Sayyor qabulda muammolar yechimini topdi

Muhtaram Prezidentimiz Shavkat Miromonovich Mirziyoyevning tashabuslari bilan mamlakatimizda xalq bilan muloqot qilish, aholini oʻylantirayotgan muammolarga tezkor yechim topishning zamonaviy va samarali tizmi yoʻlga qoʻyilgani odamlarning davlatimizgaga, ertangi kunimizga ishonchini yanada mustahkamlamoqda.

Oʻzbekiston Respublikasi Prezidentining 2016-yil 28-dekabrdagi "Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida”gi Farmoniga asosan tashkil qilingan Oʻzbekiston Respublikasi Prezidentining Xalq qabulxonasi, joylardagi Xalq qabulxonalari hamda virtual qabulxona bu borada muhim vosita boʻlmoqda.

Oʻzbekiston Respublikasi Prezidenti devonining Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati vakillari tomonidan joylarda sayyor qabullar oʻtkazilib, Prezidentimizning xalq qabulxonasi va virtual qabulxonasiga kelib tushayotgan murojaatlar tahlil qilinmoqda. Muammolarni hal qilish, murojaatlarni qanoatlantirish maqsadida tegishli soha rahbarlari ariza va shikoyat yoʻllagan fuqarolar hamda yuridik shaxslarning vakillari bilan shaxsan uchrashmoqda.

5-sentyabr kuni tumanimizda ham shu kabi sayyor qabul oʻtkazildi. Sayyor qabulda Oʻzbekiston Respublikasi Prezidentining virtual qabulxonasiga va Amudaryo tumanidagi Xalq qabulxonasiga kelib tushgan, Respublika miqyosida yechimini kutayotgan 30 dan ortiq murojaatlar turli vazirlik va idoralar masʼullari ishtirokida koʻrib chiqildi.

Joriy yil hisobiga ikkinchi marta oʻtkazilayotgan sayyor qabulda Oʻzbekiston Respublikasi Prezidenti devonining masʼullari boshchiligida fuqarolarimizni qiynab kelayotgan koʻplab muammolarga yechim topildi, ayrim masalalar qonun doirasida koʻrib chiqish va hal qilish uchun tegishli davlat organlariga yuborildi.

Aytish kerakki, tumandagi Xalq qabulxonasiga fuqarolardan kelib tushayotgan murojaatlarni iloji boricha tumanning oʻzida hal qilish choralari koʻrilmoqda. Shu maqsadda har haftaning chorshanba va shanba kunlari tuman hokimidan tortib, barcha sohalarning masʼul rahbarlari ishtirokida Xalq qabulxonasida fuqarolar bevosita qabul qilinadi.

Birgina joriy yilning oʻtgan 8 oyi davomida Xalq qabulxonasiga kelib tushgan 481 ta murojaatlarning 199 tasi, yoki 42 foizi joyida, tumanning oʻzida hal qilingani fikrimizning isbotidir.

Darhaqiqat, har bir murojaat ortida inson taqdiri turadi. Bugungiday sayyor qabullarning oʻtkazilishi, odamlarni oʻylantirayotgan muammolarga yechim topilib, taklif va shikoyatlarining inobatga olinishi ularning bugunidan rozi boʻlib yashashi, ertangi kunga ishonchi yanada mustahkam boʻlishiga xizmat qiladi.

Tuman hokimligining axborot xizmati.