EL-YuRTGA MAʼNAVIYaT ULAShIB...

Men bir qancha yillar tuman yoshlar tashkiloti rahbari boʻldim va taʼlim sohasida ham koʻp yillar davomida yoshlar bilan ishlashganman. Qayerda, qanday vazifada ishlasam ham asosiy faoliyatimda kitob muhim oʻrin tutgan. Chunki kitob insonni komillik sari eltuvchi, maʼnaviyatimizni yuksaltiruvchi yagona vositadir. U bilimlar bulogʻi sanaladi.

Men hozir nafaqadaman. Lekin shahrimizdagi kitob doʻkoniga tez-tez borib, yangi kitoblar bilan tanishib, oʻzimga kerakli kitoblarni hamisha shu yerdan olib, oʻqib turaman. Dastlab bu dargohda Ozodboy Davlatov sidqidildan xizmat qilgan. Hozirgi kunda esa Ozodboyning oʻgʻli Rustambek Davlatov ana shu dargohga rahbarlik qilmoqda. Rustambek oʻzi yosh boʻlishiga qaramay, turmush oʻrtogʻi Nafisa Xolmurodova, shuningdek opalari Raʼno, Rayhon, Ravshanoy Davlatovalarni ish bilan taʼminlab, yaxshi ish sharoiti yaratib bergan. Ular doʻkonga kelgan har bir xaridorni ochiq koʻngillik bilan kutib oladilar, xaridorlarga kerak boʻlgan kitoblarni topib berib, ularni xursand qilib yuboradilar. Doʻkon xaridorlarning talablarini toʻlaqonli qondira  oladi. Ular uchun barcha sharoitlar yaratilgan. Jumladan, savdo naqd pulga, plastik kartochkalarga va pul oʻtkazish yoʻli bilan ham amalga oshiriladi.

Bu yerda barcha sohalarga oid kitoblar, hattoki yurtimizda chop etilayotgan gazeta-jurnallargacha topiladi.

Xususan, Abu Ali Ibn Sinoning "Tib qonunlari” kitobi, "Dard borki – shifo bor” risolasi, shuningdek xalq tabobatiga oid nashrlar ham mavjudki, bularning  barchasi har bir xaridorga manzur.

Yana shuni ham aytish kerakki, bu yerda buyuk davlat arbobi, Oʻzbekiston Respublikasining Birinchi Prezidenti I.A.Karimovning barcha kitoblari mavjud.

Doʻkonda yuqoridagi aytib oʻtilgan  afzalliklardan tashqari, oʻquvchilar uchun kerak boʻlgan barcha oʻquv qurollari ham topiladi.

Xudoyberdi Toʻxtaboyevning "Sariq devni minib”, "Mungli koʻzlar”, "Oltin bosh”, Said Ahmadning "Ufq”, "Qismat”, "Dunyo” kabi asarlari alohida eʼtiborni tortadi.

Dono xalqimiz kitobdan yaqinroq doʻst yoʻq, deb bejiz aytmagan. Hatto kitob va kitobxonlik haqida koʻplab rivoyatlar yaratilgan. Ibrat maʼnosida quyidagi rivoyatni keltirib oʻtsam: Bir ota donishmanddan: "farzandimning quvonchi uchun nima qilishim kerak”, deb soʻrabdi. Shunda donishmand: "tulpor mindirsangiz, bir oy quvonadi, agar qand bersangiz, bir kun quvonadi, oʻyinchoq bersangiz, bir hafta quvonib yuradi. Agar farzandim umr boʻyi quvonsin, desangiz bir qoʻliga non, bir qoʻliga kitob bering. Shunda farzandingiz bir umrga baxtli boʻladi”, degan ekan.

Xalqimiz azaldan kitobni sevib, qadrlab keladi. Kitob doʻkoni xodimlari, xususan, Ozodboy Davlatov va uning oʻgʻli Rustambek Davlatov ham kitobning naqadar qadrli ekanligini bilganidan, uning nechogʻliq insonlarga foydali ekanligini anglaganidan mana shu ezgu ishga qoʻl urgan.

Kitob doʻkoni bugungi kunda ayniqsa, yoshlar bilan gavjum. Chunki yuqorida aytganimizday, agar xaridor oʻzi izlayotgan kitobni doʻkondan topa olmasa, darhol doʻkon xodimlari xaridorning talablarini oʻrganib, qisqa vaqt ichida xaridor izlayotgan kitobni topib berishga intilishadi.

Xalqimizga maʼnaviyat va maʼrifat ulashayotgan Ozodboy Davlatov va uning farzandlariga:

- El-yurtga manzur ezgu ishlaringiz har bir qalbni nurafshon aylasin! – deymiz.

I.ISMOILOV,

mehnat faxriysi.