MUSTAHKAM HAMJIHATLIK NATIJASI

Alijon Nurmonov, Quyi Amudaryo irrigatsiya tizimlari havza boshqarmasi qoshidagi Qoraqalpogʻiston gidrogeologo – meliorativ ekspeditsiyasi Amudaryo meliorativ tizimi boshligʻi:

- Tumanimiz paxtakorlarining joriy yilimiz uchun belgilangan davlatga paxta sotish rejasini ortigʻi bilan ado etganliklari toʻgʻrisidagi xushxabar bizning mehnat jamoamizni ham quvonchga beladi. Chunki erishilgan gʻalabada bizning ham hissamiz ulkan.

Yerlarning meliorativ holatini yaxshilamay turib, undan koʻzlanganiday hosil olishning iloji yoʻq. Shuni inobatga olgan holda keyingi yillarda tumanimiz hududidagi ekin maydonlarining tuproq unumdorligini oshirish borasida muttasil ravishda tizimli ishlar amalga oshirilmoqda. Joriy yilning oʻzida birinchi bosqichda Qilichboy kollektorining 12 kilometri rekonstruktsiya qilinishi natijasida 1520 gektarekin maydonlarining meliorativ holati yaxshilandi.

Shuningdek, Xolimbeg, Qilichboy hududida 34 kilometrdan ziyod, Xorazm viloyati bilan chegara hududda 62 kilometrga yaqin kollektor va zaxkashlarda tiklash-taʼmirlash ishlari amalga oshirildi.

Ikkinchi bosqichda "Shoʻryop” SIUga qarashli hududda 90 kilometrdan ziyod kollektorlarda tiklash-taʼmirlash ishlari olib borilganligi tufayli 3000 gektarerning  unumdorligi ortishiga zamin yaratildi.

Tumanimiz paxtakorlari bunyod etgan yuksak paxta xirmonida amalga  oshirilgan bu tadbirlarning hissasi katta.

Muzaffar Eshchonov, tuman Oʻsimliklarni himoya qilish otryadi boshligʻi:

- Tumanimiz paxtakorlarining erishgan ulkan yutugʻi barcha qatori bizning mehnat jamoamizni ham sevintirdi. Chunki biz ham yil  boshidan beri dehqonlarimizning  ulkan paxta xirmoni bunyod etishdek ezgu maqsadining amalga oshishi uchun hamjihatlikda mehnat qildik.

Maʼlumki, gʻoʻza nihollarini biologik himoya qilish kimyoviy preparatlardan foydalanishdan koʻra arzon va zararsizdir. Keyingi yillarda qishloq xoʻjalik ekinlarini turli zararkunandalardan himoya qilishda faqat biologik usuldan foydalanilayapti.

Joriy yilda bizning biolaboratoriyalarimizda paxtachilik uchun rejadagi 39 mln. 675 000 dona oʻrniga 39 mln. 883 800 dona oltinkoʻz, 127 600 gramm oʻrniga 127 620 grammtrixogramma, 47 mln. 850 000 dona oʻrniga 47 mln. 863 400 dona brakon yetishtirildi. Natijada gʻoʻza nihollari zararkunandalardan ishonchli himoya qilindi.

Jamoamiz aʼzolari yetishtirilgan hosilni yigʻib-terib olishda ham paxtakorlarga mavsum davomida koʻmakdosh boʻlishmoqda. Yaratilgan xirmonda hissamiz borligidan faxrlanamiz.

