MURGʻAK KOʻNGILLARGA MUHRLANGAN LAHZALAR

Ilk bor maktab ostonasiga qadam qoʻygan kunini, oʻqituvchisi ilk bor qoʻliga qalam tutqazib, yozishni, oʻqishni oʻrgatgan damlarini koʻnglida shirin orziqish bilan, sogʻinch bilan eslamaydigan odam boʻlmasa kerak. Chunki oʻsha kun har birimizning  oilamiz olamidan chiqib, umumga, tengqurlarimizga qoʻshilishib, ilm egallashimiz yoʻlida ilk pillapoya boʻlgan. Ona tilimiz alifbosini toʻla egallash esa maʼrifat dunyosining kalitidir.

Shu bois, alifboni toʻla oʻzlashtirib, savodxon boʻlib  olgan bolajonlar "Alifbe” kitobi bilan  shodu xurramlikda xayrlashadilar, harflarni oʻrgatgani uchun kitobga, ustoziga minnatdorlik bildiradilar.

22-dekabr kuni 16-sonli maktab majlislar xonasida boʻlib oʻtgan 1”b” sinf oʻquvchilarining "Savodxonlik bayrami”da ham  "Alifbe” kitobini oʻzlashtirib olgan 26 nafar bolajonlarning quvonchlari yaqqol aks etdi. Ustozlariga hurmat-ehtiromini, bolalarning taʼlim-tarbiya olishlari uchun bugungiday sharoitlarni  yaratib bergan davlatimizga minnatdorchiligini ifodalovchi sheʼrlar, qoʻshiqlar, raqslarni mahorat bilan ijro etib, ustozlarini, ota-onalarini xushnud etdilar.

Bayramona bezatilgan ulkan xonaga oʻrnatilgan archa atrofida Qorbobo va Qorqiz bolajonlarni Alifbeni oʻzlashtirib olganliklari bilan qutlab, birga oʻynab-kulganlari ayniqsa zavqli boʻldi. Ramziy "Alifbe” kitobi davraga kirib keldi va bolajonlarga oʻzidagi mavjud harflarni yaxshi oʻzlashtirib olganliklari uchun rahmat aytdi, doʻstona xayrlashib, oʻrnini ona tili kitobiga berishini eʼlon qildi. Barcha darsliklarni ham puxta oʻzlashtirib borishlarini tiladi.

Yana navbat kuy-qoʻshiqlarga, raqslarga berildi.

– Men bugungi oʻtkazilgan tadbirdan juda ulkan taassurotlar oldim. Chunki sahnada tomosha namoyish etgan 26 nafar bolaning maktabga qadam qoʻyganiga koʻp vaqt boʻlmadi. Har qaysisi bir oilaning ardogʻida oʻsgan 26 nafar bolani doʻstlashtirib, qisqa fursatda savodini chiqarib, shuncha narsalarni oʻrgatish sinf oʻqituvchisi Goʻzal Hojiyevaga oson boʻlmagani aniq. Buning uchun maktab maʼmuriyatiga, Goʻzal Hojiyevaga rahmat, – deydi sinfning aʼlochi oʻquvchilaridan Umidjon Soatboyevning onasi Raʼno.

Tadbir bolajonlarning ham koʻnglida bir umr muhrlanib qolsa ajab emas.

Oygul RAJABOVA.