BIZ SOGʻLOM OILA TARAFDORIMIZ

Yurtboshimizning "Qiz bolani kollejni bitirmasdan, hunar egallamasidan kimki turmushga bermoqchi boʻlsa, bilib qoʻyinglar, men bunga mutlaqo qarshiman. Qiz bola avvalo, kasb egallasin, oʻz fikriga ega boʻlsin, hayotni anglasin, shundan keyin u hayotda oʻz oʻrnini topadi, yoʻlini yoʻqotmaydi”, - deya aytgan soʻzlari, shu yurtdagi har bir qizning  taqdirini, ertangi kelajagini oʻylab qaygʻurayotganligi har bir ota-ona yelkasidagi masʼuliyat hissini yanada kuchaytirdi, desam mubolagʻa boʻlmaydi.

Ayniqsa, biz qizlar Prezidentimizning yuksak eʼtiboridan minnatdormiz. Ammo, hech birimizga sir emaski, hali voyaga yetmasdan turib oila atalmish muqaddas qoʻrgʻonga qadam qoʻygan yoshlar ham uchrab turadi. Na qoʻlida kasb-u kori bor, na hayotning past-u balandini anglab yetmagan yoki jismonan shakllanmagan yoshlarning oʻylamay qilgan bunday xatti-harakati bugun butun xalqimizni tashvishga solmoqda. Achinarlisi, erta turmush qurgan bu yoshlar oʻrtasida turmushning "mushti”ga chidamay, ajralib ketish holatlari juda koʻp uchramoqda. Yoki boʻlmasa, jismonan voyaga yetmagan qizlarning nosogʻlom farzandlarni dunyoga keltirishi butun jamiyat hayotiga salbiy taʼsir koʻrsatmoqda. Axir oila – muqaddas, u ajralish uchun qurilmaydi. Qachonki oilalar tinch, mustahkam boʻlsa, Vatan ravnaq topadi. Nosogʻlom farzandlar yurtga hech qanday naf keltirmaydi. Axir har bir ota-onaning vazifasi aqlan va jismonan sogʻlom kelajak vorislarini tarbiyalash emasmi? Farzandlari sogʻlom yurt qudratli boʻladi, qudratli yurt nasli esa hamisha sogʻlom boʻlmogʻi lozim. Shu sabab qiz bolalarning oʻqib, bilim egallashlari, kasb-hunarli boʻlishlari uchun, ular oʻrtasida erta turmushning oldini olish maqsadida bizning Mangʻit Iqtisodiyot kollejimizda ham "Biz sogʻlom turmush, sogʻlom oila tarafdorimiz” shiori ostida koʻpgina ishlar amalga oshirilmoqda. Jumladan, kollej xotin-qizlar qoʻmitasi raisasi M.Polvonova, "Orasta qizlar” toʻgaragi raisasi M.Yusupova va toʻgarak aʼzosi N.Tajimurodova hamda kollej rahbariyati tomonidan turli seminar-treninglar oʻtkazilib, qizlar oʻrtasida tushuntirish ishlari olib borilmoqda, qolaversa, kollej oʻquvchilarining ota-onalari, mahalla qoʻmitalari, voyaga yetmaganlar bilan ishlashish komissiyasi vakillari hamda tuman tibbiyot birlashmasi shifokorlari bilan hamkorlikda targʻibot-tashviqot ishlari yaxshi yoʻlga qoʻyilgan.

Feruza YOʻLDOShEVA,

Mangʻit Iqtisodiyot kolleji oʻquvchisi.

(Foto - http://zarnews.uz)