EZGULIKKA TOʻLA BARHAYoT UMR

Bu olamda insonlar dilidagi orzu-umidlarini roʻyobga chiqarish istagi bilan yashaydi. Oilasini ardoqlab, ota-onasiga izzat koʻrsatib, farzandlarini kamolga yetkazishni istaydi. Hayot tashvishlarini yengib, uni faqat quvonchli kunlarga toʻldirishga harakat qiladi. Ortiqboy Yakubovning dilida ham mana shunday orzular bisyor edi. U nafaqat oilasi, balki butun el xizmatiga kamarbasta boʻlib, fidoyilik koʻrsatib yashadi.

Amir Temur nomli ovulda dehqon oilasida voyaga yetgan Ortiqboy otasi Sidabulla akadan mehnatkashlik, halollik, onasi Anorgul opadan mehr-muhabbat, samimiylik kabi ezgu xislatlarni oʻziga singdirib ulgʻaydi. Oʻzi tahsil olgan 4-sonli maktabda tengdoshlari orasida intiluvchanligi, tirishqoqligi, abjirligi bilan doim ajralib turardi.

Chaqqongina Ortiqboy maktabni tugatgach, sovxozda mexanizator boʻlib ishlay boshladi, roʻzgʻor tebratishda otasiga koʻmakchi boʻldi. Shu orada harbiy xizmatga chaqirilib, Chelyabinskka joʻnab ketdi.

Ortiqboy harbiy xizmatda yanada toblanib, burchga sadoqat va vatanparvarlikni oʻrgandi. U mana shunday ulugʻvor, yuksak tuygʻularni yuragiga joylab eliga qaytdi. Kelib, mexanizatorlikni davom ettirdi.

Tinchlik posboni, adolat va xalq himoyachisi boʻlish istagida Oriqboy Yakubov 1982-yilda Nukus shahridagi Avtomobil yoʻllari va transport texnikumiga oʻqishga kirdi.

Sidabulla aka va Anorgul opa oʻgʻlining bu qaroridan nihoyatda mamnun boʻldilar. Ortiqboyning yaqindagina kelin boʻlib tushgan umr yoʻldoshi Gulora Yaxshimurodova ham niyati ezgu, mard turmush oʻrtogʻi bilan faxrlandi.

Bu orada dunyoga kelgan farzandlari Sulaymon, Gulmirzalarni esa Sidabulla aka va Anorgul opalarning koʻmagi bilan tarbiya qildi.

Ortiqboy Yakubov oʻquv yurtidagi oʻqishini tamomlab, 1985-yilda tumandagi Ichki ishlar boʻlimining Jamoat tartibini saqlash boʻlinmasiga ishga joylashdi va u ham sharafli, ham masʼuliyatli kasb egasi boʻldi.

Ortiqboy oʻz xizmat vazifasini sidqidildan bajarishga harakat qildi. Xizmat yuzasidan qayerga safarbar qilinsa, oʻsha yerga joʻnab, tun-kun osoyishtalikni saqladi. Qanchadan-qancha jinoyatlarning oldi olinishiga hissa qoʻshdi.

– U juda masʼuliyatli inson edi, – deydi umr yoʻldoshi Gulora Yaxshimurodova. – Har qanday topshiriqni oʻz vaqtida uddalashga harakat qilar, vaziyat taqozo qilsa, hatto ovqatlanmasdan yana ishga qaytib ketardi. Lekin ota-onasi, farzandlarimiz ahvolidan, kayfiyati, yurish-turishidan boxabar boʻlib turishni ham hech kanda qilmasdi.

U yurt tinchligi yoʻlida koʻrsatgan xizmatlari uchun Qoraqalpogʻiston Respublikasi Ichki ishlar Vazirligi tomonidan 2 ta koʻkrak nishoni va koʻplab Faxriy yorliqlar bilan taqdirlandi.

Ammo... mashʼum oʻlim bevaqt kelib Ortiqboyni oilasi bagʻridan, xizmatdoshlari orasidan yulib olib ketdi. Uch kecha-yu uch kunduz dam olmasdan navbatdagi xizmat vazifasini bajarib uyiga qaytayotgan tunda u boshqarayotgan avtomobilning oldiga shum ajal roʻpara boʻlib, muvozanatni yoʻqotdi...

– Ayriliqqa dosh berishimiz juda ogʻir boʻldi, – deya koʻzlari yoshlanib xotirlaydi umr yoʻldoshi Gulora opa. – Qaynotamni betoblik toʻshakka mixladi. Qaynonamning qaddi bukildi. Besh farzandim esa chirqirab qoldi. Oʻzimni yoʻqotayozdim-u ammo oilam uchun tiklanishga majbur edim.

Ortiqboy Yakubovning farzandlari otasiga munosib boʻlib voyaga yetishdi. Katta farzand Sulaymon Yakubov ota izidan borib, ichki ishlar xodimi boʻldi. Hozirgi kunda tuman Ichki ishlar boʻlimining Qoʻriqlash boʻlinmasida xizmat qilib kelmoqda. Gulmirza fermer xoʻjalikda ishchi, Roʻzimboy 55-maktabda elektrik boʻlib ishlamoqda. Qizlari Muborak va Yorqinoylar turmush qurib, baxtli oilaning bekasi boʻldilar. Gulora opa birin-ketin kelinlar olib, 10 nafar nevaraning suyukli buvijonisiga aylandi. Afsus, bu kunlarni Ortiqboy Yakubovning oʻzi koʻra olmadi. Ammo u oilasi, yaqinlari, el-u yurt xotirasida abadiy yashab kelmoqda.

Inson xotirasi – aziz. Ayniqsa, yaxshi insonlar yodi dillarda mangu yashaydi. Vatan, Ona yurt, xalq oldidagi vazifasini fidoyilik bilan bajargan Ortiqboy Yakubov ham oʻzining qisqagina umrini ezguliklar bilan bezab yashagani uchun hamisha barhayotdir. Zero, el osoyishtaligi yoʻlida qilingan xizmatlar aslo unutilmaydi.

Ozoda XUDOYBERGANOVA, jurnalist.