Qisqa satrlarda

Elim deb, yurtim deb yashar harbiylar

13-yanvar kuni Doʻrman qishloq xoʻjalik kasb-hunar kollejida Qurolli Kuchlarimiz tashkil etilganining 24 yilligi hamda Vatan himoyachilari kuniga bagʻishlab, "Elim deb, yurtim deb yashar harbiylar” deb nomlangan bellashuv  oʻtkazildi. Unga Oʻzbekiston Respublikasi Qurolli Kuchlari milliy xavfsizlik xizmatining chegara qoʻshinlariga qarashli chegara posti harbiy xizmatchilari taklif qilindi. 

Bellashuv tadbirida mustaqil Oʻzbekistonimiz Qurolli Kuchlari safida xizmat qilish har bir farzand uchun sharafli ish ekanligi,  oʻgʻlonlarimiz bu bosqichga  taʼlim olib, kasb-hunar oʻrganish jarayonida puxta tayyorgarlik koʻrayotganliklari namoyish etildi.

Maʼnaviyatga bagʻishlangan tadbirlar

15-yanvar kuni tumanimizdagi 18-sonli va 11-sonli umumtaʼlim maktablarida hamda Amudaryo agrobiznes kasb-hunar kollejida "Jayxun ilhomlari” NNTning "Yuksak maʼnaviyatli avlod – yurt kelajagi” nomli loyihasi doirasida yoshlar bilan uchrashuv oʻtkazildi.

Tadbirda tashkilot aʼzosi, jurnalist Allambergan Jumaniyozov "Globallashuv jarayonida yoshlar maʼnaviyati” mavzusida maʼruza qildi.

Tadbirlar yakunida oʻquvchilarni qiziqtirgan savollarga javoblar berildi.

Sport maktabining ochiq birinchiligi oʻtkazildi

14-yanvar – Vatan himoyachilari kuni munosabati bilan hamda "Sogʻlom ona va bola yili”ga bagʻishlab  1-sonli BOʻSMda stol tennisi boʻyicha sport maktabi ochiq birinchiligi oʻtkazildi.

Musobaqani sport maktabi direktori vazifasini bajaruvchi Baxtiyor Rajabov ochdi va ishtirokchilarga omad tiladi. Sport maktabining ochiq birinchiligida 60 nafardan ortiq yoshlar ishtirok qildilar.

Keskin va murosasiz bellashuvlarga boy boʻlgan musobaqa yakunida gʻoliblar sport maktabi tomonidan tayyorlangan faxriy yorliqlar va esdalik sovgʻalari bilan taqdirlandi.

Oʻz muxbirimizdan.