Chempionlar maskaniga aylangan dargoh: 12-sonli maktab mas-restlingchilarining yutuqlari

Bugungi kunda yurtimizda sogʻlom turmush tarzini targʻib qilish va yoshlarni ommaviy sportga keng jalb etish borasida ulkan islohotlar amalga oshirilmoqda. Ana shunday ezgu saʼy-harakatlarning yorqin natijasini Amudaryo tumanidagi 12-sonli umumtaʼlim maktabi misolida yaqqol koʻrishimiz mumkin. Mazkur taʼlim muassasasida yoshlarning boʻsh vaqtini mazmunli tashkil etish maqsadida bir nechta sport toʻgaraklari yoʻlga qoʻyilgan.

Xususan, 2023-yilda tajribali va fidoyi murabbiy Bahrom Qurboniyazov tashabbusi bilan kurash va mas-restling sport turlari boʻyicha maxsus toʻgaraklar tashkil etilgan edi. Bugungi kunda mashgʻulotlarga nafaqat maktab oʻquvchilari, balki yon-atrofdagi boshqa taʼlim muassasalaridan ham sportga mehr qoʻygan yoshlar katta ishtiyoq bilan qatnashib kelmoqda.

Murabbiy Bahrom Qurboniyazov qoʻl ostida shugʻullanayotgan sportchilar qisqa vaqt ichida koʻplab yirik musobaqalarda munosib ishtirok etib, yuqori natijalarni qayd etib kelmoqda. Shu yilning 17-19-aprel kunlari Samarqand shahrida 16-18 yoshli oʻsmirlar va yoshlar oʻrtasida oʻtkazilgan nufuzli musobaqada jami 15 nafar sportchi ishtirok etdi. Ulardan 5 nafari birinchi, yana 5 nafari ikkinchi va 3 nafari uchinchi oʻrinlarni egallab, umumjamoa hisobida Oʻzbekiston boʻyicha faxrli ikkinchi oʻrinni qoʻlga kiritishdi. Musobaqadan qaytgan jamoa maktab rahbariyati, oʻqituvchilar va oʻquvchilar tomonidan tantanali tarzda kutib olindi.

Mas-restling chuqur tarixga ega boʻlgan oʻziga xos yakkakurash sporti hisoblanadi. Oʻyin shartiga koʻra, ikki sportchi bir-biriga qarama-qarshi holatda oʻtiradi, oyoqlarini maxsus taxtaga tirab, oʻrtadagi tayoqni oʻz tomoniga tortishga harakat qiladi. Kim raqibini oʻz tomoniga tortib oʻta olsa yoki tayoqni qoʻlidan chiqarib yuborishga majbur qilsa, oʻsha ishtirokchi gʻolib deb topiladi. Bu sport turi sportchidan tezkor fikrlashni, toʻgʻri taktika tanlashni va kuchli ruhiy bardoshni talab etadi. Qachon bor kuchni ishga solish, qachon sabr qilib raqibni charchatish va qachon keskin hujumga oʻtishni bilish — gʻalabaning asosiy omilidir. Shu boisdan ham, mazkur sport turi insonni har tomonlama chiniqtiradi, yoshlarda jasurlik, mehnatsevarlik va qatʼiyat ruhini shakllantiradi.

Ushbu sport turi bilan shugʻullanib kelayotgan toʻgarak qatnashchilarining zafarli yurishlari 2023-yilgi Oʻzbekiston chempionatidan boshlangan boʻlib, oʻshanda sportchilar muvaffaqiyatli ishtirok etib, navbatdagi xalqaro turnirlarga yoʻllanmani qoʻlga kiritishgan edi. 2024-yilning may oyida Nukus shahrida boʻlib oʻtgan mas-restling boʻyicha Osiyo chempionatida esa 10 nafar oʻquvchi qatnashdi va ularning 1 nafari oltin, 2 nafari kumush hamda yana 2 nafari bronza medallariga sazovor boʻldi. 2025-yilda oʻtkazilgan Oʻzbekiston chempionatida 12 nafar sportchi qatnashdi va Qirgʻiziston Respublikasida boʻlib oʻtgan Osiyo chempionatiga yoʻllanmani qoʻlga kiritdi. Qitʼa birinchiligida ham amudaryolik yoshlar ikkita kumush va uchta bronza medalini qoʻlga kiritib, yurtimiz bayrogʻini baland koʻtardilar.

Bunday yuqori natijalarga erishishda 12-sonli maktab rahbariyatining sport toʻgaraklari faoliyatini doimiy ravishda qoʻllab-quvvatlab kelayotgani, mashgʻulotlar uchun zarur barcha shart-sharoitlarni yaratib berayotgani muhim omil boʻlmoqda. Shu bilan birga, ota-onalarning ham farzandlari tanlagan yoʻlni maʼqullab, ularning boʻsh vaqtlarini mazmunli oʻtkazishiga katta hissa qoʻshayotganini alohida eʼtirof etish oʻrinlidir. Bularning barchasining negizida esa, shubhasiz, trener Bahrom Qurboniyazovning mashaqqatli va samarali mehnati yotibdi. Uning oʻz kasbiga boʻlgan sadoqati va yoshlar tarbiyasidagi yuksak masʼuliyati munosib baholanib, 2025-yil yakunlariga koʻra, Oʻzbekiston mas-restling federatsiyasi tomonidan "Eng yaxshi trener" koʻkrak nishoni bilan taqdirlangani ham soʻzimizning yaqqol isbotidir.

Bugungi kunda toʻgarakda jami 52 nafar oʻgʻil-qiz ikki smenada muntazam ravishda mashgʻulotlarda ishtirok etishmoqda. Endilikda yosh sportchilar oldinda turgan navbatdagi katta sinov — shu yilning may oyida 13-15 yoshli oʻquvchilar oʻrtasida boʻlib oʻtadigan Oʻzbekiston chempionatiga qizgʻin tayyorgarlik koʻrmoqdalar. Hamyurtlarimizga ushbu musobaqalarda ham omad va zafarlar tilab qolamiz!