OSOYIShTALIK POSBONLARIGA QULAYLIKLAR

Xalqimiz tinchligini saqlash, mamlakatimizda ijtimoiy-siyosiy barqarorlikni taʼminlash, uyushgan jinoyatchilik va korruptsiya, diniy ekstremizm va terrorizmga qarshi kurash boʻyicha olib borilayotgan qatʼiy siyosatni amalga oshirishda Ichki ishlar tizimi xodimlarining hissasi katta.

 Shu sababli soʻnggi yillarda soha xodimlarining ish va dam olish sharoitlarini, ular mehnatiga haq toʻlash tizimini yaxshilash maqsadida qator ishlar amalga oshirilmoqda. Xususan, Oʻzbekiston Respublikasi Prezidentining 2017-yil 20-apreldagi 2906-sonli "Ichki ishlar organlari tayanch punktlarining inspektorlarini xizmat uy-joyi bilan taʼminlashga doir qoʻshimcha chora-tadbirlar toʻgʻrisida”gi Qarori chekka ovullarda oʻz xizmat vazifasini bajarayotgan profilaktika inspektorlarining ish va yashash sharoitlarini yaxshilash, ularga koʻngildagidek qulayliklar yaratib berishga qaratilgani bilan gʻoyat ahamiyatlidir.

Mustaqilligimizning 26 yilligi arafasida Prezident qaroriga binoan tuman IIB profilaktika inspektorlari uchun 28 ta uy-joy qurish maqsadida yer maydoni ajratish haqidagi tuman hokimining qarori qabul qilindi. 2017-yilning oʻzida ana shu ajratilgan yer maydonlarida namunali loyihalar asosida 8 ta uy-joy barpo etiladigan boʻldi. 16 ta uy-joy qurilishi uchun zarur hujjatlar rasmiylashtirilib, shartnomalar tuzildi. Mamlakatimizning barcha tumanlaridagi kabi tuman IIBga 5 ta shtat birligi qoʻshilgani va aynan 5 nafar profilaktika inspektori uchun tumanda boʻsh turgan imoratlar aniqlanib, bu imoratlar mukammal taʼmirdan chiqarilib, profilaktika inspektorlariga foydalanish uchun topshirilishi ayni muddao boʻldi. Aynan shunday boʻsh turgan imoratlardan ikkitasi toʻliq taʼmirdan chiqarilib, "Toʻlqin” va "Choykoʻl” ovullarida xizmat qilayotgan profilaktika inspektorlariga foydalanish uchun topshirildi.

Bundan tashqari, tumanimizdagi 33 nafar profilaktika inspektorlariga imtiyozli kredit asosida "Matiz” rusumli avtomobillarni xarid qilishlari uchun 10-yil muddatga shartnomalar tuzildi.

Soha xodimlari uchun yaratib berilayotgan bu kabi imkoniyatlar, albatta, har birimizni yanada fidoyilik bilan, har lahzada ona Vatan xizmatiga shay turishga undaydi.

Zero, ona Vatanga, fidoyi va mehnatkash xalqimizga xizmat qilish ham eng ulugʻ qadriyatdir.

Aziz Qurbaniyazov, tuman IIB boshligʻining yoshlar masalalari boʻyicha oʻrinbosari, huquqbuzarliklar profilaktikasi boʻlinmasi boshligʻi, mayor.