2015-yilda Amudaryo tumanini ijtimoiy-iqtisodiy rivojlantirish yakunlari va 2016-yilga moʻljallangan ijtimoiy-iqtisodiy dasturning eng muhim ustuvor yoʻnalishlari toʻgʻrisida

Xalq deputatlari Amudaryo tuman Kengashining 14-sessiyasida tuman hokimining birinchi oʻrinbosari B.Ernazarovning hisoboti

Istiqlol yillarida mamlakatimizda "Kuchli davlatdan kuchli fuqarolik jamiyati sari” tamoyili izchil amalga oshirilmoqda. Bu borada qator yangi qonunlar qabul qilinib, mavjud qonunchilikka oʻzgartish hamda qoʻshimchalar kiritilmoqda.

Maʼlumki, 2014-yilda Konstitutsiyamizning 103-moddasiga oʻzgartish va qoʻshimchalar kiritilib, unga muvofiq, viloyat, tuman va shahar hokimi tegishli xalq deputatlari Kengashiga viloyat, tuman, shahar ijtimoiy-iqtisodiy rivojlanishining eng muhim hamda dolzarb masalalari yuzasidan hisobotlar taqdim etishi, ular boʻyicha xalq deputatlari Kengashi tomonidan tegishli qarorlar qabul qilinishi belgilangan edi. 2015-yil 10-iyundan kuchga kirgan "Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish, shuningdek ayrim qonun hujjatlarini oʻz kuchini yoʻqotgan deb topish toʻgʻrisida”gi Oʻzbekiston Respublikasining Qonuni bilan Oʻzbekiston Respublikasining 1993-yil 2 sentyabrda qabul qilingan "Mahalliy davlat hokimiyati toʻgʻrisida”gi Qonuniga yangi 251-modda qoʻshilib, unga koʻra hokimning viloyat, tuman, shahar ijtimoiy-iqtisodiy rivojlanishining eng muhim va dolzarb masalalari yuzasidan hisobotini xalq deputatlari Kengashi tomonidan eshitish amaliyoti joriy qilindi.

Aytish kerakki, bu oʻzgarishlar davlat hokimiyati va boshqaruvini takomillashtirish hamda yanada demokratlashtirish, mahalliy hokimiyat organlari faoliyatining shaffofligini kafolatlash, deputatlik nazorati institutini mustahkamlash, partiyalararo raqobatni kuchaytirishda muhim ahamiyat kasb etib, mahalliy Kengashlarning hududlarni ijtimoiy-iqtisodiy rivojlantirishdagi rolini yanada oshiradi va ijro organlarining masʼuliyatini kuchaytiradi.

Oʻtgan 2015 yil nafaqat mamlakatimiz, balki tumanimiz uchun ham odamlarimizning munosib hayot darajasi va sifatini taʼminlash, avvalo muhim islohotlarni, koʻzlagan rejalaramizni amalga oshirish yoʻlida katta burilishlar yasagan yil boʻldi.

Olib borilgan ishlar natijasida 2015-yilda tumandasanoat mahsulotlarini ishlab chiqarish hajmi 122,7 mlrd. soʻmni tashkil qilib, oʻtgan yilga nisbatan oʻsish surʼati 116,7 foizga, shundan hududiy sanoat korxonalarining ishlab chiqarish hajmi 57,0 mlrd. soʻmni tashkil qilib, oʻsish surʼati 109,9 foizga, xalq isteʼmol mollarini ishlab chiqarish hajmi 43,2 mlrd. soʻmni tashkil qilib, oʻsish surʼati 102,6 foizga, qishloq xoʻjaligi mahsulotlarini ishlab chiqarishhajmi 189,5 mlrd. soʻmni tashkil qilib, oʻsish surʼati 109,6 foizga, kapital qoʻyilmalar hajmi 58,6 mlrd. soʻmni tashkil qilib, oʻsish surʼati 102,4 foizga, qurilish ishlari hajmi 56,8 mlrd. soʻmni tashkil qilib, oʻsish surʼati 100,4 foizga yetdi.

