INSON UMID BILAN TIRIKDIR

Insonning saodatli hayot kechirishi, ishlari unumli va barakali boʻlishida ertangi kunga nisbatan umidning oʻrni beqiyosdir. Insonni kasb va mehnat qilishga undaydigan kuch ham shu. Gʻayrat va ishtiyoqni uygʻotadigan, dangasalik va yalqovlikni ketkazadigan omil ham umiddir. Umidni yanada yaxshiroq tushunish, his etish uchun uning ziddi boʻlgan umidsizlikni bilish kerak.

Umidsizlik – ishonchni soʻndiruvchi illat. U biror ishga qoʻl urishdan qaytaradi. Jasaddagi quvvatni sustlashtirib, yoʻqqa chiqaradi. «Umid qildim – yetdim, noumid boʻldim – yiqildim», degan hikmatni xalq bekorga yaratmagan. Abdulloh ibn Masʼud (roziyallohu anhu): “Insonni ikki narsa halok qiladi: umidsizlik va manmanlik!” deganlar.

Masalan, bemor sogʻayishdan umidini uzsa, na tabib soʻzi, na muolaja kor qiladi. Hech qanday dori foyda bermaydi.

Alloh taolo marhamat qiladi: “Allohning rahmatidan noumid boʻlmanglar. Zero, Allohning rahmatidan faqat kofirlar qavmigina noumid boʻlur” (“Yusuf” surasi, 87- oyat).

Dinimiz taʼlimoti yalqovlik, boqimandalik kabi zararli illatlarni qatʼiy qoralab, insonlarni halol rizq topish yoʻlida chin ixlos bilan mehnat qilishga buyuradi. Har qanday muvaffaqiyat osonlik bilan qoʻlga kiritilmasligi maʼlum. Ilm, kasb-hunar egallash, dunyo farovonligi va oxirat obodligi hamma-hammasi inson harakati sabab hosil boʻladi. Buning uchun insonda ishonch, umid boʻlishi kifoya.

Umid – qalb amalidir. Har bir insonni uning qalbi boshqaradi. Qalbdagi yaxshi niyat va oliy maqsadlar kishiga shijoat va gʻayrat bagʻishlaydi. Qalbida pok niyati boʻlmagan kishi biror ishga qoʻl urmaydi, kirisholmaydi, kirishsa ham ishini tugatmaydi. “Biror bilim yurtini amallab tugatsam...” degan inson shundan nariga oʻtmaydi. Noligani sayin ishi orqaga ketaveradi. Uning dardiga davo – mehnatdir.

Xohish hech narsani hal qilmaydi, natijaga erishish uchun harakat qilish kerak. Harakatdan toʻxtamagan odam biror natijaga erishmay qolmaydi. Hazrat Umar (roziyallohu anhu): “Dunyoda ertaga vafot etadigandek ibodat qil, abadiy turadigandek yasha”, deb gʻayratli boʻlishga undagan. Alloh taologa hamdlar boʻlsin! Millatimiz mehnatni sevadi, mehnatkashni qadrlaydi. Yurt obodligi, xalq farovonligi, fayz-u barakot halol mehnat bilandir.

Oʻktam QURBONIYoZOV,

«Noʻgʻoy eshon» jomeʼ masjidi imom-xatibi.