AHOLINING BANDLIGI – EL-YuRT OBODLIGI MEZONI

Aholining ishsiz qatlamini ijtimoiy himoyalash, ularning istak-xohishlari hamda kasbiy malakalarini inobatga olgan holda ish bilan bandligini taʼminlash davlat  ijtimoiy siyosatida muhim oʻrin tutadi. Shu bois, tuman Bandlikka koʻmaklashish markazi tomonidan har yili Bandlik dasturiga muvofiq yangi ish oʻrinlari tashkil etish, markazga murojaat qilgan har bir fuqaroning kasb-kori, layoqatiga mos ish bilan mashgʻul boʻlishlari uchun sharoit yaratish masalasiga alohida eʼtibor qaratiladi.

Xususan, tuman bandlikka koʻmaklashish markazi tomonidan tumanda 2016 yilda  yangi ish oʻrinlarini tashkil etish va aholining bandligini taʼminlash Dasturi boʻyicha 4814 ta yangi ish oʻrinlari yaratish rejalashtirilgan boʻlib, oʻtgan 7 oy davomida 2559 ta  yangi ish oʻrinlari tashkil etildi va bu boradagi reja 100,6 foizga uddalandi. Beshta asosiy yoʻnalish boʻyicha, yaʼni, maqsadli dasturlarga muvofiq tashkil etiladigan ish oʻrinlari, kichik korxona va mikrofirmalarni tashkil etish uchun tijorat  banklari tomonidan ajratiladigan kreditlar hisobidan, yakka tartibdagi tadbirkorlikni rivojlantirish, uy mehnatining  barcha  shakllarini tashkil etish hamda fermer va dehqon xoʻjaliklarini rivojlantirish hisobidan ish oʻrinlari yaratish boʻyicha belgilangan reja ortigʻi bilan bajarildi.

Tumanimizdagi 8 ta kasb-hunar kollejlarini 2015-2016 oʻquv yilida 2652 nafar yoshlar muvaffaqiyatli bitirdilar. Bitiruvchilarni ishga joylashtirish maqsadida toʻrt tomonlama  shartnomalar asosida ular egallagan mutaxassisliklarga mos yoʻnalishdagi korxonalar bilan hamkorlik yoʻlga qoʻyildi va bitiruvchilar 1112 ta korxona, tashkilot va muassasalarda ishlab chiqarish amaliyotlarini oʻtashlari uchun imkoniyatlar yaratib berildi. Natijada kollej bitiruvchilarining 99,9 foizi doimiy ish bilan taʼminlanishdi.

Shuni alohida qayd etish kerakki, oʻtgan 7 oy davomida tuman Bandlikka koʻmaklashish markaziga 795 nafar faol ish qidiruvchi fuqaro murojaat qilgan boʻlsa, shundan 790 nafari markaz tomonidan ishga joylashtirildi, 31 nafar fuqaro kasbga tayyorlash va qayta tayyorlashga, 54 nafari esa jamoat ishlariga jalb qilindi.

Aholining bandligini taʼminlashda boʻsh ish oʻrinlari yarmarkalari muhim ahamiyat kasb etadi. Oʻtgan davr mobaynida 6-marta oʻtkazilgan boʻsh ish oʻrinlari yarmarkalarida 245 ta korxona va tashkilotlardan 743 ta boʻsh ish oʻrinlari taklif etildi. Shunisi eʼtiborga molikki, mazkur taklif qilingan boʻsh ish oʻrinlariga 96 nafar ayol-qizlar, 110 nafar yoshlar oʻz kasbiy yoʻnalishlari boʻyicha ishga joylashdilar.

Aholining bandligini taʼminlash – eng avvalo fuqarolar farovonligi, oila, mahalla, bundan ham muhimi, ona Vatan obodligi masalasidir. Chunki oʻziga maʼqul mashgʻulot bilan band boʻlgan inson hamisha ezgu ishlarga intilib yashaydi: oʻzini, oilasini iqtisodiy baquvvat qilmoq niyatida yashab, mehnat qiladi. Fuqaro oʻz oilasida tinch-xotirjam boʻlsa, oilalar yanada mustahkam, el-yurt obod boʻlib boraveradi.