Xalq deputatlari Amudaryo tuman Kengashining oʻn oltinchi sessiyasi toʻgʻrisida AXBOROT

2016-yil 2 mart kuni xalq deputatlari Amudaryo tuman Kengashining oʻn oltinchi sessiyasi oʻtkazildi. 

Sessiyaga xalq deputatlari Amudaryo tuman Kengashi Reglamentining 16-moddasiga muvofiq tuman hokimi topshirigʻiga binoan R.Roʻzmetov raislik qildi.

Sessiyaga tuman Kengashi deputatlari, hokim oʻrinbosarlari, hokimlik masʼul xodimlari, huquq-tartibot organlari, jamoat tashkilotlari, hokimlik boʻlimlari, tijorat banklari boshqaruvchilari, taʼminotchi va xizmat koʻrsatuvchi tashkilotlar, muqobil mashina-traktor parklari rahbarlari, ovul va ular tarkibidagi mahalla fuqarolar yigʻinlari raislari, fermer xoʻjaliklari rahbarlari hamda ommaviy axborot vositalari vakillari taklif qilindi.

Shuningdek, sessiya ishida Qoraqalpogʻiston Respublikasi Vazirlar Kengashi raisi B.Yangiboyev va Qoraqalpogʻiston Respublikasi prokurori I.Polvanovlar ishtirok qildilar.

Sessiya kotibligiga 18-Xitoy saylov okrugidan deputat G.Bobojanov saylandi.

Sessiya kun tartibiga "2016-yil hosili uchun ekilgan gʻalla maydonlarida olib borilishi lozim boʻlgan agrotexnik tadbirlar, shuningdek "qoloq” fermer xoʻjaliklari bilan birma-bir ishlashish tizimini yoʻlga qoʻyish, mavjud kamchiliklarni bartaraf qilish hamda  chigit ekish mavsumiga puxta tayyorgarlik koʻrish toʻgʻrisida”gi masala kiritildi.

Sessiya avvalida deputatlar, fermerlar Kengashi va soha mutaxassislari bilan birgalikda tumanda 2016-yil hosili uchun ekilgan gʻalla maydonlarining ahvoli, mavjud kamchiliklar hamda chigit ekish mavsumiga tayyorgarlik koʻrish ishlarining borishi boʻyicha tayyorlangan video lavha namoyish qilindi.

Soʻngra, kun tartibidagi masala boʻyicha tuman hokimining oʻrinbosari, tuman qishloq va suv xoʻjaligi boʻlimi boshligʻi A.Yuldashev, tuman prokurori F.Allamberganov va tuman ichki ishlar boʻlimi boshligʻi A.Orinbayevlar soʻzga chiqishib, tegishli hududlarda 2016 yil hosili uchun ekilgan gʻalla maydonlarida olib borilishi lozim boʻlgan agrotexnik tadbirlar, shuningdek "qoloq” fermer xoʻjaliklari bilan birma-bir ishlashish tizimini yoʻlga qoʻyish, mavjud kamchiliklarni bartaraf qilish hamda  chigit ekish mavsumiga puxta tayyorgarlik koʻrish boʻyicha amalga oshirilayotgan ishlar toʻgʻrisida hisobot berdilar.

Kun tartibidagi masala yuzasidan Qoraqalpogʻiston Respublikasi Vazirlar Kengashi Raisi B.Yangiboyev, Qoraqalpogʻiston Respublikasi prokurori I.Polvanov va tuman fermerlar Kengashi raisi O.Qurboniyozovlar soʻzga chiqishib, shu kunlarda qishloq xoʻjaligida amalga oshirilishi lozim boʻlgan masalalar xususida toʻxtalib oʻtdilar. Kun tartibiga kiritilgan masala boʻyicha tegishli qaror qabul qilindi va shuning bilan sessiya oʻz ishini yakunladi.

Tuman hokimligining axborot xizmati.