YuRTNING OBOD MANZILLARI

Mana, 25-yildirki xalqimiz oʻz yurtiga oʻzi beklik qilib, tinch-osuda turmush kechirmoqda.

Mamlakatimizning, shu jumladan, tumanimizning qaysi hududiga bormang, obod va fayzli  koʻchalarni, shinam hovli-joylarni, zamonaviy meʼmoriy uslubda qurilgan infratuzilma obʼektlarini koʻrasiz. Deyarli har bir xonadon ostonasida oʻzimizda ishlab chiqarilgan zamonaviy mashinalar, deyarli har bir  oilaning shaxsiy hovli-joyi, tomorqasi, fayz berib turgan bogʻi, koʻchmas mulki bor.

Yurtdoshlarimiz bunday farovon  va dorilomon kunlarga istiqlol bergan imkonlar tufayli mamlakatimiz oʻz mustaqilligini qoʻliga olgan ilk yillardagi oʻtish davri qiyinchiliklarini hamjihatlikda yengib, erk va ozodlikning qadrini teran anglab, ertagi  kuniga ishonch bilan, sabr va bardosh bilan intilganliklari tufayli yetib keldi.

Shu boisdan-da oʻtayotgan har bir kunimiz yuksalishlarga, rivojlanishlarga boy, har bir kunimiz ezgu niyatlar yoʻlida qilgan mehnatlarimiz samarasidan sururli.

"Choykoʻl” ovulidagilar piru badavlat oilalar haqida gap ketsa, albatta, Amat aka Choʻtboyevning oilasini tilga olishadi.

Xonadon sohibi Amat aka Choʻtboyev 38-yil shu ovuldagi "Choqcha” feldsher-akusherlik punktida feldsher boʻlib ishladi. Qishloq aholisining sogʻligini muhofaza qilish, oilalarda sogʻlom turmush tarzining barqaror boʻlishiga erishish, yosh avlodning ruhan va jismonan sogʻlom boʻlib ulgʻayishi borasida olib borgan fidoyi mehnatlari  nafaqat ovulda, balki butun tumanimizda "Amat doʻxtir” deya tanilishiga sababchi boʻldi.

Otaxon doʻxtir "sogʻlom hayot kechirgan odam kasal boʻlmaydi”, - deya hisoblaydi. Buni eldoshlariga ayni kunda ham  tushuntirishdan charchamaydi, hech kimdan yordamini ayamaydi. Uning oʻz hayotiy falsafasi bor: yaxshilik qilganga yaxshilik qaytadi.

Yoʻl boʻylab mevali, manzarali azim daraxtlar tangadek quyosh nurini oʻtkazmaydigan otaxonning hovlisiga kirib borgan kishi chor-atrofning soʻlimligidan,  qulf urib ochilib turgan anvoyi gullar iforidan, mevasidan shoxlari larzon olma, shaftoli, nashvatilar, tomorqasidagi turli ekinlar hosilini koʻz-koʻz qilib turganidan, beixtiyor inson qoʻli gul ekaniga yana bir bor amin boʻladi.

- Bir vaqtlar oʻz bolamizni oʻylashga, gʻamxoʻrlik qilishga vaqtimiz boʻlmagan. Mustaqillik yillaridagi bunchalik tezkor rivojlanishlarning boisi inson qadr-qimmati yuksalganidan, kelajagimiz egalari, yosh avlodga qaratilayotgan gʻamxoʻrlikning yuqoriligidan, - deydi xayolga berilib otaxon. – Men sobiq ittifoq davrida feldsher boʻlib ishlagan vaqtlarimda paxta terimi, yaganasi davrida  punktimizni oylab yopib, dala ishiga safarbar etishardi. Odamlarning sogʻligiga eʼtiborsizlik shunchalar edi, u paytlar. Shularni oʻylasam, kechagi va bugungi kunimizni solishtirib, qanchalik xoʻrlanganimizni va bugun inson sifatida qadrimiz yuksalganini koʻraman, ilohim bu yorugʻ kunlar abadiy boʻlsin, deb tilayman.

