“Mard oʻgʻlon” davlat mukofotiga talabgorlar saralab olindi

22-mart kuni tuman hokimligida yigʻilish oʻtkazilib, unda “Mard oʻgʻlon” davlat mukofotiga talabgorlarni tanlash va ularning hujjatlarini taqdim etish boʻyicha tuman komissiyasi tomonidan amalga oshirilayotgan ishlar muhokama qilindi.

Yigʻilishda tuman hokimi, komissiya raisi S.Yoʻldashev soʻzga chiqib, Prezidentimizning “Mard oʻgʻlon” davlat mukofotini taʼsis etish toʻgʻrisida”gi qarori ijrosini taʼminlash maqsadida tumanimizning barcha ovul va mahallalarida, chekka qishloqlarda istiqomat qilayotgan, oʻqishda va mehnat faoliyatida yuksak natijalarga erishayotgan iqtidorli yoshlar haqidagi maʼlumotlar oʻrganilganini taʼkidlab oʻtdi. Talabgorlarni tanlashda adolat, xolislik va qonuniylikni taʼminlash va tegishli oʻquv oʻrni yoki mehnat jamoasining fikrlarini inobatga olgan holda har tomonlama munosib yoshlarni saralab olish, ularning hujjatlarini yoʻriqnoma asosida rasmiylashtirish hamda belgilangan muddatlarda taqdim etish boʻyicha barcha chaoralar koʻrilgani qayd etildi.

Aytish joizki, “Mard oʻgʻlon” mukofoti har yili Qoraqalpogʻiston Pespublikasi, viloyatlar va Toshkent shahrining ikki nafardan, jami 28 nafari yoshlarga beriladi. Mukofotlanganlarga “Yoshlar kuni” arafasida diplom, koʻkrak nishoni hamda eng kam oylik ish haqining 50 baravari miqdoridagi pul mukofoti tantanali ravishda topshiriladi.

- Tumanimizda turli sohalarda faol ishlab, fidoyilik bilan mehnat qilayotgan, taʼlim olish jarayonida yuksak natijalarga erishayotgan jami 40 nafar eng munosib nomzodlarning hujjatlari oʻrganib chiqildi, - deydi Oʻzbekiston Yoshlar Ittifoqi tuman Kengashi raisi, komissiyasi rahbari oʻrinbosari M.Shermetov.

Yigʻilishda fan sohasi boʻyicha Amudaryo xizmat koʻrsatish va servis kasb-hunar kolleji oʻquvchisi A.Nurjanovni, taʼlim soxasi boʻyicha 56-sonli maktabining 10-sinf oʻquvchisi B.Toʻliboyev va U.Pirmanovlarni, madaniyat sohasi boʻyicha tuman madiniyat va aholi dam olish markazida tashkil qilingan “Ofarin” folklor-etnografik xalq jamoasi badiiy rahbari P.Saparboyevni, sport sohasi boʻyicha Qoraqalpoq davlat universiteti jismoniy tarbiya fakulteti 3-kurs talabasi Sh.Baltabayev, tuman bolalar va oʻsmirlar sport maktabi murabbiyi O.Usmanovlarni “Mard oʻgʻlon” davlat mukofotiga talabgorlarni tanlash va ularning hujjatlarini taqdim etish boʻyicha Qoraqalpogʻiston Pespublikasi komissiyasiga tavsiya qilish boʻyicha qaror qabul qilindi.

Gʻ.Yeshniyozov