Tuman Xalq qabulxonasi mudiri: fuqarolar tomonidan 611 ta murojaat kelib tushdi

Har bir shaxs bevosita oʻzi va boshqalar bilan birgalikda vakolatli davlat organlariga, muassasalariga yoki xalq vakillariga ariza, taklif va shikoyatlar bilan murojaat qilish huquqiga ega. Arizalar, takliflar va shikoyatlar qonunda belgilangan tartibda va muddatlarda koʻrib chiqilishi shart.

Oʻzbekiston Respublikasi Konstitutsiyasining 35-moddasi.

Davlatimiz rahbari Shavkat Mirziyoyevning 2016-yil 28 dekabrdagi "Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida”gi farmoniga muvofiq Amudaryo tumanida tashkil etilgan Oʻzbekiston Respublikasi Prezidentining Xalq qabulxonasi fuqarolar murojaatlarini oʻz vaqtida koʻrib chiqish va xolisona hal etishga xizmat qilmoqda.

Joriy yilning oʻtgan toʻqqiz oyi davomida tumanimizdagi Xalq qabulxonasiga fuqarolar tomonidan 611 ta murojaat kelib tushdi. Shundan 165 ta murojaat Xalq qabulxonasi tomonidan koʻrib chiqildi. 387 tasi  tuman hududidagi idora va tashkilotlarga, 59 tasi yuqori tashkilotlarga oʻrganish va muammolarni bartaraf etish uchun yuborildi.

Oʻtgan 9 oy davomida 239 ta murojaat toʻla qanoatlantirildi, 80 tasi huquqiy maslahat va maʼlumot berish orqali hal etildi. 188 ta murojaat asosli  deb topilib, ular hal etilishi uchun qoʻshimcha hujjat, muddat va oʻrganish talab etiladigan murojaatlar qatoriga kiritildi hamda 80 nafar fuqaroning murojaati atroflicha oʻrganilib, ular boʻyicha zarur tushuntirishlar berildi.

2017-yilning oʻtgan 9 oyi davomida tumandagi Xalq qabulxonasi tomonidan 390 ta turli mavzudagi tadbirlar oʻtkazilib, xalqning murojaat va takliflari qabul qilindi. Tuman hokimi Sultonboy Yoʻldashev xalq orasiga kirib, ovul va mahalla fuqarolar yigʻinlarida 47-marta sayyor qabullar oʻtkazdi. Tuman prokurori tomonidan oʻtkazilgan 45 ta, ichki ishlar  boʻlimi boshligʻi tomonidan oʻtkazilgan 44 ta ochiqdan-ochiq muloqotlar, boshqa idora va tashkilotlar rahbarlari ishtirokida 247 marta uyushtirilgan yuzma-yuz uchrashuvlar jarayonida tumanimiz aholisi hayotiga oid yechimini kutayotgan muammolarga barham berilganining oʻzi davlat idoralari bilan oddiy xalq oʻrtasida samimiy munosabatlarning mustahkamlanishida muhim omil boʻldi.

Har haftaning shanba kuni tuman hokimi rahbarligida huquqni muhofaza qilish organlari rahbarlari, ovul va mahalla fuqarolar yigʻinlari raislari, davlat idoralari rahbarlari bilan birgalikda tumanimizning bitta mahallasi va bitta davlat idorasiga borib, shu hududda yashovchi aholi va shu idorada ishlovchi xodimlar bilan uchrashib, aniqlangan dolzarb muammolarni joyida bartaraf etish yuzasidan aniq choralar koʻrib bormoqdamiz.

Tumanimizda faoliyat koʻrsatayotgan Xalq qabulxonasi aholi bilan bevosita muloqot qilib, hayotiy muammolarni tezkorlik bilan, shu yerning oʻzida hal etishga keng imkoniyat yaratmoqda va kishilarning ogʻirini yengil qilib, ularning hukumat idoralariga boʻlgan ishonchini mustahkamlamoqda.

Men fursatdan foydalanib, tumanimiz aholisini Oʻzbekiston Respublikasi Konstitutsiyasi qabul qilinganligining 25 yilligi bilan muborakbod etaman. Yurtimiz tinch, osmonimiz musaffo, xalqimiz farovonligi abadiy boʻlsin!

Erkin RAJABOV,

Oʻzbekiston Respublikasi Prezidentining Qoraqalpogʻiston Respublikasi Amudaryo tumanidagi Xalq qabulxonasi mudiri.

(Foto - http://murabbiy-press.uz)