Koʻpriklarni taʼmirlash va qaytadan qurishni YXPTF korxonasi bajaradimi yoki bu ish oʻsha hududdagi ovul va mahallalarga tegishlimi?

Savol: – Koʻpriklarni taʼmirlash va qaytadan qurishni YXPTF korxonasi bajaradimi yoki bu ish oʻsha hududdagi ovul va mahallalarga tegishlimi?

Javob: – Tumanimiz boʻyicha umumfoydalanuvdagi jami 340 km. uzunlikdagi davlat va mahalliy ahamiyatdagi 30 ta yoʻlda 85 ta koʻprik mavjud. Shundan 20 tasi davlat ahamiyatidagi, qolgan 65 tasi mahalliy ahamiyatdagi yoʻllarga tegishli. Mavjud 85 koʻprikning 54 tasi korxonamiz balansida boʻlib qolganlari tuman melioratsiya va irrigatsiya tizimi korxonalariga qarashlidir.

Koʻpriklarni mayda va joriy taʼmirlash maqsadida korxonamizga davlat tomonidan mablagʻ ajratiladi va mablagʻ miqdoriga qarab birinchi navbatda taʼmirtalab koʻpriklar taʼmirlanadi. Koʻpriklarni qayta qurish va toʻla taʼmirlash ishlarini litsenziyaga ega maxsus koʻprik tuzatuvchi korxonalar amalga oshiradi.

Hozirgi kunda ana shunday toʻla taʼmirlashga muhtoj koʻpriklarni taʼmirlab berish boʻyicha Qoraqalpogʻiston KXSITFK koʻprik xoʻjaligi korxonasiga buyurtma berilgan.

Savol: – Yoʻl idorasi tasarrufidagi yoʻllar boʻyiga aholi tomonidan ekilgan dov-daraxtlarga aholi egalik qilaoladimi?

Javob: – Oʻzbekiston Respublikasi, "Avtomobil yoʻllari toʻgʻrisida”gi Qonunining 24-moddasiga asosan umumiy foydalanuvdagi avtomobil yoʻllarining oʻqidan 50 m. dan kam boʻlmagan masofada avtomobil yoʻliga tutash yer uchastkalarining mulkdorlari, egalari va ulardan foydalanuvchilar ajratilgan mintaqada qurilish materiallari, tosh, shox-shabba va axlat uyumlari toʻplanishiga yoʻl qoʻymasliklari, agarda yoʻl yoqasiga daraxtlar ekilgan boʻlsa ularni asrash va saqlashga koʻmaklashishlari shart.

Aholi avtomobil yoʻllari uchun ajratilgan mintaqadan foydalanmoqchi boʻlsa, yoʻl egasi boʻlgan korxona bilan kelishib, doimiy imorat yoki qoʻshimcha qurilish ishlari qilmaslik sharti bilan bir yillik ekinlar ekib foydalanishi mumkin.

Savollarga tuman YXPTF korxonasi boshligʻi A.KAMOLOV javob berdi.