Askar onasi boʻlish – sharaf
Ona uchun farzandining kamolini koʻrishdan ulugʻroq baxt yoʻq. Mening ikki oʻgʻil, bir qizim bor. Katta oʻgʻlim Nodirbek quruvchi-arxitektorlik kasbini tanladi. Ikkinchi oʻgʻlim Hakimjon esa hozir harbiy xizmatda, Toshkent shahrining Qibray tumanidagi harbiy qismlardan birida yigitlik burchini oʻtamoqda. Xudoga shukur, yurtimizda tinchlik, osoyishtalik hokim. Tonglarimiz osuda. Ana shu osudalikni taʼminlashda fidoyilik koʻrsatayotgan milliy Armiyamiz saflarida mening oʻgʻlim ham borligidan faxrlanaman.
Oʻgʻlim xizmat qilayotgan harbiy qism qoʻmondonligidan “farzandingiz maʼnaviy-maʼrifiy hamda jangovar mashgʻulotlarda hamisha faol, aʼlochi” degan mazmunda xat olganimizda, toʻgʻrisi, butun oilamiz bilan Hakimjon oʻgʻlimizning ona Vataniga sodiq, jasoratli va matonatli askar sifatida tanilayotganidan nihoyatda quvondik. Hakimjonning harbiy xizmatdan soʻng shu sohada oʻqish istagini esa chin dildan qoʻllab-quvvatladik. Ayni paytda u oliy harbiy akademiyalardan birida oʻqish uchun harbiy qism qoʻmondonligi tavsiyanomasiga ega boʻlish istagida test sinovlarini topshirmoqda.
Fursatdan foydalanib, farzandlari muddatli harbiy xizmatni oʻtayotgan hamda farzandlari muddatli harbiy xizmatga chaqirilgan onalarni, barcha harbiylarni, mamlakatimiz mudofaa tizimlarida oʻz xizmat burchini oʻtayotgan yurtdoshlarimizni 14-yanvar – Vatan himoyachilari kuni bilan chin dildan tabriklayman. Vatanimiz tinch, sarhadlarimiz daxlsiz boʻlsin. Chunki tinchlik boʻlgandagina biz onalar xotirjam yashaymiz. Barchaga bayram muborak, aziz harbiylar!
Suratda: Xotin-qizlar qoʻmitasining “Farovon“ mahallasidagi mutaxassisi S.Masharipova (oʻngda) askar onasi R.Rajabovani bayram bilan qutlamoqda.
Roza RAJABOVA, “Farovon” mahallasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
