Oila – eng farovon manzil

Farovonlik manzili. Insonni bu manzilga eltuvchi omillar koʻp: ishtiyoq, orzu, ishonch, mehnatsevarlik... Avval dilda ishtiyoq uygʻonadi, soʻng orzu, insonning oʻzi qilayotgan ishiga nisbatan ishonchi ortadi. Ana shu ishonch uning isteʼdodini tarbiyalaydi. Isteʼdod esa hech kim koʻra olmagan goʻzalliklarni koʻra oladi. Isteʼdod yoʻlining son-sanoqsiz soʻqmoqlarida toblangan inson oʻz turmush tarzini oʻzgartirishga, yangilashga qodir.

Mening bugungi qahramonim, oliy toifali shifokor, tadbirkor, farovon va obod, baxtiyor oila sohibi “IFTIXOR DENT” xususiy stomatologiya klinikasi boshligʻi Adilboy Yusupov nafaqat oʻzining tengqurlari va kasbdoshlari, balki tumanimiz ahli orasida fidoyiligi, mehnatsevarligi, alohida isteʼdodi bilan obroʻ-eʼtibor qozongan, oʻz hayotining farovonlik manzilini halol mehnati evaziga obod etgan insonlardan.

“Toʻlqin” ovulida, xizmatchi oilasida dunyoga kelgan Adilboy ovuldagi 33-sonli umumtaʼlim maktabini aʼlo baholarga tugatdi.

Ikki yillik Armiya xizmatidan soʻng, otasi orzu qilganiday shifokor boʻlish maqsadida 1984-yilda Toshkent Davlat tibbiyot institutining stomatologiya fakultetiga oʻqishga kirdi. Keyinchalik Rossiyaning Bologoye shahridagi tibbiyot klinikalarida internatura bosqichini oʻtadi.

Nukus shahar stomatologiya poliklinikasida terapevt-stomatolog sifatida ilk mehnat faoliyatini boshlagan Adilboy Yusupov 1992-yilda oʻzi tugʻilib oʻsgan Amudaryoga qaytdi. 6-yil davomida tuman tibbiyot birlashmasi huzuridagi stomatologiya poliklinikasida ishladi. Sohada olib borilayotgan islohotlar, tobora rivojlanib borayotgan jahon stomatologiyasi Adilboyni zamon bilan hamnafas yashashga undadi. U tumanda birinchi boʻlib 2009-yilda oʻz xususiy stomatologiya klinikasiga asos soldi. Mangʻit shahrining Berdaq nomidagi koʻchasi boʻyida joylashgan koʻp qavatli uylarning birida, birinchi qavatda, torgina xonalarda oʻz faoliyatini boshlagan bu xususiy klinika juda qisqa fursatda minglab insonlarning sevimli shifo maskaniga aylandi.

Mahoratli tadbirkor mijozlar uchun yana qulay sharoitlar yaratish maqsadida 2011-yilda stomatologiya klinikasining zamonaviy talablarga mos 3 qavatli yangi binosini qurdirdi va “IFTIXOR DENT” xususiy stomatologiya klinikasi tamoman yangi sharoitda oʻz faoliyatini davom ettirdi. Klinika oʻsha yili 8 ta zamonaviy stomatologiya anjomlari bilan jihozlandi.

Lizing evaziga 136 mln. soʻmlik UZI-4D zamonaviy diagnostika jihozini olib, Nukus shahrida “IFTIXOR DENT” xususiy klinikasining filialini ochdi va 7 nafar oliy toifali shifokor va 13 nafar oʻrta tibbiyot xodimlari ish bilan taʼminlandi.

A.Yusupov 2012-yilda Finlandiya kompaniyasining taklifiga binoan Xelsinki shahrida boʻlib oʻtgan “Tsifrovoye Sovershenstva” forumida ishtirok etib, dunyo stomatologiyasining eng soʻnggi yangiliklari bilan tanishdi. Shuningdek, Germaniya, Frantsiya davlatlarida, Shvetsiyaning Stokgolm shaharlaridagi nufuzli stomatologiya klinikalari shifokorlaridan ish oʻrgandi.

Mehnatlarining mevasi sifatida “IFTIXOR DENT” stomatologiya klinikasi rahbari Adilboy Yusupov 2015-yilda Nodavlat tibbiyot muassasalari oʻrtasida boʻlib oʻtgan tanlovda “Eng yaxshi nodavlat klinika rahbari” nominatsiyasi gʻolibi deb topildi va Oʻzbekiston Respublikasida faxrli 2-oʻrin sohibi boʻldi.

Erishilgan bu yutuq Adilboy Yusupovning tadbirkorlik sohasida yana bir yoʻnalish ochishi uchun turtki boʻldi. 2016-yilda u yangi UZI-4D tashhis apparatini lizingga oldi va klinikaning yana bitta filialini ochdi. Umr yoʻldoshi Zamiraxon Usmonova rahbarligidagi mazkur filialda zamonaviy tashhis qoʻyish, ginekologiya va terapiya xizmatlari koʻrsatish yoʻlga qoʻyildi.

Adilboy Yusupov jamoat ishlarida ham faol. U xalq deputatlari tuman Kengashi deputati sifatida tez-tez saylovchilari bilan uchrashib, ular hayotiga oid muammolar yechimi bilan shugʻullanadi. Xalq deputatlari tuman Kengashi mahalliy byudjetni shakllantirish va uni ijro etish, iqtisodiy islohotlarni amalga oshirish, tadbirkorlikni rivojlantirish boʻyicha doimiy komissiya raisi oʻrinbosari, OʻzMTDP tuman Kengashidagi deputatlik guruhi aʼzosi hamdir.

Oilada esa mehribon va fidoyi oila boshligʻi. Umr yoʻldoshi Zamiraxon Usmonova bilan 5 nafar oʻgʻil-qizni aqlli, bilimdon qilib tarbiyalamoqda. Qizlari Dilnozaxon bilan Umidaxon ota kasbini tanlagan. Ular ayni paytda tibbiyot institutining stomatologiya fakultetida tahsil olishmoqda. Gulnozaxon esa Oʻzbekiston Davlat jismoniy tarbiya instituti talabasi. Yana bir qizi va oʻgʻli 55-sonli maktabning aʼlochi oʻquvchilari.

Hayotining asosiy qismini aziz eldoshlariga xizmat qilishga baxsh etib yashayotgan Adilboy Yusupov ana shu elning, xalqning bir boʻlagi, oʻz mehnati, fidoyiligi bilan el-yurt eʼtiborini qozongan, ana shu hurmat va eʼtibor ogʻushida oʻzining farovonlik manzilini yaratgan Amu elining bir fidoyi oʻgʻloni.

Robiya YOʻLDOShEVA.