QILIChBOYLIK ORASTA QIZ

Xushxabarning qanoti bor, deyishadi. Oʻz nomi bilan dilga yaqin, eshitgan quloqqa xush yoqib, koʻngillarni yashnatib yuboradigan xabardan oʻsha kuni  nafaqat qilichboylik Saidjonovlar oilasi, balki butun ahli ovul, qolaversa, eshitgan borki, barcha quvondi, havas qildi.

Qilichboy qishlogʻidagi "Amirxon” fermer xoʻjaligi ish yurituvchisi Dilfuza Bobojonovaning xonadoni shu kuni mehmonlar bilan yanada obod boʻldi. Qutlab  keluvchilardan minnatdor boʻlgan Dilfuza shu kuni koʻnglini ochdi, ham toʻkin dasturxon yozdi. Qizi, Amudaryo maishiy xizmat koʻrsatish kasb-hunar kollejining 2-bosqich oʻquvchisi Muhayyo Yoʻldoshevaning "Mahallaning eng orasta qizi” koʻrik-tanlovining Oʻzbekiston Respublikasi bosqichida faxrli birinchi oʻrinni olganini eshitgan yaqinlari Dilfuzaning quvonchiga sherik boʻlishdi.

Tabiatan mehribon, samimiy va intiluvchan boʻlgan Muhayyo qishloqdagi 15-sonli maktabda oʻqib yurgan kezlaridayoq oʻzining alohida iqtidori, intiluvchanligi, darslarni puxta oʻzlashtirishi, epchilligi bilan ajralib turardi. Maktabni aʼlo baholarga tugatgan Muhayyo, oʻqishni Amudaryo maishiy xizmat koʻrsatish kasb-hunar kollejida davom ettirdi. Shu bilan birga "Orasta qizlar” toʻgaragining barcha mashgʻulotlarida faol ishtirok eta boshladi. Bundan  tashqari, onasidan hamda ustozlari Nigora Oʻrozaliyeva, Muborakxon Yoʻldoshevalardan qiz bolaga xos ezgu fazilatlar, bichish-tikish, pazandalik, sport sohasi boʻyicha sir-asrorlarni qunt bilan oʻrgandi. Darsdan va uy yumushlaridan boʻsh vaqtlarida kitob, gazeta, jurnallar mutolaa qilishni oʻzining eng yaxshi koʻrgan kundalik mashgʻulotiga aylantirdi.

U avval oʻzi yashaydigan Qilichboy qishlogʻi qizlari oʻrtasida oʻtkazilgan "Mahallaning eng orasta qizi” koʻrik-tanlovi gʻolibi sifatida mazkur koʻrik-tanlovning tuman bosqichida ishtirok etdi. Amu elining biri-biridan zukko qizlari bilan bellashgan Muhayyoga yana omad kulib boqdi. U oʻz bilimi, mahorat va iqtidori bilan tuman bosqichi gʻolibiga aylandi va "Mahallaning eng orasta qizi” koʻrik-tanlovining Qoraqalpogʻiston Respublikasi bosqichida ham faxrli 1-oʻrinni egalladi.

Yaqinda mazkur koʻrik-tanlovning Oʻzbekiston Respublikasi bosqichida muvaffaqiyatli ishtirok etgan Muhayyo Yoʻldosheva oʻz chiqishlari hamda koʻrik-tanlov shartlarini yuksak mahorat bilan bajargani uchun "Mahallaning eng orasta qizi” koʻrik-tanlovida yana birinchi oʻrin sohibasiga aylandi va Oʻzbekiston  mahallalarining eng oqila, bilimdon, zukko va epchil orasta qizlari safidan joy oldi.

– Gʻoliblikni qoʻlga kiritishimda eng avvalo, ustozlarimning hissasi katta boʻldi, qolaversa, kitobga boʻlgan mehrim tufayli men juda koʻp narsani oʻrgandim, – deydi Muhayyo. – Kitob – hayot ilmini oʻrgatadi, kitob – insonni hayotga joʻshqin nazar bilan qarashga undaydi. Kitob – mudroq koʻngillarni uygʻotib, hayotini yashnatib yuboradi. Men tengdoshlarimga nimaiki oʻrganishni istasangiz – albatta kitobni seving, kitob bilan doʻstlashing, hayotda insonga kitobdan yaqinroq doʻst yoʻq, – degim keladi.

Muhayyoning orzulari bir olam. U kollejni tugatib, oliy maʼlumotli boʻlish istagida. Biz Muhayyo Yoʻldoshevaga oʻqishda va hayotda yangidan-yangi yutuqlar tilaymiz.

Robiya YOʻLDOShEVA.