2015-yilda tuman maqsadli dasturlari ijrosi boʻyicha jami 12 mlrd. 407 mln. soʻmlik 183 ta loyiha amalga oshirilib, 632 ta yangi ish oʻrinlari yaratildi, ularga esa 5 mlrd. 964 mln. soʻm tijorat banklari kreditlari ajratildi.

2015-yil uchun ishlab chiqilib, tasdiqlangan Sanoat salohiyatini rivojlantirish Dasturiga jami qiymati 3 mlrd. 221 mln. soʻmlik 14 ta loyiha kiritilib, ulardan 10 tasi qurilish yoʻnalishi boʻyicha (qiymati 2 640,0 mln. soʻm), 4 tasi yengil sanoat hamda boshqa yoʻnalishlar boʻyicha (qiymati 581,0 mln. soʻm) loyihalar edi. Ularda yil davomida jami 198 ta yangi ish oʻrinlarini yaratish belgilab olingan edi, amalda dastur ijrosi 100 foizga toʻliq bajarilib, 202 ta yangi ish oʻrinlari yaratildi.

Mazkur loyihalarga jami 2 mlrd. 502,0 mln. soʻmlik investitsiyalar kiritilib, shundan tijorat banklari mablagʻlari 1 mlrd. 640,0 mln. soʻmni, loyiha tashabbuskorlarining oʻz mablagʻlari esa 862,0 mln. soʻmni tashkil qildi.

Tumanda 2015yil yakunida harakatdagi baholarda 112,7 mlrd. soʻmlik mahsulot ishlab chiqarilib, 2014-yilga nisbatan (solishtirma narxlarda) oʻsish surʼati 116,7 foizni tashkil etdi.

2015-yilda xizmat koʻrsatish va servis sohasida jami 7 mlrd. 228 mln. soʻmlik investitsiyalarni jalb qilish hisobidan 112 ta loyihani amalga oshirish hamda 233 ta yangi ish oʻrinlari tashkil etish rejalashtirilib, amalda yil yakuni bilan xizmat koʻrsatish va servis yoʻnalishida umumiy qiymati 7 mlrd. 266 mln. soʻm miqdorida jami 112 ta loyihalar amalga oshirildi va 236 ta yangi ish oʻrinlari yaratilib, umumiy Dasturning yillik ijrosi toʻliq bajarildi.

Jumladan, 1 ta mini futbol maydonchasi qurib bitkazildi, 1 ta uyali aloqa xizmatiga toʻlovlarni qabul qilish shoxobchasi, 40 ta savdo doʻkoni, 19 ta umumiy ovqatlanish shoxobchasi, 1 ta moliya xizmati koʻrsatish markazi, 1 ta novvoyxona, 5 ta sartaroshxona, 3 ta dorixona, 3 ta kiyim tikish va taʼmirlash ustaxonasi, 1 ta poyabzal tikish va taʼmirlash ustaxonasi, 1 ta tegirmonda donni maydalash, 11 ta avtomobillarga texnik xizmat koʻrsatish shoxobchalari, 2 ta avtomobillarga yonilgʻi quyish shoxobchasi va 5 ta boshqa maishiy xizmat koʻrsatish shoxobchalari ishga tushirildi.

Ushbu shoxobchalarni tashkil qilish jarayonida tijorat banklari tomonidan 2 mlrd. 551 mln. soʻmlik kreditlar ajratildi.

Mazkur loyihalar tomonidan ushbu davrda 315,9 mln. soʻmlik xizmatlar koʻrsatildi.

