HAMKORLIK – YaXShI NATIJALAR MEZONI

Tumanimizdagi 55-sonli umumtaʼlim maktabida oila – mahalla – maktab hamkorligida davra suhbati boʻlib oʻtdi.

Yigʻilishga Oybek nomli mahalla fuqarolar yigʻini raisi Oʻrazimbat aka Saʼdullayev, diniy maʼrifat va maʼnaviy-axloqiy tarbiya masalalari boʻyicha maslahatchi Momojon opa Rahimova, maktabning maʼnaviyat va maʼrifat ishlari boʻyicha direktor oʻrinbosari Nurbek Oʻrozboyev, maktab ruhshunosi Gulxan Oʻrazmetova, boshlangʻich xotin-qizlar tashkiloti raisi Omongul Adilboyeva hamda ota-onalar qatnashdilar.

Yigʻilishda yoshlar, ayniqsa oʻsmirlar oʻrtasida sodir etilayotgan jinoyatchilikning oldini olish  hamda oʻquvchilarni turli yot gʻoyalar taʼsiridan asrash, internet tarmogʻi va qoʻl telefonidan foydalanish madaniyati xususida Oybek nomli mahalla fuqarolar yigʻini raisi Oʻrozimbat aka Saʼdullayev maʼruza qildi va ota-onalarni hushyorlikka, ogohlikka, farzand tarbiyasiga masʼuliyat bilan qarashga daʼvat etdi.

Momojon Rahimova esa 2015-yilda tumanimizda oʻsmirlar oʻrtasida sodir etilayotgan jinoyatlar va huquqbuzarliklar haqida gapirib, ota-onalarni farzandlari tarbiyasiga eʼtiborli boʻlishga chaqirdi.

Maktab ruhshunosi Gulxan Oʻrazmetova oʻquvchilarni 12-yillik taʼlimga jalb etish, tumanimizdagi akademik litsey va kollejlardagi imkoniyatlar hamda 12-yillik majburiy taʼlimning  huquqiy asoslari toʻgʻrisida keng tushunchalar berdi.

Boshlangʻich xotin-qizlar tashkiloti raisi O.Adilboyeva maktab ichki tartib-qoidalari, oʻquvchi intizomi, davomati va tozalik haqida gapirib, ogohlik – davr talabi ekanligini, maktab – oila – mahalla hamkorligida qilinadigan ishlarga masʼuliyat bilan yondashish zarurligini taʼkidladi.

Oʻquvchilarni toʻgaraklarga jalb etish va ularning natijalari haqida Nurbek Oʻrozboyev ota-onalarga maʼlumot berdi. Yigʻilishda ishtirok etgan ota-onalar oʻz farzandlari taqdiriga, kelajagiga yanada masʼuliyat bilan yondashish zarurligini yana bir bor anglashdi.

Zuhra AHMEDOVA.

(Foto - http://huquqburch.uz)