Navoiy bobomizni xotirlab...

Alisher Navoiy – oʻzbek sheʼriyatini yuksak darajada rivojlantirgan buyuk shoir va davlat arbobi, oʻz davrining dahosi, xalqparvar, oliyjanoblik va haqiqatgoʻylik kabi xislatlar egasi boʻlgan. Bu haqda Birinchi Prezidentimiz I.A.Karimov “A.Navoiy xalqimizning ongi va tafakkuri, badiiy madaniyati tarixida butun bir davrni tashkil etadigan buyuk shaxs, ilmiy adabiyotimizning tengsiz namoyandasi, millatimizning gʻururi, shaʼnu sharafini dunyoga tarannum qilgan oʻlmas soʻz sanʼatkoridir” deya taʼriflagan edilar. Milliy adabiyotimizni dunyoga tarannum qilgan shu ulugʻ inson, buyuk bobkalonimizning tavallud kuni – 9-fevral respublikamiz miqyosida yuksak darajada nishonlanib kelinmoqda.

Bizning 36-sonli umumtaʼlim maktabimizda ham bu qutlugʻ sana munosabati bilan tadbirlar oʻtkazildi. Tadbirlar A.Navoiy hamda u yaratgan maʼnaviy va adabiy merosni yoshlarga yanada yaqindan tanishtirish maqsadida maktabimiz oʻquvchilari oʻrtasida insholar tanlovi oʻtkazish bilan boshlandi.

Shuningdek, A.Navoiy tavalludining 577-yilligi munosabati bilan katta tadbir tashkil qilinib, 8-sinf oʻquvchilarining “Xamsa” va “Navoiy izdoshlari” guruhlari ulugʻ bobokalonimiz hayoti va ijodi, asarlar boʻyicha bilimdonliklarini sinab koʻrdilar. Beshta shart asosida oʻtkazilgan tanlovda guruhlar barchani A.Navoiy sheʼriyati bilan tanishtirib, uning hayotidan va yaratgan dostonlaridan ayrim lavhalarni sahna koʻrinishida namoyish etdilar. Ayniqsa, bahru-bayt shartida har ikkala guruh bir-biridan qolmaslikka harakat qildilar.

Guruhlarning chiqishlari hakamlar tomonidan baholanib, “Xamsa” guruhi ishtirokchilari gʻolib deb topildi hamda maktab maʼmuriyati tomonidan “Faxriy yorliq” va sovgʻalar bilan taqdirlandi.

Maktabimizning 9-sinf oʻquvchisi Madina Nurullayeva esa A.Navoiy hayoti va ijodi boʻyicha oʻtkazilgan insholar tanlovi gʻolibi deb topildi. Maktabimizda A.Navoiy tavalludining 577-yilligi munosabati bilan oʻtkazilgan tadbirlarni tashkil qilish va oʻtkazishda oʻzbek tili va adabiyoti fani oʻqituvchisi Saida Yusupova oʻquvchilarga yaqindan koʻmak berdi.

Buyuk bobokalonimiz A.Navoiyning boy adabiy va maʼnaviy merosi biz uchun qadrlidir. Unga ehtirom koʻrsatish va asrab-avaylash biz avlodlarning burchimizdir.

Nurbek YOʻLDOShEV, 36-maktabning 8-sinf oʻquvchisi.