“Yoshlar – kelajagimiz“ davlat dasturi – tashabbuskor yoshlarning tayanchi

Bugungi kunda yurtimiz ravnaqiga katta hissa qoʻshayotgan ilgʻor fikrli, har sohada faol ish olib borayotgan, oʻz innovatsion gʻoyalari va startaplari orqali tadbirkorlik loyihalarini amaliyotga joriy etayotgan yoshlarni har tomonlama qoʻllab-quvvatlash borasida samarali ishlar olib borilmoqda. Shu masala boʻyicha Oʻzbekiston yoshlar ittifoqi huzuridagi “Yoshlar – kelajagimiz” jamgʻarmasining Amudaryo tumani filiali rahbari Rashid Tursunboyev bilan suhbatda boʻldik:

– Avvalo, “Yoshlar – kelajagimiz” jamgʻarmasining asosiy vazifalari xususida toʻxtalib oʻtsangiz.

– Oʻzbekiston yoshlar ittifoqi huzuridagi “Yoshlar - kelajagimiz” jamgʻarmasi toʻgʻrisidagi Nizomga koʻra, tadbirkorlik subʼektlarining loyihalarini amalga oshirish uchun tijorat banklari orqali yillik 7 foiz stavka bilan imtiyozli kredit va mol-mulkni lizingga berish, tadbirkorlik subʼektlariga Davlat dasturi doirasida beriladigan tijorat banklari kredit miqdorining 50 foizigacha (ammo 1 mlrd, soʻmdan oshmaydigan miqdorda) Jamgʻarma kafilligini berish – jamgʻarmaning asosiy vazifasi hisoblanadi.

Shuningdek, Davlat dasturi doirasida amalga oshiriladigan tadbirkorlik subʼektlari loyihalarida ular qiymatining 50 foizidan koʻp boʻlmagan miqdorda ishtirok etish, keyinchalik Jamgʻarma ulushini 5-yil davomida realizatsiya qilish, tegishli koʻnikmalarga ega, band boʻlmagan yoshlar yashaydigan uy xoʻjaliklari uchun 20 tagacha parranda va quyon, 5 ta mayda va 2 ta yirik qoramol sotib olish, ularning qiymatini kelishilgan muddatlarda qaytargan holda ularni boqish va keyinchalik realizatsiya qilishda koʻmaklashish ham jamgʻarmamizning asosiy vazifalari sirasiga kiradi.

– Bugungi kunda tumanimizda jamgʻarmaning koʻmagi bilan qanday loyihalar amaliyotga joriy etildi?

– Jamgʻarmaning tashkil qilinganiga oz fursat boʻlishiga qaramasdan, qator amaliy ishlarni qilishga erishildi. Jumladan, xizmat koʻrsatish sohasida Abdurahimov Abbos Anvar oʻgʻliga avtomobillarga texnik xizmat koʻrsatish biznes-loyihasi boʻyicha faoliyat boshlashi uchun 50 mln. soʻm kredit ajratildi. Ayni vaqtda tadbirkor oʻz faoliyatini boshlab, 3 ish oʻrni yaratdi. Shuningdek, Fayzullayev Muhiddin Qutlimurotovichga non va non mahsulotlarini ishlab chiqarish loyihasi boʻyicha tadbirkorligini amalga oshirish uchun 100 mln soʻm kredit mablagʻlari ajratilib, yosh tadbirkor aholiga non yetkazib berishni boshladi.

–Dasturning kelajakdagi rejalari bilan oʻrtoqlashsangiz.

– Biz yaqin kunlar ichida “Yoshlar – kelajagimiz” Davlat dasturi doirasida ajratilgan kredit mablagʻlarini tumanimiz yoshlarining toshni qayta ishlash, kompyuter xizmatlarini koʻrsatish, sut va sut mahsulotlarini ishlab chiqarish, tikuv va tikuv- trikotaj buyumlarini ishlab chiqarish kabi yoʻnalishlardagi loyihalariga yoʻnaltirib, 421 nafar yoshlarni ish bilan taʼminlashni koʻzda tutmoqdamiz.

Bu javoblarga yanada oydinlik kiritish maqsadida “Yoshlar – kelajagimiz” dasturi boʻyicha oʻz biznes- loyihasini amalga oshirgan yosh tadbirkor Abbos Abdurahimov bilan uchrashib, yoshlarni qiziqtirgan savollarga javob oldik:

– Abbos, oʻz loyihangizni amalga oshirishda qanday qiyinchiliklarga duch keldingiz?

– Unchalik qiyinchilik boʻlgani yoʻq. Kredit olishda Yoshlar ittifoqi rahbariyatining oʻzlari yordam berishdi.

– Kredit olishda kafillik masalasi qanday hal etildi?

– Menga kafil shart emas deyishdi, chunki shu binoning oʻzini garovga qoʻydim.

– Loyihangizni amalga oshirishga qancha kredit mablagʻi ajratildi?

– Ish boshlashim, kerakli uskunalarni olib kelish uchun 50 million soʻm ajratildi. 7 foizlik shart bilan 5-yil muddatga oldim.

– Uskunalarni qayerdan keltirdingiz?

– Toshkentda xususiy kompaniya bor yekan. Germaniya, Xitoydan keltirib berishadi.

– Loyihangiz boʻyicha qancha ish oʻrini yaratdingiz va maosh masalasi qanday boʻladi?

– Oʻzimdan boshqa 3 nafar yoshni ishga oldik. Hozircha ularga oyiga 500 ming soʻmdan maosh berilyapti, sinov muddatidan keyin 800 ming soʻm qilishni rejalashtiryapman.

– Tengdoshlaringizga oʻz maslahatlaringizni bersangiz.

–Ularga maslahatim, berilayotgan imkoniyatlardan unumli foydalanib, oʻz biznesingizni boshlang. Chet davlatdagi vaqtincha ishlarni xayol qilmay, oʻz yurtimizda faxrli kasbning egasi boʻlib, Vatan ravnaqiga hissangizni qoʻshing!

– Mazmunli suhbatingiz uchun katta rahmat!

Suhbatdosh: Oxunjon Abdullayev.