BARQARORLIK VA TARAQQIYoT KAFOLATI

Oʻzbekiston xalqi:

– inson huquqlariga va davlat suvereniteti gʻoyalariga sodiqligini tantanali ravishda eʼlon qilib;

– hozirgi va kelajak avlodlar oldidagi yuksak masʼuliyatini anglagan holda, oʻzbek davlatchiligi rivojining tarixiy tajribasiga tayanib;

– demokratiya va ijtimoiy adolatga sadoqatini namoyon qilib;

– xalqaro huquqning umum eʼtirof etilgan qoidalari ustunligini tan olgan holda;

– respublika fuqarolarining munosib hayot kechirishlarini taʼminlashga intilib;

– insonparvar demokratik huquqiy  davlat barpo etishni koʻzlab;

– fuqarolar tinchligi va milliy totuvligini taʼminlash maqsadida;

– oʻzining muxtor vakillari siymosida Oʻzbekiston Respublikasining mazkur Konstitutsiyasini qabul qiladi.

Oʻzbekiston Respublikasi Konstitutsiyasi muqaddimasidagi ushbu soʻzlarning  oʻziyoq har bir fuqaroda Baxtimiz  Qomusi – Asosiy Qonunimizdan faxrlanish hissini uygʻotadi. Oltita boʻlim, 128 ta moddadan iborat ushbu hujjat inson qadr-qimmatini yuksak tutadi, shu aziz Vatanda emin-erkin yashash, munosib sharoitlarda mehnat qilish, shaxsiy huquqlaridan foydalanish imkoniyatini beradi.

Konstitutsiyamizning VII bob, 24-moddasida "Yashash huquqi har bir insonning uzviy huquqidir. Inson hayotiga suiqasd qilish eng ogʻir jinoyatdir” deb koʻrsatilgan.

Shukrki, mamlakatimizda istiqomat qiluvchi turli millat vakillari ahil-inoqlikda, oʻz yurtining yanada taraqqiy etishi, dunyodagi eng rivojlangan davlatlar qatoridan joy olishi uchun mehnat qilib, tinch-osuda yashamoqdalar. Ular mazkur Qonunimizning 27-moddasida belgilanganiday, "Har kim oʻz shaʼni va obroʻsiga qilingan tajovuzlardan, shaxsiy hayotiga aralashishdan himoyalanish va turar joyi daxlsizligi huquqiga ega.

Hech kim qonun nazarda tutgan hollardan va tartibdan tashqari birovning turar joyiga kirishi, tintuv oʻtkazishi yoki uni koʻzdan kechirishi, yozishmalar va telefonda soʻzlashuvlar sirini oshkor qilishi mumkin emas”.

Shu satrlarning oʻziyoq Oʻzbekistonimizning mustaqil davlat sifatida qabul qilgan Asosiy Qonunida inson huquqlari masalasiga jiddiy eʼtibor qaratilganligini, fuqarolarning asosiy huquqlariga, erkinliklariga va burchlariga alohida eʼtibor berilganini, bularning alohida moddalarda bayon qilinganini koʻramiz.

Inson huquqlari masalasi demokratik huquqiy davlatning muhim belgilaridan boʻlib, u davlatning qay darajada rivojlanganini oʻzida aks ettiradi. Shu maʼnoda olib qaraydigan boʻlsak, bizning Konstitutsiyamizda Qonun ustuvorligi  taʼminlangani va har bir satri fuqarolarimizning baxtiyor hamda farovon yashashiga xizmat qilishi bilan ahamiyatlidir.

Mamlakatimizda mustaqillik yillarida amalga oshirilgan keng koʻlamli oʻzgarishlarning, yangilanish va rivojlanishlarning hal qiluvchi omili shubhasiz, fuqarolarimizning tafakkurida roʻy berayotgan  tub oʻzgarishlar, ularning yon-atrofdagi voqealarga munosabati, daxldorlik hissi, siyosiy faolligi va fuqarolik pozitsiyasi tobora oʻsib borayotganidir. Bunda albatta, baxtimiz Qomusi – Asosiy Qonunimiz muhim oʻrin tutadi.

Bir soʻz bilan aytganda, Konstitutsiyamiz barqarorlik va ijtimoiy taraqqiyotimiz kafolatidir, taraqqiyotni taʼminlovchi inson huquqlari kafolatidir.

Feruza SAPAROVA, huquqshunos.

Foto - OʻzA