Oziq-ovqat dasturiga 2015 yilda jami qiymati 2 mlrd. 692 mln. soʻmlik 57 ta loyiha kiritilib, shundan qoramolchilik yoʻnalishida 2 mlrd. 329 mln. soʻmlik 38 ta loyiha, parrandachilik yoʻnalishida 65,0 mln. soʻmlik 1 ta loyiha, baliqchilik yoʻnalishida 204,0 mln. soʻmlik 10 ta loyiha va asalarichilik yoʻnalishida 94,0 mln. soʻmlik 8 ta loyihalar kiritilgan edi.

Ushbu loyihalarni amalga oshirish natijasida 571 bosh qoramol, 3000 ta parranda olib kelish, 80 ta asalari uyalari va 28,4 gektar sunʼiy suv havzalarida baliq boqishni tashkil qilish va ularda jami 194 ta ish oʻrinlari yaratish rejalashtirilib, amalda dastur ijrosi toʻliq taʼminlandi.

Shular qatorida bugungi kunda tumanda iqtisodiyotning barcha tarmoqlarida faoliyat koʻrsatib kelayotgan korxona va tashkilotlarning mavjud debitor va kreditor qarzdorliklarini qisqartirish borasida amalga oshirayotgan ishlarga ham toʻxtalib oʻtmoqchiman.

Joriy 2016 yilning 1-yanvar holatiga qishloq xoʻjaligi korxonalarining xizmat koʻrsatuvchi va taʼminotchi korxonalardan jami qarzdorligi 7 mlrd. 643,4 mln. soʻmni tashkil qiladi.

Jumladan, qishloq xoʻjaligi korxonalarining neft mahsulotlaridan 3 mlrd. 224,4 mln. soʻm, "Qishloqxoʻjalikkimyo” HAJdan 3 mlrd. 278,2 mln. soʻm, elektr taʼminoti korxonasidan 361,5 mln. soʻm, mashina-traktor parklaridan 110,5 mln. soʻm, "Amudaryo Agrotexservis MTP” DAJdan 22,6 mln. soʻm, oʻsimliklarni himoya qilish otryadidan 323,4 mln. soʻm, "Oʻzqishloqxoʻjalikmashlizing” AJdan 322,8 mln.soʻm qarzdorligi mavjud boʻlib, 2015-yilning 1-yanvar holatiga nisbatan mavjud qarzdorlik 355,6 mln. soʻmga kamaytirilgan.

Oʻzbekiston Respublikasi Vazirlar Mahkamasi topshiriqlari asosida harakatdagi fermer xoʻjaliklarining xizmat koʻrsatuvchi va taʼminotchi tashkilotlardan debitor va kreditor qarzdorliklarini kamaytirish yuzasidan tuman ishchi guruhi tashkil qilindi va ish olib bormoqda.

Shuningdek, kommunal sohada isteʼmolchilarning taʼminotchi korxonalar oldidagi qarzdorligini kamaytirish boʻyicha ham muayyan ishlar olib borilmoqda. Amudaryo tuman elektr taʼminoti korxonasi 2015-yilda isteʼmolchilarga 16 551,6 mln. soʻmlik elektr energiyasi yetkazib bergan boʻlib, jami 16 605,6 mln. soʻm miqdorida toʻlovlar undirilgan.

Oʻtgan yil davomida 2113 ta xonadon foydalangan elektr energiyasidan 880 mln. 378 ming soʻm, 410 ta ulgurji isteʼmolchi 780 mln. 330 ming soʻm, 1703 ta maishiy isteʼmolchi 100 mln. 48 ming soʻm qarzdorligi sababli elektr tarmogʻidan ajratilgan.

2015-yil davomida aholiga 7 623,0 mln soʻm, ulgurji isteʼmolchilariga 1 473,9 mln. soʻm, jami 9 096,9 mln. soʻmlik tabiiy gaz yetkazib berildi. Isteʼmolchilardan jami 9 740,9 mln. soʻm miqdorida toʻlovlar undirilgan.

