Xalq deputatlari Amudaryo tuman Kengashining oʻttiz toʻqqizinchi sessiyasi toʻgʻrisida AXBOROT (+Video)

2017-yil 16-noyabr kuni Xalq deputatlari Amudaryo tuman Kengashining oʻttiz toʻqqizinchi sessiyasi boʻlib oʻtdi. Sessiyani tuman hokimi, Kengash Raisi Sultonboy Yoʻldoshev ochdi va olib bordi.

Sessiya kun tartibiga "Amudaryo tumanida patronaj xizmatining sifatini yaxshilash, aholining tibbiy savodxonligini oshirish chora-tadbirlari”gi, "Voyaga yetmaganlar va yoshlar oʻrtasida huquqbuzarlik va jinoyatchilikning oldini olish, profilaktika inspektorlari ishlarini samarali tashkil etish va muvofiqlashtirish boʻyicha olib borilayotgan ishlar toʻgʻrisida”gi, "Xalq deputatlari Amudaryo tuman Kengashida boʻshab qolgan oʻrinlarga deputatlar saylovini oʻtkazish kunini belgilash toʻgʻrisida”gi va sessiya vakolatiga kiruvchi boshqa masalalar kiritildi.

Kun tartibidagi birinchi masala boʻyicha tuman tibbiyot birlashmasi boshligʻi E.Abdullayev hisobot berdi. Hisobotda taʼkidlanganidek, 2017-yilning oʻtgan davri mobaynida tuman tibbiyot birlashmasi va unga qarashli muassasalar tomonidan 124 ming 144 nafar aholi chuqurlashtirilgan tibbiy koʻrikdan oʻtkazilib, ularning 45 ming 317 nafarida turli kasalliklar aniqlangan. Hisobot davrida tugʻish yoshidagi 52 ming 436 nafar ayol-qizlar toʻliq tibbiy koʻrikdan oʻtkazilib, kasalliklar belgilari aniqlangan 32 ming 41  nafar ayollarning aksariyati statsionar va ambulator sharoitda sogʻlomlashtirilgan. Aholini sifatli tibbiy xizmat bilan qamrab olish va kasalliklarni barvaqt aniqlash uchun barcha choralar koʻrilmoqda.

Kun tartibidagi ikkinchi masala yuzasidan tuman ichki ishlar boʻlimi boshligʻining yoshlar masalalari boʻyicha oʻrinbosari, huquqbuzarliklar profilaktikasi boʻlinmasi boshligʻi A.Qurbaniyazov hisobot berdi.

Taʼkidlanganidek, 2017-yilning oʻtgan 10 oyi davomida tuman boʻyicha umumiy jinoyatchilik oʻtgan yilning mos davriga nisbatan 13 taga kamaydi. Ammo, baʼzi turdagi jinoyatlar oshib ketishiga yoʻl qoʻyilgan. Hisobotda jinoyatchilikning oldini olish, voyaga yetmaganlar oʻrtasida nazoratsizlik va huquqbuzarliklarning profilaktikasi boʻyicha amalga oshirilayotgan ishlar haqida toʻliq maʼlumot berildi.

Sessiyada "Xalq deputatlari viloyat, tuman va shahar Kengashlariga saylov toʻgʻrisida”gi Oʻzbekiston Respublikasi Qonunining 44-moddasiga asosan tuman Kengashining 2 ta okrugida, yaʼni 1-Navoiy va 10-Toshyop saylov okruglarida boʻshab qolgan oʻrinlarga 2017 yilning 17-dekabr, yakshanba kuniga saylov belgilash taklifi deputatlar tomonidan maʼqullandi.

Shuningdek, sessiyada tuman Kengashi vakolatiga kiruvchi boshqa masalalar ham muhokama qilindi. Kun tartibidagi barcha masalalar boʻyicha tegishli qarorlar qabul qilindi va shuning bilan sessiya oʻz ishini yakunladi.

Tuman hokimligining axborot xizmati.