Qoʻriqlash tizimi afzalliklarini tushuntirish boʻyicha targʻibot uchrashuvi oʻtkazildi

Tinchlik va xotirjamlik bebaho neʼmat boʻlib, uni asrab-avaylash jamiyatning barqaror rivojlanishida poydevor vazifasini oʻtaydi. Bu borada, ayniqsa, aholiga eng yaqin boʻlgan boʻgʻin – mahallalarda xavfsiz muhitni yaratish, jinoyatchilik va huquqbuzarliklarning barvaqt oldini olishga alohida eʼtibor qaratilmoqda. Oʻzbekiston Respublikasi Prezidentining 2026-yil 5-yanvar kungi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi qarori aynan shu ezgu maqsadlarga xizmat qiladi. Mazkur hujjat ijrosini taʼminlash maqsadida joylarda ichki ishlar idoralari tomonidan keng koʻlamli, tizimli profilaktik ishlar amalga oshirilmoqda.

Jumladan, Amudaryo tumani Ichki ishlar boʻlimi huzuridagi Qoʻriqlash xizmati tomonidan ham tuman mahallalarida osoyishtalikni qaror toptirish va sodir etilishi mumkin boʻlgan noxush holatlarning oldini olish tizimi samaradorligini yanada oshirish boʻyicha aniq manzilli chora-tadbirlar olib borilmoqda.

Qoraqalpogʻiston Respublikasi Ichki ishlar vazirligi huzuridagi Qoʻriqlash xizmatining targʻibot ishlari boʻyicha tasdiqlangan ish rejasiga asosan, kriminogen vaziyati ogʻir deb topilgan, yaʼni “qizil” toifaga kiritilgan mahalla hududlarida toʻliq xatlovdan oʻtkazish ishlari jadal surʼatlarda olib borilyapti. Ushbu jarayonda aholi va tadbirkorlar bilan bevosita muloqotlar tashkil etilib, zamonaviy xavfsizlik choralarining ahamiyati hayotiy misollar yordamida keng tushuntirilmoqda.

Xususan, joriy yilning 4-may kuni Amudaryo tumanidagi “Boʻston” mahallasi hududida joylashgan “Mangʻit Savdo kompleksi” masʼuliyati cheklangan jamiyatiga qarashli bozorda ham aynan shunday profilaktik tadbir tashkil etildi. Ushbu yirik savdo maskanida faoliyat yuritayotgan 38 nafar tadbirkor bilan yuzma-yuz uchrashuv oʻtkazilib, ularga zamonaviy qoʻriqlash xizmatining afzalliklari, mol-mulk daxlsizligini taʼminlashdagi oʻrni va ishonchliligi xususida batafsil maʼlumotlar berildi. Oʻz mol-mulkining xavfsizligidan koʻngli toʻq boʻlgan tadbirkorgina bor eʼtiborini oʻz ishini rivojlantirishga qaratadi, bu esa yurtimiz iqtisodiyotiga ham oʻzining ijobiy taʼsirini koʻrsatadi.

Bugungi kunda Boʻston mahallasi hududida xavfsizlikni taʼminlash borasidagi amaliy ishlar oʻzining yaqqol va ijobiy natijasini koʻrsatmoqda. Raqamlarga eʼtibor qaratadigan boʻlsak, hozirgi vaqtda ushbu hududdagi 18 ta fuqaro xonadoni muhofazaga olingan boʻlib, eʼtiborlisi shundaki, ularning 5 tasi yakka-yolgʻiz yashovchi fuqarolarning uylari sanaladi. Bundan tashqari, hududdagi bitta umumtaʼlim maktabi, davlat-xususiy sheriklik asosida faoliyat yuritayotgan ikkita bogʻcha, toʻrtta zargarlik doʻkoni, toʻrtta kafe-bar, oltita oziq-ovqat doʻkoni kabi muhim obʼektlar ham ishonchli nazoratda. Shu bilan birga, “Mangʻit Savdo kompleksi” masʼuliyati cheklangan jamiyati hamda ushbu kompleks hududida joylashgan turli yoʻnalishdagi 19 ta savdo doʻkonlari qoʻriqlashning texnik vositalari, yaʼni markazlashtirilgan kuzatuv tizimlari va “Tashvish” tugmalari orqali tunu kun ishonchli tarzda qoʻriqlab kelinmoqda.

Fuqarolar va tadbirkorlarning xavfsizligini taʼminlash yoʻlida olib borilayotgan bu kabi uzluksiz saʼy-harakatlar xalqimizning tinch va farovon hayot kechirishi uchun eng mustahkam zamin yaratadi. Mahallalardagi har bir xonadon va ijtimoiy soha obʼektlari qoʻriqlash uchun ishonchli qoʻllarga topshirilganini his qilish odamlarda ertangi kunga boʻlgan umid va xotirjamlikni yanada mustahkamlaydi. Bundan koʻzlangan maqsad esa yagona – har bir fuqaro oʻz uyida, koʻchada va ish joyida oʻzini toʻlaqonli xavfsiz his qilishiga erishishdir.