Oʻtgan yil davomida 3504 ta xonadon tabiiy gazdan jami 747,1 mln. soʻm miqdorida qarzdorligi sababli gaz tarmoqlaridan ajratilgan, shundan yil davomida qarzdorligi qayta hisob-kitob qilingan 2887 ta xonadondan jami 582,87 mln. soʻm undirilib, tabiiy gaz tarmoqlariga qayta ulandi. 499 ta isteʼmolchilardan mavjud 290,47 mln. soʻm miqdoridagi qarzdorlikni undirish uchun sud va notarial idoralariga murojaat qilinib, 470 ta isteʼmolchilardan 264,8 mln. soʻm qarz undirilishiga erishildi.

2015-yilda tuman boʻyicha isteʼmolchilarga jami 528,3 mln. soʻmlik, jumladan, aholiga 424,3 mln. soʻm, ulgurji isteʼmolchilarga 104 mln. soʻm miqdorida ichimlik suvi yetkazib berildi. Isteʼmolchilardan jami 633,5 mln. soʻm toʻlovlar undirilishiga erishildi.

Tuman hokimligi va tegishli mutasaddi tashkilotlar kommunal toʻlovlardan qarzdorlikni bartaraf qilish boʻyicha tizimli ravishda ish olib bormoqdalar.

Tumanda 2015-yilga yangi ish oʻrinlarini yaratish va aholi bandligini taʼminlash Dasturi ishlab chiqilib, yil davomida 5296 ta yangi ish oʻrinlarini yaratish va aholi bandligini taʼminlash rejalashtirilgan edi.

Dasturga koʻra amalda 5337 ta yangi ish oʻrinlari tashkil etildi, reja 100,8 foizga bajarildi. Yaratilgan ish oʻrinlarining 86,1 foizi qishloq joylariga toʻgʻri keladi.

Jumladan, maqsadli dasturlarga muvofiq 787 ta, tijorat banklarining kichik korxonalar va mikrofirmalarni tashkil qilishga ajratgan kreditlari hisobidan 2073 ta, yakka tartibdagi tadbirkorlikni rivojlantirish hisobidan 281 ta, uy mehnatining barcha shakllarini rivojlantirish hisobidan 935 ta, fermer xoʻjaliklarini rivojlantirish hisobidan 1261 ta yangi ish oʻrinlari yaratildi.

Tumanimizda aholi bandligini taʼminlash, jumladan kollej bitiruvchilarini egallagan mutaxassisliklari boʻyicha ishga joylashtirish borasida ham qator ijobiy ishlar amalga oshirildi.

2014-2015 oʻquv yilida tumanimizda mavjud 7 ta kasb-hunar kollejlarini 2571 nafar oʻquvchi oʻz yoʻnalishlari boʻyicha bitirdi. Bitiruvchilarni ishga joylashtirish maqsadida uch tomonlama shartnomalarning sifatliligiga eʼtibor qaratgan holda mos yoʻnalishdagi ishlab chiqarish korxonalari bilan hamkorlikni tashkil etib, oʻz mutaxassisliklari boʻyicha amaliyot oʻtashlari uchun tumanda faoliyat koʻrsatayotgan 614 ta korxona, tashkilot va muassasalarga biriktirildi. Bu koʻrsatkich oʻrtacha xar bir korxonaga 4,1 nafardan toʻgʻri keldi.

Kollej bitiruvchilarini ishga joylashtirish yuzasidan uch tomonlama shartnomalar tuzish 98,9 foiz amalga oshirildi, chunki turli sabablarga koʻra chetga chiqib ketgan yoki muntazam darsga qatnashmagan 29 nafar bitiruvchi bilan shartnomalar tuzilmadi. Tuman hokimligi, iqtisodiyot boʻlimi hamda Bandlikka koʻmaklashish va aholini ijtimoiy muhofaza qilish markazi tomonidan kollej bitiruvchilarini doimiy boʻlgan ish oʻrinlariga ishga joylashtirish muntazam ravishda monitoring qilib borilmoqda. Bugungi kungacha kasb-hunar kollejlarining 2571 nafar bitiruvchilaridan 2568 nafarining bandligi taʼminlandi.