Amat aka Choʻtboyevning ikkala katta farzandlari ham tibbiyot xodimlari. Kichik oʻgʻil Oybek tadbirkor. Doʻkon ochib, hudud aholisiga savdo xizmati koʻrsatayapti. Nevaralar bobo-buvisiga, ota-onasiga yordamchi.

Xonadondagi orastalik, soʻlimlik va toʻkinlikdan, ularning hamjihatlikdagi mehnatlari mahsulidan koʻpchilik oʻrnak olsa, arziydi.

***

Umumiy amaliyot shifokori Zamira Saparova rahbarlik qilayotgan "Qangli” qishloq shifokorlik punktida 5 nafar oliy maʼlumotli shifokorlar, 20 nafar hamshiralar mehnat qilishadi. Tibbiyot muassasasi moslashtirilgan binoda joylashgan boʻlsa-da "Salomatlik-2”loyihasi boʻyicha taʼmirlanib, jihozlangan. Mamlakatimizda aholi sogʻligini muhofaza qilishda eng qulay boʻlgan QVPlarga eʼtibor tobora kuchaytirilayotgani mazkur muassasada ham oʻz ifodasini topgan. Laboratoriya tekshiruv xonasiga ega, tashhis qoʻyish va davolash jihozlari bilan taʼminlangan qishloq shifokorlik punktida sogʻligida muammo tugʻilgan kishilarning turli tekshiruvlardan oʻtib, davolanib, sogʻayib ketishlari uchun barcha sharoitlar bor.

***

"Bosuv” mahallasida qad rostlagan xizmat koʻrsatish obʼekti – "Ismoil ota” toʻyxonasini koʻrgan kishining qishloq joylarda ham shaharlardagidan qolishmaydigan koʻrkam va ulkan zamonaviy uslubda qurilgan binoga hayrati va havasi kelishi shubhasiz. Bu binoda mahalla, hatto yondosh mahalla va ovullar aholisi turli marosimlarini, toʻylarini oʻtkazishyapti. "Ismoil ota toʻyxonasi” oilaviy korxonasi tomonidan qurilib, ishga tushirilgan binoda aholiga koʻpgina qulayliklar ham mavjud. Jumladan, fotosalon, oziq-ovqat mahsulotlari doʻkoni xizmatidan hudud aholisi juda minnatdor. Shuningdek suratga olish, non yopishni oʻrganishni istagan yoshlar kasbga oʻrgatilayapti.

- Yaqin kunlar ichida toʻyxonamizning bir xonasida goʻzallik salonini ham ochishni rejalashtirayapmiz. Bu bilan ham mahallamizning hunarli qizlari ish bilan taʼminlanadi, ham goʻzallik saloniga borish istagida boʻlganlar necha chaqirimlab yoʻl bosib, tuman markaziga qatnashmaydi, - deydi oilaviy korxona rahbari Zamira Xolboyeva.

Tabiatan yangilikka intiluvchan Zamiraning faoliyati yaqinda "Mahallaning eng namunali tadbirkor ayoli – 2016”tanlovining tuman bosqichida "Servis sohasida mahallaning eng namunali tadbirkor ayoli” nominatsiyasi boʻyicha ikkinchi oʻringa loyiq topildi va oʻz biznesini rivojlantirish uchun imtiyozli kredit olish sertifikatiga ega boʻldi.

***

Kapital rekonstruktsiya qilinib, zamonaviy qiyofa kasb etgan "Uyshin” madaniyat va aholi dam olish markazi ayni kunda hudud aholisining eng sevimli maskaniga aylangan.

Markaz direktori Palzada Ubbiniyozova va toʻrt nafar ijodiy xodimlar saʼy-harakatlari bilan qoʻshnay, raqs, rassomchilik toʻgaraklari aʼzolari va hudud aholisi  ishtirokida turli sanalar munosabati bilan oʻtkazilayotgan ijodiy kechalar, tadbirlar katta-yu kichik uchun birday qiziqarli  boʻlayapti. Ayniqsa, kunduzi  turli sohalarda ishlaydigan kishilar uchun kechqurunlari toʻgarak aʼzolari ijrosida namoyish etilayotgan kontsert dasturlari maroqli dam olish soatlariga aylanmoqda.

