Xalq deputatlari Amudaryo tuman Kengashining yigirma toʻqqizinchi sessiyasi toʻgʻrisida AXBOROT

2017-yil 1-mart kuni Xalq deputatlari Amudaryo tuman Kengashining 29-sessiyasi boʻlib oʻtdi.

Sessiya majlisida Oʻzbekiston Respublikasi Oliy Majlisi Qonunchilik palatasi deputati Joldasbay Abdujamilov, tuman hokimi S.Yoʻldoshev, tumandan saylangan Qoraqalpogʻiston Respublikasi Joʻqorgʻi Kengesi deputatlari, tuman hokimi oʻrinbosarlari, hokimlik masʼul xodimlari, huquq-tartibot organlari va boʻlimlar rahbarlari, jamoat tashkilotlari hamda ommaviy axborot vositalari vakillari ishtirok etdi.

Sessiya kotibi etib 18-Xitoy saylov okrugidan tuman Kengashi deputati G.Babajanov saylandi.

Sessiya kun tartibiga "Boʻshagan oʻrinlarga xalq deputatlari Amudaryo tuman Kengashiga 2017-yil 26-fevralda boʻlib oʻtgan saylov natijalari toʻgʻrisida”gi, "Xalq deputatlari Amudaryo tuman Kengashining doimiy komissiyalari tarkibiga oʻzgartishlar kiritish toʻgʻrisida”gi, "Qoraqalpogʻiston Respublikasi Joʻqorgʻi Kengesi Raisining ayrim farmoyishlarini tasdiqlash toʻgʻrisida”gi hamda "Aholiga tibbiy xizmat koʻrsatishni, dori vositalari taʼminotini yanada yaxshilash, ushbu sohadagi qonunchilikni amaliyotga samarali tatbiq etishga koʻmaklashish, shuningdek bu sohada deputatlar va jamoatchilik nazoratini samarali amalga oshirish chora-tadbirlari toʻgʻrisida”gi masalalar kiritildi.

Kun tartibidagi birinchi masala boʻyicha tuman saylov komissiyasi raisi A.Kamolovga axborot berdi. Taʼkidlanganidek, 2017-yil 26-fevral kuni xalq deputatlari tuman Kengashiga oʻrni boʻshab qolgan 12-Arnaboʻyi, 19-Toryop, 26-Choykoʻl saylov okruglarida deputatlar saylovi boʻlib oʻtdi. Saylovlar umumiy, teng va toʻgʻridan-toʻgʻri, yashirin ovoz berish yoʻli bilan, qonun talablari asosida oʻtkazildi.

Sessiyada saylov natijalariga koʻra xalq deputatlari tuman Kengashiga saylangan deputatlar – S.Yoʻldashev, I.Palvanov va X.Rajabovalarning deputatlik vakolatlari eʼtirof etildi, shuningdek, mazkur saylov yakunlari boʻyicha sessiyada tuman Kengashining 3 ta doimiy komissiyalari tarkibiga oʻzgartirishlar kiritish boʻyicha qarorlar qabul qilindi.

Oʻzbekiston Respublikasi Prezidentining 2016-yil 22-dekabrdagi "Mahalliy ijroiya hokimiyati organlari faoliyatini yanada takomillashtirish toʻgʻrisida”gi PQ-2691-sonli qarori ijrosi yuzasidan Qoraqalpogʻiston Respublikasi Vazirlar Kengashining 2017-yil 31-yanvardagi 36-sonli qarori qabul qilinib tuman hokimligi apparati strukturasiga oʻzgarishlar kiritilib, tasdiqlangan edi.

Shu munosabat bilan sessiyada tuman hokimining iqtisodiyot va tadbirkorlik masalalari boʻyicha birinchi oʻrinbosari va tuman hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarini tayinlash yuzasidan Qoraqalpogʻiston Respublikasi Joʻqorgʻi Kengesi Raisining farmoyishlari deputatlar tomonidan tasdiqlandi.

Kun tartibidagi navbatdagi masala boʻyicha Oʻzbekiston Respublikasi Oliy Majlisi Qonunchilik palatasi deputati J.Abdijamilov soʻzga chiqib, mamlakatimizda aholiga tibbiy xizmat koʻrsatishni, dori vositalari taʼminotini yanada yaxshilash boʻyicha amalga oshirilayotgan ishlarga keng turda toʻxtalib oʻtdi.

Sessiyada mazkur sohadagi qonunchilikni amaliyotga samarali tatbiq etishga koʻmaklashish, shuningdek bu sohada deputatlar va jamoatchilik nazoratini samarali amalga oshirish maqsadida tuman Kengashi huzurida komissiya tashkil qilindi hamda tuman Kengashi deputatlari tegishli hududlarga biriktirildi.

Kun tartibidagi barcha masalalar boʻyicha tuman Kengashining tegishli qarorlari qabul qilindi va shuning bilan sessiya oʻz ishini yakunladi.

Tuman hokimligining axborot xizmati.