Inson kamolotida ustozlarning hissasi beqiyos
Qadrli ustozlar, mehridaryo murabbiy va oʻqituvchilar!
Tumanimizning umumtaʼlim maktablarida faoliyat yuritayotgan hamda shu sohada ishlab, bugun keksalik gashtini surayotgan barcha oʻqituvchi va murabbiylarni, oʻzining ilmu salohiyati, kuch-gʻayratini, kerak boʻlsa butun umrini yosh avlodga taʼlim-tarbiya berishdek sharafli va mashaqqatli ishga bagʻishlagan muhtaram ustozlarni bugungi bayram – Oʻqituvchi va murabbiylar kuni bilan chin qalbimdan samimiy tabriklayman.
Qalbimiz toʻridagi eng goʻzal tilaklarimizni bildirish bilan birga ilk bor qoʻlimizga qalam tutqazgan, barchamizga oq-u qorani tanitgan, tafakkurimizga ilmu-maʼrifatni singdirgan, bor mehrini, koʻz nurini ayamagan onadek mehribon, otadek gʻamxoʻr, har birimiz uchun aziz va moʻʼtabar boʻlgan ulugʻ zot – oʻqituvchi va murabbiylarni har qancha ardoqlasak, izzat-hurmat koʻrsatsak ham kamlik qiladi.
Chunki hayotda inson kim boʻlmasin, qaysi sohada mehnat qilmasin, shubhasiz, uning kamolotida oʻqituvchi va murabbiylarning beqiyos hissalari bor. Shuning uchun ham mustaqillik yillarida mamlakatimizda oʻqituvchi-murabbiylarga boʻlgan eʼtibor tubdan oʻzgardi. Taʼlim-tarbiya tizimidagi islohotlar doimo ustuvor ahamiyat kasb etib kelmoqda.
Bu islohotlar oʻzining ijobiy samarasini berib, ustoz va murabbiylarimizdan taʼlim-tarbiya olayotgan yoshlarimiz oʻz iqtidorlari bilan butun dunyoga tanilmoqda.
Aytish joizki, shu yilning 14-avgust kuni Xalq taʼlimi uchun yangi bosqichni boshlab berishga asos boʻlgan hujjat– “Yoshlarni maʼnaviy-axloqiy va jismoniy barkamol etib tarbiyalash, ularga taʼlim-tarbiya berish tizimini sifat jihatidan yangi bosqichga koʻtarish chora-tadbirlari toʻgʻrisida”gi Prezident Qarori eʼlon qilindi. Ushbu Qaror orqali taʼlim-tarbiya jarayonini yangi bosqichga koʻtarish, jamiyatda oʻqituvchi nufuzini har tomonlama oshirish boʻyicha huquqiy asoslar belgilab berildi. Bugungi kunda Qarorga muvofiq oʻqituvchilarga qator imtiyoz va qulayliklar yaratilmoqda, ish jarayonidagi ortiqcha rasmiyatchilik va qogʻozbozlik ishlariga chek qoʻyilmoqda. Oʻylaymizki, bu sohada samaradorlikning yanada ortishiga zamin yaratadi.
Ayni paytda biz pedagoglar zimmamizga katta masʼuliyat yuklanganligini, oldimizda yanada muhim va dolzarb vazifalar turganini toʻliq anglab yetmogʻimiz darkor. Sohada taʼlim-tarbiya jarayonini sifat jihatidan yanada jonlantirish, uning nafaqat davr bilan hamo-hang boʻlishini, balki zamondan oldinda yurishini taʼminlash, pedagog kadrlarni tanlash va ularning malakasini oshirishning ilgʻor usullaridan keng foydalanish, taʼlim jarayoniga zamonaviy texnologiyalarni joriy etish bilan bogʻliq vazifalarni amalga oshirish, qisqa qilib aytganda, hayotimizga katta kuch boʻlib kirayotgan yangi avlodimizni kamol toptirish uchun barcha imkoniyatlarimizni safarbar etish bugungi kundagi ustuvor vazifa sanaladi.
Aziz va muhtaram ustozlar! Qadrli hamkasblar!
Dunyodagi eng sharafli va mashaqqatli kasb egasi boʻlgan Siz azizlarni va sizlar orqali barcha taʼlim sohasi fidoyilarini 1-oktyabr – Oʻqituvchi va murabbiylar kuni bilan yana bir bor chin qalbimdan samimiy tabriklayman. Kasbingiz kamolini koʻrib yashang! Sizlarga mustahkam sogʻlik, xonadoningizga tinchlik-xotirjamlik, faoliyatingizda ulkan muvaffaqiyatlar tilayman!
Otabek Yoʻldoshov,
tuman Xalq taʼlimi boʻlimi mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