Shundan: 2376 nafari doimiy ish oʻrni bilan taʼminlangan boʻlsa, 118 nafari tijorat banklaridan 700 mln. soʻmlikdan ortiq imtiyozli kreditlar olib, oʻz tadbirkorlik faoliyatini boshladi. 74 nafar bitiruvchilar esa oliy taʼlim muassasalariga oʻqishga qabul qilindilar. Qolgan 3 nafar bitiruvchilarning bandligini taʼminlash choralari koʻrilmoqda.

Soʻnggi yillarda mamlakatimizning eksport salohiyatini oshirishda hududiy korxonalar tomonidan eksportbop mahsulotlar ishlab chiqarish va ularni eksportga joʻnatishga alohida eʼtibor qaratib kelinmoqda.

Tumanimizda ham bu sohaga eʼtibor qaratilishi natijasida keyingi 3-4-yil davomida hududiy korxonalar tomonidan mahsulotlar eksporti yoʻlga qoʻyilmoqda.

2015-yil uchun tumanimizdagi 6 ta korxonaga 2101,0 ming AQSh dollari miqdorida eksport prognozi belgilangan edi, belgilangan eksport prognozi topshirigʻini bajarish maqsadida olib borilgan ishlar natijasida 2015-yilgi topshiriq 2152,3 ming AQSh dollari miqdorida, yaʼni 102,4 foizga bajarilishi taʼminlandi.

Hududiy korxonalar tomonidan mahsulotlar eksport hajmini oshirish maqsadida olib borilgan ishlar natijasida oʻtgan 2015-yilda eksportyor korxonalar safiga "Jumamurod Nonboy” fermer xoʻjaligi yangidan kiritilib, fermer xoʻjaligi tomonidan 143,7 ming dollarlik qishloq xoʻjalik mahsulotlari eksport qilishga erishildi.

Tumanda oʻtgan 2015-yil sarhisob qilinib, 2016-yilga moʻljallangan eksport prognozi belgilab olindi. Joriy 2016-yilga belgilangan tumanning eksport prognozi 2622,1 ming dollarni tashkil qiladi.

2015-yilda ijtimoiy sohada ham qator ishlar amalga oshirildi. "Keksalarni eʼzozlash yili” tuman dasturi ijrosini taʼminlash uchun 16 mlrd. 474 mln. soʻm, 88 ming AQSh dollaridan oshiqroq mablagʻ sarflanishi rejalashtirilgan boʻlib, amalda davlat dasturi bandlarida belgilangan vazifalarga sarflangan mablagʻlar 18 mlrd. 490 mln. 400 ming soʻm, 88 ming 50 AQSh dollarini tashkil etdi, yaʼni reja 113 foizga bajarildi.

Keksalarimizni ijtimoiy-iqtisodiy, maʼnaviy-maʼrifiy tomondan qoʻllab quvvatlash maqsadida yil davomida ularning holidan xabar olib turildi, turli tadbir va bayramlarda sovgʻa-salomlar ulashildi.

1941-1945 yillardagi urush va mehnat fronti faxriylari, shuningdek yolgʻiz va ijtimoiy madadga muhtoj keksa kishilarning uylarini hashar yoʻli bilan joriy taʼmirlash, zarur hollarda esa mukammal taʼmirlashni amalga oishirish maqsadida har bir fuqarolar yigʻinlarida har yili bir nafardan jami 141 nafar kishini qamrab olgan holda 2015-2017-yillar mobaynida hayotga tatbiq qilinishi koʻzda tutilgan maxsus chora-tadbirlar dasturi ishlab chiqilib, 2015-yilga moʻljallangan bandlari toʻliq amalga oshirildi.

19 nafar urush va mehnat fronti faxriylari muhtaram Prezidentimiz tomonidan "Ikkinchi jahon urushidagi Gʻalabaning 70-yilligi” esdalik yubiley medali, televizor, uyali aloqa telefoni hamda bir martalik pul mukofoti bilan taqdirlandilar.

