Xalq deputatlari Amudaryo tuman Kengashining 40-sessiyasi toʻgʻrisida AXBOPOT (+video)

2017-yil 29-dekabr kuni xalq deputatlari Amudaryo tuman Kengashining 40-sessiyasi boʻlib oʻtdi.

Sessiyada tuman hokimi oʻrinbosarlari, hokimlik masʼul xodimlari, huquqni muhofaza qilish organlari, hokimlik boʻlimlari, jamoat tashkilotlari, akademik litsey va kasb-hunar kollejlari direktorlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdi. 

Sessiya kotibligiga 18-Xitoy saylov okrugidan deputat Gulmirza Babajanov saylandi.

Sessiyada dastlab tuman saylov komissiyasi raisi Anvar Kamolovning Xalq deputatlari Amudaryo tuman Kengashining boʻshab qolgan oʻrinlariga 2017-yil 17-dekabrda boʻlib oʻtgan saylov natijalari toʻgʻrisidagi axboroti tinglandi. Soʻngra yangi saylangan deputatlar Kushayev Ashirbay Baltabayevich va Beknazarova Muqaddas Norim qizining deputatlik vakolatlari eʼtirof etildi. Shu munosabat bilan tuman Kengashining doimiy komissiyalari tarkibiga oʻzgartishlar kiritildi.

Sessiyada “Xalq bilan muloqot va inson manfaatlari yili” tuman dasturining ijrosi yuzasidan tuman hokimi oʻrinbosari Alisher Yuldashevning, tumanda 2017-yil ish oʻrinlarini yaratish va aholi bandligini taʼminlash dasturining ijrosi va 2018-yilgi Dasturi loyihasi toʻgʻrisida tuman hokimining iqtisodiyot va tadbirkorlik masalalari boʻyicha birinchi oʻrinbosari Maʼmurjon Temirboyevning axborotlari tinglandi.

Taʼkidlanganidek, 5 boʻlim 57 banddan iborat "Harakatlar strategiyasini Xalq bilan muloqot va inson manfaatlari yili"da amalga oshirishga oid tuman dasturi qabul qilinib, dastur doirasida qator ishlar amalga oshirildi.

2017-yilda yangi ish oʻrinlarini tashkil etish va aholi bandligini taʼminlash Dasturi boʻyicha 3 ming 30 ta yangi ish oʻrinlari yaratish rejalashtirilgan boʻlib, joriy yil davomida amalda 3 ming 62 ta ish oʻrinlari yaratildi va reja 101,1 foizga bajarildi. 2018-yilda esa jami 2 ming 890 ta yangi ish oʻrinlari yaratilishi koʻzda tutilgan.         

Deputatlar “Odam savdosiga qarshi kurashish toʻgʻrisida”gi Oʻzbekiston Pespublikasi Qonunining hamda Oʻzbekiston Pespublikasi Prezidentining 2008-yil 8-iyuldagi “Odam savdosiga qarshi kurashish samaradorligini oshirish boʻyicha choralar toʻgʻrisida”gi qarorining ijrosini taʼminlash yuzasidan tumanda olib borilayotgan ishlar toʻgʻrisida”gi masalani muhokama qilib, Tumanda jinoyatchilik va huquqbuzarliklarning oldini olish boʻyicha amalga oshirilayotgan ishlar yuzasidan tuman ichki ishlar boʻlimi boshligʻining hisobotini tingladilar.

Shuningdek, sessiyada Amudaryo tuman maʼmuriy sudi tomonidan va tuman iqtisodiy sudi tomonidan amalga oshirilayotgan ishlar yuzasidan tegishli sud raislarining axboroti tinglandi.

Sessiya kun tartibidagi “Amudaryo tumanida tibbiyot birlashmasi tomonidan yil davomida olib borilgan ishlar toʻgʻrisida”gi masala yuzasidan tuman tibbiyot birlashmasi boshligʻi oʻrinbosari Xidirboy Tajimov hisoboti berdi.

Hisobotda tumanimizda aholi sogʻligini saqlash boʻyicha amalga oshirilayotgan ishlarga toʻliq toʻxtalib oʻtildi.

Shuningdek, sessiyada deputatlar tuman Kengashining vakolatiga kiruvchi boshqa masalalarni ham muhokama qildilar. Kun tartibidagi barcha masalalar boʻyicha faol munozaralar, savol-javoblar boʻlib oʻtdi. Bildirilgan taklif va fikr-mulohazalarni inobatga olgan holda tegishli qarorlar qabul qilindi. Shuning bilan sessiya oʻz ishini yakunladi.

Tuman hokimligining axborot xizmati.