YaNGI MARRALAR SARI RUHLANTIRUVChI YaNGI KITOB

Oʻzbekiston Respublikasi Prezidenti Islom Karimovning "Ona yurtimiz baxtu iqboli va buyuk kelajagi yoʻlida xizmat qilish – eng oliy saodatdir” nomli kitobi "Oʻzbekiston” nashriyoti tomonidan koʻpming nusxada chop etildi. Ushbu kitobdan davlatimiz rahbarining saylovoldi jarayonlaridagi 20 dan ziyod uchrashuv va anjumanlarda, jumladan, Oliy Majlis Qonunchilik palatasi deputatlari va Senati aʼzolari bilan uchrashuvlarda, ikkala palataning qoʻshma majlisida, Vazirlar Mahkamasining mamlakatimizni 2014-yilda ijtimoiy-iqtisodiy rivojlantirish yakunlari va 2015-yilga moʻljallangan iqtisodiy dasturning eng muhim ustuvor yoʻnalishlariga bagʻishlangan majlisida, Bolalar sportini rivojlantirish jamgʻarmasi Homiylik kengashining yigʻilishida, Tadbirkorlar va ishbilarmonlar harakati – Oʻzbekiston liberal-demokratik partiyasining VII sʼezdida, Qoraqalpogʻiston Respublikasi, viloyatlar va Toshkent shahar saylovchilari vakillari bilan uchrashuvlarda, Oʻzbekiston Respublikasi Prezidenti lavozimiga kirishish tantanali marosimidagi nutq va maʼruzalarida, shuningdek, 9-may – Xotira va qadrlash kuni munosabati bilan ommaviy axborot vositalariga bergan intervyusida bildirgan eng muhim, kontseptual ahamiyatga ega gʻoya va fikr-mulohazalari oʻrin olgan.

Davlatimiz va jamiyatimizning yaqin va uzoq istiqbolga moʻljallangan taraqqiyot strategiyasi aniq-ravshan belgilab berilgan ana shu chiqishlarda mamlakatimizni demokratik yangilash va modernizatsiya qilish jarayonlarini yangi bosqichga koʻtarish, uning iqtisodiy qudratini oshirish, ijtimoiy sohalar – taʼlim-tarbiya, ilmu fan, sogʻlikni saqlash, madaniyat va sanʼat, sport tizimini izchil rivojlantirish, ayollar, keksalar va yoshlarimiz uchun yanada qulay sharoit va imkoniyatlar yaratish, har bir hudud va mintaqani ravnaq toptirishga doir yangi reja va ustuvor loyihalar, bugungi kunda dunyoda yuz berayotgan keskinlik va qarama-qarshiliklarning mohiyati, turli tahdidlarning oldini olish, Oʻzbekistonning tashqi siyosat kontseptsiyasi toʻgʻrisidagi qarashlar har tomonlama puxta asoslangan holda bayon qilingan.

Mazkur toʻplamning bosh gʻoyasini quyidagi soʻzlarda mujassam boʻlgan eng muhim oʻzak fikr tashkil etadi:"Biz oʻtgan davrda amalga oshirgan ishlarimizga baho berar ekanmiz, "Kecha kim edigu bugun kim boʻldik?” degan savol asosida ularning mohiyati va ahamiyatini oʻzimizga chuqur tasavvur etamiz. Ayni vaqtda "Ertaga kim boʻlishimiz, qanday yangi marralarni egallashimiz kerak?” degan savol ustida oʻylashimiz, nafaqat oʻylashimiz, balki amaliy ishlarimiz bilan bunga javob berishimiz lozim”.

Ana shunday yondashuv asosida mamlakatimizning mustaqillik yillarida bosib oʻtgan tarixiy yoʻli teran tahlil qilinib, bu hayotiy savollarga chuqur va haqqoniy javoblar berilgani nashrning qimmatini yanada oshiradi.

Ushbu kitobni mutolaa qilar ekanmiz, har bir masalaga xalqimizning milliy manfaati va yana bir bor milliy manfaati nuqtai nazaridan yondashish, teran qiyosiy-tahliliy mushohada, tarix, zamon va kelajakni bir butun dialektik hodisa sifatida koʻrish, har qanday mavzuda joʻshqin bahs va muloqotga tayyorlik – bularning barchasi mustaqil oʻzbek davlatining asoschisi, dunyo miqyosida tan olingan yirik davlat va siyosat arbobi Islom Karimovning siyosiy uslubiga xos boʻlgan yorqin xususiyatlar ekaniga ishonch hosil qilamiz.

Ijtimoiy-siyosiy, maʼnaviy-maʼrifiy hayotimizda beqiyos ahamiyat kasb etadigan mazkur kitob hozirgi va ertangi kunimizning eng ustuvor yoʻnalishlarini oʻzida mujassam etib, yangi va yaqin tariximizning hali biz toʻla anglab yetmagan koʻplab qirralarini kashf etishda, jamiyatimizning taraqqiyot falsafasini, mamlakatimiz va xalqimiz kelajagi, uning ravnaqini belgilab berishda, ayniqsa, yoshlarimizni Vatanga muhabbat va sadoqat ruhida tarbiyalashda muhim dasturilamal boʻlib xizmat qilishi shubhasiz.

Timur Asenbayev, Qoraqalpogʻiston Respublikasi

xoʻjalik sudining sudyasi.