2016 yilning "Sogʻlom ona va bola yili” deb belgilanishi munosabati bilan shu nomda qabul qilinadigan Respublika dasturiga takliflar hamda tuman dasturi loyihasi tayyorlanmoqda. Har tomonlama sogʻlom va barkamol avlodni shakllantirish, ona va bola salomatligiga eʼtibor qaratishdek keng qamrovli vazifalarni bajarish koʻzda tutiladigan mazkur dasturning ijrosi yil davomida nazoratga olinadi.

Tumanda jami 82 ta umumiy oʻrta taʼlim maktablari, 37 ta maktabgacha taʼlim muassasalari, 3 ta bolalar va oʻsmirlar sport maktabi, 2 ta musiqa va sanʼat maktabi hamda "Barkamol avlod” bolalar markazida yosh avlodga sifatli taʼlim-tarbiya berib kelinmoqda.

2014-2015 oʻquv yilida tumanimizdagi maktablarning 9-sinfini jami 3075 nafar yoshlar, jumladan 1525 nafar qizlar tamomlab, ularning barchasi akademik litsey va kasb-hunar kollejlariga hujjat topshirib, taʼlimning keyingi bosqichiga toʻliq jalb qilindi.

Yoshlarning boʻsh vaqtlarini mazmunli oʻtkazish maqsadida 2015-2016 oʻquv yilida 719 ta fan toʻgaraklari tashkil qilingan boʻlib, ularga 13152 nafar oʻquvchi jalb qilingan. Shuningdek umumtaʼlim maktablarida tashkil qilingan 435 ta sport toʻgaraklariga 9642 nafar oʻquvchi, sport maktablarida sportning 20 turi boʻyicha tashkil qilingan toʻgaraklarga 1138 nafar ishtirokchi, musiqa va sanʼat maktablarida tashkil qilingan 15 ta toʻgaraklarga 262 nafar oʻquvchilar muntazam ravishda qatnaydilar.

Bir soʻz bilan aytganda, tumanimizda kelajagimiz egalari boʻlmish yosh avlodga zamon talablariga mos taʼlim-tarbiya berilmoqda.

2015-yilda tumanimizda tibbiyot sohasida ham bir qancha ishlar amalga oshirildi. Bugungi kunda tumanimiz aholisiga davolash-profilaktika muassasalari malakali tibbiy xizmat koʻrsatmoqda. Tibbiy xizmat sifatini yanada oshirish, tibbiyot xodimlarining kasbiy salohiyatini koʻtarish maqsadida malaka oshirish oʻqishlari hamda tibbiyot muassasalarini yangi asbob-uskunalar bilan taʼminlash ishlari tizimli ravishda amalga oshirilmoqda.

Tuman boʻyicha birgina 2015-yilda Markaziy shifoxona ftiziatriya boʻlimida 1,5 mlrd. soʻm byudjet mablagʻlari hisobidan kapital taʼmirlash, Qipchoq ovulida 45 yotoq oʻrinli Silga qarshi kurash dispanseri binosida 2,5 mlrd. soʻmlik rekonstruktsiya ishlari amalga oshirildi.

"Salomatlik-3” loyihasi boʻyicha zamonaviy raqamli kompyuterlashtirilgan rentgen apparatlari oʻrnatilib, ishga tushirilganligini, "Hech kim mehr va eʼtibordan chetda qolmasin!” shiori ostida birgina 2015-yilning oʻzida tumanimizda 3-marta Respublika ixtisoslashgan ilmiy markazlari yuqori malakali tibbiy xodimlari ishtirokida bepul tibbiy koʻriklar tashkil qilinganligini inobatga oladigan boʻlsak, tumanimizda bu sohaga ham katta eʼtibor berilayotganligining guvohi boʻlamiz.

