KIChIK SANOAT ZONALARI – IQTISODIYoTIMIZ RIVOJIDA MUHIM OMIL

Dunyo davlatlarining rivojlanish jarayoniga nazar tashlaydigan boʻlsak, zamonaviy texnologiyalar asosiga qurilgan tayyor mahsulot ishlab chiqarish quvvatlari hududlar iqtisodiyoti izchil taraqqiy etishiga xizmat qilayotganiga guvoh boʻlamiz. Oddiy soʻz bilan aytganda, sanoatni rivojlantirish orqali tabiiy boyliklar serob boʻlgan joylardagidan ham yaxshiroq hayot kechirayotgan, farovonlikka erishayotgan davlatlar safi kun sayin oshib bormoqda.

Shularni hisobga olgan holda yurtimizda ham sanoat mahsulotlari ishlab chiqarish hajmini oshirish boʻyicha tizimli ishlar amalga oshirilmoqda. Prezidentimizning 2018-yilning 6-martidagi “Qoraqalpogʻiston Respublikasida kichik sanoat zonalarini tashkil etish chora-tadbirlari toʻgʻrisida”gi qarori fikrimizning isbotidir. Mazkur qaror bilan Qoraqalpogʻistonning 6 ta tumanida, jumladan, bizning Amudaryo tumanimizda ham kichik sanoat zonalarini tashkil qilish belgilandi.

Qaror asosida tumanimizdagi “Amudaryo paxta tozalash zavodi” aktsiyadorlik jamiyatining eski binosini kichik sanoat zonasiga aylantirish boʻyicha ishlar boshlab yuborildi. Bu masala boʻyicha tumanda ishchi guruh tuzilib, jami 14,3 gektar yer maydoni, shundan 11 ming 803 kvadrat metr qurilish maydoni hamda hududdagi binolar xatlovdan oʻtkazildi va ishchi guruh tomonidan qabul qilib olinmoqda.

Ushbu kichik sanoat zonasida ishlab chiqarish bilan shugʻullanayotgan, yangi ish boshlayotgan tadbirkorlik subʼektlarini joylashtirish maqsadida bu joydagi yer, bino va boshqa inshootlar uchun tender savdolari oʻtkazilishi rejalashtirilmoqda.

Hokimlikning tarmoq dasturiga kiritilgan, oʻz biznes rejasiga ega boʻlgan barcha tadbirkorlar kichik sanoat zonasidagi yer, binolar va boshqa inshootlar uchun oʻtkaziladigan tender savdolarida ishtirok etishlari mumkin.

Kichik sanoat zonasi hududidagi davlat koʻchmas mulki tadbirkorlik subʼektlariga biznes rejalarni bajarish, ish oʻrinlarini yaratish sharti bilan koʻchmas mulkdan ijara asosida foydalanish davrida ijara toʻlovining “nol” stavkasi bilan beriladi. 5-yildan keyin esa tegishli tartibda mulkka egalik huquqi beriladi.

Aytish kerakki, Prezidentimizning 2017-yil 18-yanvardagi Qaroriga muvofiq Qoraqalpogʻistonning, jumladan Amudaryo tumanining ham sanoat sohasida yangi tashkil etiladigan mikrofirmalar va kichik korxonalar 2022-yilning 1-yanvarigacha yagona soliq toʻlovini toʻlashdan ozod etilgan.

Shulardan kelib chiqib, Qoraqalpogʻiston Respublikasi iqtisodiyotining ehtiyojlarini, shuningdek, mavjud mineral-xomashyo, qishloq xoʻjaligi resurslarini va infratuzilmasini inobatga olgan holda Qoraqalpogʻiston Respublikasi kichik sanoat zonalari hududida import oʻrnini bosuvchi va eksportga yoʻnaltirilgan tayyor mahsulotlar, materiallar va butlovchi buyumlarni ishlab chiqarish korxonalarini joylashtirish boʻyicha aniq takliflar – “yoʻl xaritalari” ishlab chiqildi.

Bundan tashqari, tumanga xorijiy investorlarni jalb qilish, ishlab chiqarishga yangi innovatsiyalarni olib kelish maqsadida tuman tadbirkorlarini Xitoy xalq Respublikasi, Singapur, Bangladesh, Janubiy Koreya kabi xorijiy davlatlarga safarga joʻnatish tizimli ravishda yoʻlga qoʻyiladi. Tadbirkorlarni safarga joʻnatish tuman hokimligida shakllantirilgan roʻyxat asosida har chorakda amalga oshiriladi.

Yangi barpo qilinayotgan kichik sanoat zonasi, avvalo tadbirkorlar uchun qulay muhit yaratib, qolaversa, mamlakatimiz iqtisodiyoti rivojiga hissa qoʻshishga qaratilgani bilan nihoyatda ahamiyatlidir.

Rashid SALAYeV, tuman hokimining investitsiyalar, innovatsiyalar,

xususiylashtirilgan korxonalarga koʻmaklashish va

kichik sanoat zonalari hamda turizmni rivojlantirish

masalalari boʻyicha oʻrinbosari.