Obod qishloqning obod maktabi

Hozirgi kunda mamlakatimizda taʼlim sohasida amalga oshirilayotgan islohotlar qisqa fursat ichidayoq oʻzining natijalarini bermoqda. Biz bularni umumtaʼlim maktablari binolarining kapital taʼmirlanib, jihozlanib, tubdan yangilanayotganidan, oʻquvchilar ixtiyoriga yorugʻ, shinam sinf xonalari berilayotganidan va nihoyat taʼlim-tarbiya ishlarining yangi bosqichga koʻtarilayotganidan yaqqol koʻrib turibmiz.

“Obod qishloq” dasturi asosida chiroy ochayotgan Qipchoq shaharchasi hududida joylashgan 11-sonli maktab ham ana shunday taʼlim maskanlari sirasiga kiradi.

Bu maktab joriy yilning may-avgust oylarida tumandagi “Qurilish taʼmir” MChJ tomonidan taʼmirlanib, tomi shiferlandi, deraza oynalari alyuminiydan ishlangan zamonaviy romlarga oʻzgartirildi.

Salkam bir milliard soʻmlik taʼmirlash ishlari bajarilgach, ushbu maktab qiyofasi tubdan oʻzgarib, bu yerda taʼlim oladigan oʻquvchilarga ham, mehnat qiladigan oʻqituvchi-ustozlarga ham bir qancha qulayliklar yaratildi.

Ayni kunda 626-oʻrinli ushbu maktabda 900 nafardan ziyod oʻquvchilar taʼlim olishmoqda. Ularning chuqur bilim olishlarida jon kuydirayotgan 84 nafar muallimlarning barchasi ham oʻz kasblarini sevgan, jonkuyar insonlar hisoblanishadi.

Oʻtgan oʻquv yili bu maktab oʻqituvchilari uchun ham, barcha oʻquvchilar uchun ham quvonchli voqealarga boy boʻldi. Chunki bu davrda maktabning 9-sinf oʻquvchisi Shohnura Soatboyeva va 10-sinf oʻquvchisi Malohat Madaminovalar fanlar olimpiadasida huquq fani boʻyicha ishtirok qilishib, Qoraqalpogʻiston Respublikasi boʻyicha faxrli 3-oʻrinni egallashga muvaffaq boʻldilar.

Maktab oʻquvchilari “Umid nihollari” sport musobaqalarida sportning yengil atletika, voleybol va basketbol turlari boʻyicha ham faol ishtirok etishib, yaxshi natijalarni qoʻlga kiritdilar.

Shuningdek, maktab oʻqituvchilari ham sport musobaqalarida va turli yoʻnalishlardagi tanlovlarda faol ishtirok qildilar. Ayniqsa, maktabning ona tili va adabiyot fani oʻqituvchisi Munira Kamolova va kimyo fani oʻqituvchisi Sohiba Jumaniyozovalarning “Yilning eng yaxshi fan oʻqituvchisi” tanlovida muvaffaqiyatli ishtirok etganliklari jamoaga obroʻ keltirdi.

– Biz bu oʻquv yilini ham barcha yoʻnalishlar boʻyicha puxta tayyorgarliklar bilan boshladik, – deydi maktab direktori Zulfiya Yusupova. – Oʻtgan oʻquv yilidagi yutuqlarimizni yanada mustahkamlashga harakat qilamiz va maktabimizni tumanimizning eng namunali taʼlim maskanlaridan biriga aylantiramiz. Muhtaram Prezidentimiz Sh.Mirziyoyevning soha xodimlariga koʻrsatayotgan gʻamxoʻrliklari bizning kuchimizga kuch, gʻayratimizga gʻayrat qoʻshmoqda.

Ha, haqiqatan ham maktab direktori Zulfiya Yusupova aytganlaridek, maktabda taʼlim-tarbiya sifatini oshirish maqsadida barcha imkoniyatlardan samarali foydalanilmoqda.

Biz fursatdan foydalanib, maktabning jonkuyar oʻqituvchilarini, aziz murabbiylarni kasb bayramlari bilan chin qalbimizdan muborakbod etamiz.

Allambergan JUMANIYoZOV.

Suratda: 11-sonli maktab direktori Zulfiya Yusupova oʻquvchilar davrasida.