Sogʻliqni saqlash tizimiga qaratilayotgan alohida eʼtibor sababli tumanimiz tibbiyot sohasida bir qancha ijobiy koʻrsatkichlarga erishildi, bunga birgina misol: 2009 - 2015-yillar davomida Amudaryo tumanida onalar oʻlimi umuman qayd qilinmadi.

Oʻtgan 2015 yilda pudrat tashkilotlari tomonidaninvestitsiya dasturiga asosan byudjet mablagʻlari hisobidan jami qiymati6,4 mlrd. soʻm boʻlgan 10 ta obʼekt (3 ta ijtimoiy obʼekt, 7 ta suv tarmoqlari obʼektlari) qurilishi rejalashtirilib, 6,4 mlrd. soʻmlik qurilish-montaj ishlari bajarildi hamda barchasi foydalanishga topshirildi.

Tumanimizda aholining toza ichimlik suviga boʻlgan ehtiyoji katta ekanligi hisobga olinib, jami uzunligi 7,9 km. boʻlgan suv tarmogʻi qurilishi va Mangʻit shahar 2-suv koʻtarish nasos stantsiyasi rekonstruktsiyasi uchun 1 mlrd. 611,3 mln. soʻm ajratilib, ushbu qurilish ishlari "Amudaryo qurilish” MChJ, "Amudaryo maxsus qurilish” MChJ, "Mangʻit invest maksimum” MChJ tomonidan sifatli amalga oshirildi.

Shuningdek, namunaviy loyiha asosida uy-joylar qurilgan 3 ta massiviga investitsiya dasturiga muvofiq qurilish qiymati 265,8 mln. soʻmlik, jami uzunligi 2,212 km. suv tarmogʻi qurish ishlari bajarildi.

Bundan tashqari, 2015-yilda bolalar sportini rivojlantirish jamgʻarmasi hisobidan 55-sonli maktabga sport zali va 9-sonli Bolalar musiqa va sanʼat maktabida rekonstruktsiya ishlari amalga oshirilib, bu ishlarga jami 2 mlrd. 307,8 mln. soʻm ajratildi.

Oʻtgan 2015 yil davomida "Choykoʻl” ovuli va "Uyshin” mahallasi hududlarida madaniyat va aholi dam olish markazlari foydalanishga topshirildi.

Hukumatimiz qarorlariga asosan Mangʻit shahri Gulzor mahallasida smeta bahosi 6 mlrd. 64 mln. 695 ming soʻm boʻlgan 4 qavatli, 48 kvartirali "Kamolot” uylari qurilib, belgilangan tartibda imtiyozga ega boʻlgan yosh oilalarga berildi.

Osiyo taraqqiyot banki mablagʻi hisobidan 1 mln. 402 ming AQSh dollari miqdorida mablagʻ ajratilib, tumanimizning Boʻz yop ovulida qurilishi rejalashtirilgan 20,7 km. uzunlikdagi suv tarmogʻining 18,2 km. qismi qurildi. Suv tarmogʻi qurilishi davom qildirilmoqda.

Shuningdek, tumanda 3 ta massivda 75 ta, yaʼni, Bosuv massivida 40 ta, Taqirqalʼa massivida 15 ta, Vaxum massivida 20 ta namunaviy loyihalar asosidagi uy-joylar qurilishi rejalashtirilib, 12 mlrd. 715,1 mln. soʻm mablagʻ ajratildi. Yil davomida 59 ta uy qurilib, foydalanishga topshirildi.

Davlat va mahalliy ahamiyatdagi yoʻllarni toʻla va joriy taʼmirlash boʻyicha 2015-yilga jami 3 mlrd. 267,9 mln. soʻm mablagʻ ajratilib, keng koʻlamli ishlar amalga oshirildi.

