BOShLANGʻICh XOTIN-QIZLAR TAShKILOTI – MUHIM IJTIMOIY TUZILMA

Shu kunlarda xotin-qizlar qoʻmitalarining boshlangʻich tashkilotlarida umumiy yigʻilishlar oʻtkazilib, hisobot va saylovlar boʻlib oʻtmoqda. Mazkur yigʻilishlarda xotin-qizlar orasida tadbirkorlikni rivojlantirish, oila munosabatlarini takomillashtirish, taʼlim muassasalarida oʻquvchi-yoshlarning intellektual salohiyatini yanada oshirish, uyushmagan xotin-qizlar oʻrtasida maʼnaviy-axloqiy tarbiya masalalari boʻyicha yechimini kutayotgan muammolarni joylariga chiqib hal etish, diniy ekchtremizm va giyohvandlikka qarshi kurashish boʻyicha madaniy-maʼrifiy targʻibot ishlarini olib borish boʻyicha boshlangʻich xotin-qizlar tashkilotlari tomonidan amalga oshirilayotgan ishlar atroflicha muhokama etilmoqda.

Tumanimizdagi tayanch umumtaʼlim maktabi hisoblangan 40-sonli maktab boshlangʻich xotin-qizlar tashkilotining umumiy yigʻilishida ham yuqoridagi kabi qamrovi keng masalalar qizgʻin muhokama etildi.

Avvalo, boshlangʻich xotin-qizlar tashkiloti raisi Sayyora Tilavova Prezidentimizning 2017-yil 7-fevraldagi “Oʻzbekiston Respublikasini yanada rivojlantirish boʻyicha Harakatlar strategiyasi toʻgʻrisida” hamda 2018-yil 2-fevraldagi “Xotin-qizlarni qoʻllab-quvvatlash va oila institutini mustahkamlash sohasidagi faoliyatini tubdan takomillashtirish toʻgʻrisida”gi Farmonlaridan kelib chiqadigan vazifalar va bu Farmonlarning amaliy-ijrosini taʼminlash boʻyicha tashkilot tomonidan amalga oshirilayotgan ishlar yuzasidan hisobot maʼruzasi qildi.

– Maktabimizda 79 nafar ayol-qiz oʻqituvchilar yoshlarga taʼlim-tarbiya berishadi, – dedi u oʻz hisobot maʼruzasida. – Demak, tashkilotimiz zimmasida 79 nafar ayol-qizlarimizning sogʻligi, oʻz ish faoliyatini xotirjam ado etishi, ishdan va hayotdan, eng muhimi, davlatimizdan rozi va mamnun yashashnini taʼminlashga koʻmaklashishdek masʼuliyatli vazifa turibdi. Bu vazifani kim ado etishi kerak? Albatta, biz – hammamiz – pedagog-ayollar.

Hisobotdan ayonki, tashkilot tomonidan amalga oshirilayotgan ishlarning qamrovi keng. 1245 nafar oʻquvchi taʼlim-tarbiya oladigan maktabda oʻtkaziladigan maʼdaniy-maʼrifiy tadbirlarning barchasida ayol-qizlar faol. 615 nafar oʻquvchi qiz bolalarning yurish-turishi, oʻqishi, jamoat joylarida oʻzini tutishi qatʼiy nazoratgi olingan.

– Qiz bola – boʻlgʻusi ona, xonadon bekasi, – oʻz fikrini izhor etdi, maʼnaviy-maʼrifiy ishlar boʻyicha direktor oʻrinbosari Sayyora Jumamurodova. – Shuning uchun maktabimizda oʻquvchi-qizlar taʼlim-tarbiyasiga jiddiy eʼtibor berilmoqda. “Qizlarjon” klubi doimiy harakatda, “Orasta qizlar” toʻgaragi, turli fan toʻgaraklari aʼzolari juda faol. Ular orasida shoira qizlar, bilimlar bellashuvi, fanlar olimpiadalari gʻoliblari bor.

Tashkilotning faol aʼzolari boʻlgan ayol-qizlarni moddiy va maʼnaviy ragʻbatlantirish yaxshi yoʻlga qoʻyilgan. Har yili oʻz sogʻligini tiklash, maroqli dam olish istagida boʻlgan ayollar uchun boshlangʻich xotin-qizlar tashkiloti mamlakatimizning xushmanzara sihatgohlariga yoʻllanmalar olishlarida yaqindan yordam berib kelmoqda. Boshlangʻich kasaba uyushma tashkiloti bilan mustahkam aloqa oʻrnatilgan. Pensioner va xomilador, yosh bolali ayollar uchun ham alohida imtiyozlar belgilangan. Yaʼni bunday ayol-qizlar navbatchilikka jalb etilmaydi.

Maktab boshlangʻich xotin-qizlar tashkilotining oʻz haftalik va oylik rejaviy tadbirlari bor. Unga koʻra, ota-onalar komissiyasi, boshlangʻich kasaba uyushma tashkiloti, yoshlar tashkiloti hamda “Kamalak” bolalar tashkilotlari bilan, shuningdek, maktab – mahalla – oila hamkorligida amalga oshirilayotgan ishlar eʼtiborga loyiq.

Yigʻilishida tuman xotin-qizlar qoʻmitasi boshqaruv Kengashi aʼzosi, “Taraqqiyot koʻzgusi” gazetasi maxsus muxbiri Robiya Yoʻldosheva ishtirok etdi va maktab boshlangʻich xotin-qizlar tashkiloti tomonidan olib borilayotgan ishlar, yechimini kutayotgan muammolar, ayniqsa, oʻquvchi-qizlarning odob-axloqi, urf-odat va anʼanalar boʻyicha, xususan, ommaviy madaniyatning baʼzi koʻrinishlari oʻquvchi-qizlar orasida ham kuzatilayotgani, kiyinish madaniyati haqida oʻz fikr-mulohazalarini bildirdi.

Yigʻilishda boshlangʻich tashkilot Kengashi aʼzolari tomonidan Oʻzbekiston Xotin-qizlar qoʻmitasining yangi tahriridagi Nizomi loyihasi yuzasidan takliflar ham koʻrib chiqildi. Shuningdek, boshlangʻich xotin-qizlar tashkilotining raisi tuman xotin-qizlar qoʻmitasi konferentsiyaga delegat ham saylandi.

Yigʻilish yakunida koʻrilgan barcha masalalar yuzasidan tegishli qarorlar qabul qilindi.

(Maxsus muxbirimizdan)