Yangiboy Yeshmuratov, "Amudaryo - Agromashtrans MTP” MChJ raisi:

- Bir vaqtlar Oʻzbekiston sharoitiga mos paxtaning ertapishar navlari boʻlmagach,  yigʻim-terim mavsumi qish oylarigacha choʻzilar, katta-yu kichik terimga  jalb etilib, mavsum tugaguncha xalqning tinkasi qurib qolardi. Ilm-fan yutuqlari sohaga jalb qilinishi tufayli hozirgi kunda paxtaning ertapishar navlari ekilib, hosil yigʻim-terimi kuzning  iliq kunlaridayoq nihoyasiga yetkazilmoqda. Paxta terimi endi mashaqqatli mehnat emas, balki zavqli, el-yurt birlashib, ezgu niyat yoʻlida qilinadigan bayramona saʼy-harakatga aylandi. Terilgan paxtalar  dala boshida oʻlchab olinib, qabul punktlariga joʻnatiladi. Terimda qatnashayotganlarga issiq ovqat tashkil qilinib, unumli ishlashlariga sharoit yaratilmoqda.

Paxtazorlarimizda bugungiday moʻl hosil yetishtirilishida, koʻzlangan rejaning barvaqt ado etilishida bizning  mehnat jamoamizning ham munosib oʻrni bor. Erta bahorda yerlarni sifatli haydab, ekishga tayyorlashdan to yigʻishtirib olingan hosilni qabul punktlariga  tashishda ham bizning texnikalarimiz dehqonlarga qoʻl-qanot boʻlmoqda. Ekish mavsumida 1715 gektar yer sifatli haydaldi, to shu kunga qadar fermer xoʻjaliklarining texnikalari uchun zarur ehtiyot qismlar yetkazib berildi, ayni kunda ham sakkizta transport traktorlarimiz terib olingan paxtani qabul punktlariga tashishda yaqindan yordam berayapti.

Birlashgan oʻzar, deganlariday tumanimiz xalqining mustahkam  hamjihatligi natijasida bugungi ulkan 32840 tonnalik xirmon yaratildi. Dalalarda xalqimizning rizqini yaratayotgan paxtakorlarimizni, ularga koʻmakdosh boʻlgan barcha hasharchilarni bugungi gʻalaba bilan qutlayman!

Hamro Matyoqubov, tuman IIB YoXB boshligʻi, mayor:

- Yigʻim-terim davrida yongʻin havfining oldini olish alohida ahamiyat kasb etadi. Zero, paxta – bizning milliy boyligimiz, iftixorimiz hisoblanadi. Shuning uchun uni asrashga barcha shart-sharoitlarni ishga solib, yongʻin chiqishining oldini olishga harakat qilayapmiz. Paxta hosilini paxta qabul qilish punktlariga eltishda alohida eʼtibor va masʼuliyat zarur. Traktor tirkamalariga ortilgan paxta ustiga albatta sholcha yoki brezent yopilishi nazorat qilinmoqda. Paxta qabul qilish punktlarida va paxta dalalarida chekish, ochiq olovdan foydalanish hamda paxta hosilini yoʻl chetlarida quritish qatʼiyan man qilinishi soha xodimlariga tushuntirilmoqda.

Tumanimizdagi "Amudaryo paxta tozalash” aktsiyadorlik jamiyati hamda unga qarashli paxta qabul qilish shoxobchalarida paxta hosilini qabul qilishga tayyorgarlik bilan bir qatorda yongʻinning oldini olish  ishlari puxta olib borildi. Jamiyat va unga qarashli shoxobchalar yongʻinga qarshi birlamchi yongʻin oʻchirish vositalari bilan taʼminlandi. "Paxta-2016” yigʻim-terim mavsumiga yordamga kelgan hasharchilarning yashash joylarida yongʻin xavfsizligi choralari koʻrildi.

Hozirgi kunda yuqoridagi tartib-qoidalar toʻgʻrisida suhbatlar oʻtkazilib, yoʻriqnomalar va koʻrsatmalar berilmoqda. Paxta qabul qilish shoxobchalarida koʻngilli yongʻin oʻchirish guruhlari tuzilib, guruh aʼzolariga tegishli vazifalar yuklatildi.

Bizning maqsadimiz dehqonlarimizning peshona  teri, mashaqqatli mehnatlari tufayli yetishtirilgan va yigʻishtirib olingan paxtani yongʻindan asrashdir.

Suhbatdosh Oygul RAJABOVA.