2016-yilgi Investitsiya dasturi boʻyicha davlat byudjetidan 11 ta obʼektga 6 mlrd. 185 mln. soʻm mablagʻ ajratilgan edi. Oʻrta qalʼa ovulidagi 57-sonli maktabni rekonstruktsiya qilish va qoʻshimcha 60 oʻquvchi oʻrinli xonalar qurilishi, Oq oltin ovulidagi 71-sonli maktabni rekonstruktsiya qilish hamda qoʻshimcha 160 oʻquvchi oʻrinli xonalar qurilishi, shuningdek, Oq oltin ovulidagi 7-maktabni, Kuyuk koʻpir ovulidagi 14-maktabni, Bobur nomli ovuldagi 48-maktabni, Qipchoq ovulidagi Amudaryo agrobiznes kasb-hunar kolleji binosini kapital taʼmirlash ishlari rejalashtirilgan. Bundan tashqari, bolalar sportini rivojlantirish jamgʻarmasi mablagʻlari hisobidan Toʻlqin ovulidagi 32-sonli maktabga va Qilichboy ovulidagi 34-maktabga sport zallari qurilishi koʻzda tutilmoqda.

Aholining toza ichimlik suviga boʻlgan talabini qondirish maqsadida joriy yilda Mangʻit shahrida 6,7 km. uzunlikdagi suv tarmogʻi rekonstruktsiya qilinib, xalqasimon suv tarmogʻi yaratilishi koʻzda tutilgan.

Shuningdek, Oʻrta qalʼa ovuli RU-1 suv inshootidan Tosh yop aholi punktigacha 2,1 km. uzunlikda suv tarmogʻi qurilishi va suv xavzasiga qoʻshimcha nasos oʻrnatish ishlari amalga oshiriladi. Ushbu obʼektlar boʻyicha tender savdosi oʻtkazilmoqda va shartnomalar tuzilmoqda.

Shuningdek, joriy yilda Obodonlashtirish boshqarmasi hisobidagi 7 ta koʻchaning 3,69 km. qismini joriy va mukammal taʼmirlash ishlariga 845,7 mln. soʻm ajratilgan.

Qishloq xoʻjaligi sohasida olib borilayotgan islohotlar natijasida tumanimiz fermerlari bu yil ham davlatga paxta, gʻalla va pilla topshirish boʻyicha shartnomaviy rejalarini Respublikamizda birinchi boʻlib, ortigʻi bilan bajardilar.

Joriy yilda fermer xoʻjaliklari tasarrufidagi yer maydonlari hajmlari yanada maqbullashtirilib, tumanimizda faoliyat yuritayotgan fermer xoʻjaliklari soni 528 taga yetkazildi. Ular tasarrufidagi yer maydonlari oʻrtacha 61,4 gektarni tashkil qildi.

Muhtaram Prezidentimiz mamlakatimizni 2015-yilda ijtimoiy-iqtisodiy rivojlantirish yakunlari va 2016-yilga moʻljallangan iqtisodiy dasturning eng muhim ustuvor yoʻnalishlariga bagʻishlangan Vazirlar Mahkamasining majlisidagi maʼruzasida taʼkidlaganidek, "Biz ozod va obod Vatanimiz mustaqilligining qutlugʻ 25-yilligi keng nishonlanadigan 2016-yilga katta maqsad va rejalar bilan qadam qoʻydik. Yangi tariximizning eng yorqin sahifasini tashkil etadigan ana shu buyuk sanaga har tomonlama munosib va salmoqli hissa qoʻshish Oʻzbekistonning har bir fuqarosi uchun ulkan sharafdir”.

Fursatdan foydalanib, Siz – aziz deputatlarni, tumanimiz faollarini 2016-yilga belgilangan iqtisodiy va ijtimoiy dasturlarni amalga oshirishda faol ishtirok etgan holda tumanimiz va mamlakatimizning iqtisodiy rivojiga, aholi turmush farovonligining yanada yaxshilanishiga hissa qoʻshishga chaqiraman. Bu yoʻlda barchangizga sogʻlik, oilalaringizga baxt, ishlaringizga muvaffaqiyatlar tilayman!