OʻQUVChILARIMIZNING YuTUQLARI

Har yilgi qishki mavsumda maktabimizda issiqlik taʼminoti yetishmasligi sababli, oʻquvchilarimiz sovuq sinflarda dars oʻtishga majbur boʻlar edi. Qishki tayyorgarlik ishlari olib borilayotgan paytda bu yil yetarli isituvchi pechlar qurildi va yoqilgʻilar bilan taʼminlandi. Ayni paytda oʻquvchilarimiz issiq sinfxonalarda dars mashgʻulotlarini oʻtib, bilimlarini oshirmoqda. Maktabimizda sharoitlar yaxshilanishi natijasida oʻquvchilarimizning yutuqlari ham koʻpaymoqda.

Yaqinda bizning 27- umumtaʼlim maktabimizda bilimli oʻquvchilarni aniqlab, tuman miqyosida kuch sinashishga olib chiqish maqsadida fanlar boʻyicha olimpiada oʻtkazildi. Iqtidorli deb topilgan oʻquvchilarimiz tuman bosqichida oʻtkazilgan fanlar olimpiadasida ham ishtirok etib, faxrli oʻrinlarni egalladilar.

Maktabimizning 9-sinf oʻquvchisi Gulmira Bayramboyeva oʻzbek tili va adabiyoti fanidan 1-oʻrin, 10-sinf oʻquvchisi Oyjamol Oʻrozaliyeva qozoq tili va adabiyoti fanidan 1-oʻrin, 9-sinf oʻquvchisi Nurjamol Oʻrozaliyeva ham 1-oʻrin, 9-sinf oʻquvchisi Salovat Dilmonov ximiya fanidan 2-oʻrin gʻoliblari deb topildilar. Shuningdek, tumanimizdagi “Grant test servis” oʻquv markazida oʻtkazilgan bilimlar sinovida maktabimizning 8-sinf oʻquvchisi Zohidjon Shomurodov fizika fani boʻyicha 2-oʻrinni egalladi. Bilimlar boʻyicha oʻz tengqurlari bilan kuch sinashgan oʻquvchilarimizni maktabimizning malakali oʻqituvchilari Amina Toʻrayeva, Zaynab Elavova, Asilbek Omonqulov, Dilmurod Ollabergenovlar bellashuvga tayyorladilar.

Maktabimizning 10-sinf oʻquvchisi Jahongir Chorshamovning “Umid nihollari” sport musobaqasida yengil atletika turi boʻyicha ishtirok etib, tumanda faxrli 1-oʻrinni egallagani quvonchimizga quvonch qoʻshdi.

Biz barchamiz maktabimiz oʻquvchilarining yutuqlaridan faxrlanamiz.

Adilboy Ametov, 27-maktab oʻqituvchisi.