VOYaGA YeTMAGANLAR BILAN IShLAShIShDA HAMKORLIK OʻTA MUHIM

Istiqlol yillarida mamlakatimizda yoshlarni har tomonlama komil insonlar qilib voyaga yetkazish, ularning huquq va manfaatlarini himoya qilish davlat siyosatining ustuvor yoʻnalishiga aylandi.

Tuman hokimligi huzuridagi voyaga yetmaganlar ishlari boʻyicha komissiyasi ham shu maqsad yoʻlida faoliyat olib bormoqda.

Tumanda  64 098 nafar voyaga yetmaganlar istiqomat qilayotgan boʻlib, ularning 4 ming nafardan ortigʻi 37 ta maktabgacha taʼlim muassasalarida, 31 ming nafarga yaqini 82 ta umumtaʼlim maktablarida, 8 ming nafardan ortigʻi 8 ta kasb-hunar kollejlari va akademik  litseyda taʼlim-tarbiya olishmoqda.

Yoshlar tarbiyasida qoʻlga kiritilayotgan yutuqlarga qaramasdan, hali ham voyaga yetmaganlar oʻrtasida huquqbuzarlik va jinoyat sodir etish holatlari uchrab turibdi.

Masalan, komissiyaga huquqni muhofaza qiluvchi organlar va boshqa tashkilotlardan 2016 yilning 6 oyi davomida 43 ta holatda voyaga yetmaganlar tomonidan sodir etilgan huquqbuzarliklar toʻgʻrisida maʼlumotlar kelib tushdi. Ushbu maʼlumotlar komissiya tomonidan toʻliq koʻrib chiqildi va 34 nafar voyaga yetmaganlarning ota-onalariga 2,8 million soʻmlikdan ortiq jarima solindi.

Shuningdek, joriy yilning 6 oyi davomida voyaga yetmaganlar tomonidan 4 ta jinoyat sodir qilingan boʻlsa, unda ishtirok etgan oʻsmirlar soni 6 nafarni tashkil etadi. Bu koʻrsatkich oʻtgan yilning shu davriga nisbatan 2 ta jinoyatga oshib ketganligi achinarli hol.

Voyaga yetmaganlar oʻrtasida bunday noxush holatlar yuz berishining oldini olish maqsadida tuman hududidagi turli xil koʻngil ochish joylarida ishchi guruhlar tomonidan 12 marotaba reydlar oʻtkazildi va reydlar davomida 3 ta salbiy holat aniqlanib, bunday joylarga keluvchi voyaga yetmaganlarga tarbiyaviy taʼsirlar oʻtkazish choralari koʻrildi.

Ota-ona, taʼlim muassasasi maʼmuriyati va boshqa masʼullarning loqaydligi oqibatida 2016 yilning oʻtgan 6 oyi davomida 120 nafar voyaga yetmaganlar tomonidan har xil mazmundagi huquqbuzarliklar sodir etilgan.

Shuni alohida qayd etish joizki, tumanimizda voyaga yetmaganlarning boʻsh vaqtlarini mazmunli oʻtkazishlari uchun koʻngildagidek shart-sharoitlar yaratilgan. Birgina "Barkamol avlod” bolalar markazida 20 ta toʻgarak tashkil etilgan boʻlib, bu toʻgaraklarda oʻsmir-yoshlar oʻzlari qiziqqan yoʻnalishlar boʻyicha iqtidorlarini namoyon etishlari mumkin. Bolalarning boʻsh vaqtlarini mazmunli oʻtkazishlari uchun xizmat qiluvchi bunday toʻgaraklar tumanimiz hududidagi barcha ovul va mahallalarda tashkil etilgan boʻlib, ularga 19604 nafar voyaga yetmaganlar jalb etilgan.

Bolalarning sport bilan shugʻullanishlari, salomatliklarini mustahkamlashlari uchun tumanimizning barcha hududlarida, kasb-hunar kollejlari va umumtaʼlim maktablarida, shuningdek, mahallalarda sport-sogʻlomlashtirish inshootlari faoliyat yuritmoqda. Demak, voyaga yetmaganlarning boʻsh vaqtlarini mazmunli oʻtkazishlari uchun yaratib berilgan sharoitlar, imkoniyatlar oʻsmir-yoshlarning  har jihatdan yetuk va barkamol inson sifatida shakllanishlari uchun yetarli. Faqat bu borada ota-onalar, oʻquv maskanlari mutasaddilari hamda fuqarolarning oʻzini-oʻzi boshqarish organlaridagi masʼul xodimlar birozgina fidoyilik qilishlari talab qilinadi. Zero, farzandlarimiz bizning kelajagimizdir.

Samad DILMANOV,

tuman hokimligi huzuridagi voyaga yetmaganlar ishlari boʻyicha komissiyasi kotibi.

(Foto - http://siyosat.uz)