- Oʻtkazilayotgan tadbirlarimiz davomida odamlarning maʼnaviy oziq olishga nechogʻlik ehtiyoji kuchli ekanligini koʻrib, oʻz ishimizdan mamnun boʻlib ketamiz. Toʻgʻri, hozir televizor hamma xonadonlarda  bor. Internet orqali dunyoning istalgan nuqtasidagi yangiliklardan xabardor boʻla oladi. Biroq sahnada, jonli ijroda namoyish etilgan kichik-kichik sahnali koʻrinishlar ham odamlarga koʻproq oziq beradi, taʼsirchan boʻladi, - deydi Palzada Ubbiniyozova.

Markazda toʻgaraklar muntazam va samarali faoliyat yuritayotganligi tufayli qatnashchi oʻgʻil-qizlar koʻpgina yutuqlarga erishmoqdalar. Sherxon Oʻtamurodov, Diyorbek Abdullayev, Diyorbek Omonboyev, Oʻtkir Norboyevlar oʻquvchi yoshlar orasidagi turli koʻrik-tanlovda qatnashib, faxrli oʻrinlarni egallab kelishayapti.

***

"Qipchoq” ovulidagi 20-sonli maktabgacha taʼlim muassasasida ovul aholisining 35 nafar kichkintoylari taʼlim-tarbiya olishmoqda. Bugungi kun talablari darajasida jihozlangan, ulkan-ulkan daraxtlar soya-salqinida joylashgan bu soʻlim maskanga bolalar har kuni ertalab oshiqib, talpinib kelishadi.

***

Mamlakatimizda har bir oilaning oʻz imkoniyatlariga yarasha foydali  mehnat bilan shugʻullanib, oilasining iqtisodini yuksaltirishlari, toʻq va farovon turmush kechirishlari uchun barcha imkoniyatlar bor. Chunki oilalar obod boʻlsa, mamlakat obod boʻladi.

"Qoʻmyop” mahallasida istiqomat qiluvchi Komil Sultonov 2003-yilda "Qangli” davlat xoʻjaligining chorvachilik fermasini xususiylashtirib olgan edi.

Hozir mazkur fermada 155 bosh qoramol, 100 bosh qoʻy – echki, 10 bosh zotdor otlar boqilayapti. Hudud aholisining 12 nafari ish bilan taʼminlangan fermada keyingi yillarda nasldor qoramollar keltirilganligi, qoramollarning naslini yaxshilashga jiddiy eʼtibor qaratilayotganligi tufayli chorvachilik mahsulotlari yetishtirish tobora koʻpaytirilayapti.

- Kuniga 150 litrdan ziyod sut  sogʻib olib, yurtdoshlarimiz dasturxoniga tortiq qilayapmiz. Shuningdek, oʻtgan yili 1,5 tonna goʻsht yetishtirdik. Chorvachilik – koni foyda soha. Olinayotgan daromad hisobidan ishchilarimizning ish haqi oyma-oy berib borilayapti, xoʻjaligimizga zarur texnikalar sotib olayapmiz, - deydi ferma mudiri Komil Sultonov.

Mamlakatimizda oziq-ovqat  mahsulotlari yetishtirishni koʻpaytirishga baholi qudrat hissa qoʻshayotgan ferma chorvadorlarining mehnatlari samarasi oʻzlarining turmushini ham farovon qilayapti.

Tumanimizning qaysi bir xonadonida boʻlsak ham yurtdoshlarimiz hayotining obod, farovonligini oʻz koʻzimiz bilan koʻrishimiz mumkin. Xalqimizni ana shunday nurli manzillarga yetkazgan istiqlolimiz abadiy boʻlsin!

Oygul RAJABOVA, Mahmudjon ShOMURODOV,

gazetaning maxsus muxbirlari.