BETAKRORIM MENING, AZIZ VATANIM!

Har yili mustaqillik tadbirlarini oʻtkazishdagi ramziy shior barcha yurtdoshlarimizning qalbida aks-sado beradi. Eng ulugʻ, eng aziz bayramning qutlugʻ 25 yilligi arafasidagi «Goʻzal va betakrorimsan, muqaddas Vatanim, jonim senga fido, Oʻzbekistonim!» ezgu shiori ham teran mazmunga ega. Unda ifodalangan soʻzlar bizni fidoyilikka, vatanparvarlikka undab turadi.

Bu yil qutlugʻ bayramga tayyorgarlik oʻzgacha. Odamlarimizning kayfiyati chogʻ, ularning yuz-koʻzlarida xursandchilik, bayram ruhi sezilib turibdi. Mahalladoshlar bilan suhbatlashar ekanmiz, kimdir tomorqadan katta daromad olayotgani, yana kimdir tadbirkorlarga yaratilayotgan shart-sharoitlardan unumli foydalanib, roʻzgʻori but, koʻngli xotirjam ekanini aytadi. Yana kimdir oʻgʻli chet elda tahsil olayotgani, yana kimdir qizi davlat granti asosida oliy oʻquv yurtiga oʻqishga kirgani, kimdir farzandi sport sohasida xalqaro miqyosda katta yutuqqa erishganini aytib, faxrlanadi. Xullas, muvaffaqiyatga erishmagan oilaning oʻzi yoʻq. Albatta, bunday farovonlik uchun, toʻkin-sochinlik uchun Yaratganga shukrona aytishimiz, shunday yurtda yashash baxti nasib etganidan xursand boʻlishimiz kerak. Shu oʻrinda, jonajon diyorimiz taraqqiyotiga har birimiz munosib hissa qoʻshib yashashimiz kerakligini his qilmogʻimiz darkor. Dono xalqimiz bejizga, toma-toma koʻl boʻlur, demagan. Zotan, Vatanimizning gullab-yashnashi yoʻlidagi birdamligimiz, sobitqadamligimiz, amaliy harakatlarimiz yurtimizning bundan-da yuksak marralarni qoʻlga kiritishiga xizmat qiladi.

Oʻzbekiston – Allohning nazari tushgan yurt, deb aytishadi. Ha, yurtimizda zilol suvlar ariqlarda toʻlib oqadi. Koʻcha yoqalarida soya-salqin solib turgan betakror goʻzal chinor-u gujum, tol-u teraklarimiz, bogʻ-rogʻlarimiz bor.  Har bir xonadonning besh-oʻn sotix  tomorqasi bor. Tomorqaga turfa xil mevali daraxtlar ekilgan. Hovlisida uzum toki bor, uzum toki tagida supasi bor. Supa atrofiga rayhonlar ekilgan. Qizlar, kelinlar hovliga suv sepib, kechki payt butun oila dasturxon atrofida jamul-jam boʻlib choy ichishadi. Gulzordagi rayhon, jambillarning hidi hovlini tutadi. Bundayin toʻkislik faqat va faqat bizning betakror Vatanimizda bor!

Oʻzbekistonda boʻlayotgan buyuk oʻzgarishlar, izchil olib borilayotgan islohotlar, qurilayotgan namunali uylar, hayotimizga qaytgan milliy qadriyatlarimiz, urf-odatlarimiz, toʻkin-sochin toʻylarimiz haqida toʻlib-toshib, faxr bilan  soʻzlaging keladi. Shu barobarida jannatmakon yurtda tugʻilganimizga va yashayotganimizga Allohga shukronalar aytamiz.