliyatini boshqarish, muvofiqlashtirish va birlashtirishga qaratiladi.

Konferentsiyada Oʻzbekiston Ekologik partiyasi faoliyati bilan bogʻliq hujjatlar jumladan, “Oʻzbekiston Ekologik partiyasi aʼzoligiga qabul qilish, partiya aʼzolarini hisobga olish va partiya aʼzoligidan chiqarish toʻgʻrisida”gi Nizom, “Oʻzbekiston Ekologik partiyasi aʼzolik badallarini toʻlash va ularning hisobini olib borish tartibi”, “Oʻzbekiston Ekologik partiyasining ichki nazorat-taftish xizmati toʻgʻrisida”gi Nizom loyihasi, “Oʻzbekiston Ekologik partiyasi ish reglamenti” tayyorlandi va Markaziy Kengash plenumida tasdiqlanganligi va mazkur hujjatlar kelgusida partiya hamda uning hududiy tashkilotlari faoliyatini tartibga solishga qaratilganligi haqida  axborot berildi.

Ishtirokchilar tomonidan taʼkidlanganidek, atrof muhit holatiga eʼtiborsiz munosabatda boʻlish, tabiiy resurslardan meʼyordan ortiq foydalanish va ekologik talablarni mensimaslik Orol dengizining qurishi, choʻllanish, yer va suv resurslari tanazzuli, oʻsimlik va hayvonot dunyosi genofondining yomonlashuvi, biologik xilma-xillikning qisqarishi, koʻp miqdordagi sanoat, maishiy va boshqa chiqindilarning hosil boʻlishi kabi qator global va mintaqaviy ekologik muammolar paydo boʻlishiga olib keldi. Ushbu muammolar iqlim oʻzgarishi sodir boʻlayotgan sharoitlarda yanada yaqqolroq va kuchliroq namoyon boʻlmoqda. Hozirgi kunda mamlakatimiz uchun ham atrof-muhitni muhofaza qilish va uni sogʻlomlashtirish masalalari yanada dolzarb qilib qoʻyilmoqda.

Qayd etilganidek, mamlakatda davlat va jamiyat qurilishi sohasida amalga oshirilayotgan islohotlar yoʻlidagi keyingi qadam sifatida toʻplangan tajribalar asosida yangi siyosiy partiyaning tashkil etilishi bugungi kunning talabi boʻldi. Albatta, ekologik siyosiy partiyaning asosiy eʼtibori atrof-muhitni muhofaza qilish mamlakat har bir fuqarosining umumiy ishi boʻlishiga qaratiladi.

Konferentsiyada soʻz olganlar ekologik partiya oldida katta va masʼuliyatli ishlar turganligini alohida qayd etib oʻtishdi. Mamlakatda barqaror rivojlanish maqsadlariga erishish, aholi uchun qulay ekologik sharoit yaratish va noyob tabiatni saqlashga jamiyatning barcha kuchlarini safarbar qilish, jamiyatda ekologik madaniyat darajasini koʻtarish, aholida milliy gʻurur, Vatanga va tabiatga sodiqlik va muhabbat hissini shakllantirish va mustahkamlash uchun qulay sharoit yaratish, yoshlarni tabiat va uning resurslariga ehtiyotkorona munosabatda boʻlish ruhida tarbiyalash ishlariga hissa qoʻshish, Orol dengizi qurishi natijasida yuzaga kelgan ekologik va ijtimoiy muammolarni hal etish, salbiy oqibatlarini yumshatish  kabi vazifalar, shular jumlasidandir.

Konferentsiyada koʻrib chiqilgan barcha masalalar yuzasidan tegishli qarorlar qabul qilindi. Konferentsiyadan soʻng, Oʻzbekiston Ekologik partiyasi Qoraqalpogʻiston Pespublikasi Amudaryo tumani hududiy partiya tashkiloti Kengashi yigʻilishi oʻtkazildi va unda Ijroiya qoʻmita aʼzolari saylandi. Shuningdek, Konferentsiyada Jumaboyev Odilbek Qudrat oʻgʻli Oʻzbekiston Ekologik partiyasi Qoraqalpogʻiston Pespublikasi Amudaryo tumani hududiy partiya tashkiloti Kengashi ijroiya qoʻmitasi raisi etib saylandi.