Қўриқлаш тизими афзалликларини тушунтириш бўйича тарғибот учрашуви ўтказилди

Тинчлик ва хотиржамлик бебаҳо неъмат бўлиб, уни асраб-авайлаш жамиятнинг барқарор ривожланишида пойдевор вазифасини ўтайди. Бу борада, айниқса, аҳолига энг яқин бўлган бўғин – маҳаллаларда хавфсиз муҳитни яратиш, жиноятчилик ва ҳуқуқбузарликларнинг барвақт олдини олишга алоҳида эътибор қаратилмоқда. Ўзбекистон Республикаси Президентининг 2026 йил 5 январь кунги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги қарори айнан шу эзгу мақсадларга хизмат қилади. Мазкур ҳужжат ижросини таъминлаш мақсадида жойларда ички ишлар идоралари томонидан кенг кўламли, тизимли профилактик ишлар амалга оширилмоқда.

Жумладан, Амударё тумани Ички ишлар бўлими ҳузуридаги Қўриқлаш хизмати томонидан ҳам туман маҳаллаларида осойишталикни қарор топтириш ва содир этилиши мумкин бўлган нохуш ҳолатларнинг олдини олиш тизими самарадорлигини янада ошириш бўйича аниқ манзилли чора-тадбирлар олиб борилмоқда.

Қорақалпоғистон Республикаси Ички ишлар вазирлиги ҳузуридаги Қўриқлаш хизматининг тарғибот ишлари бўйича тасдиқланган иш режасига асосан, криминоген вазияти оғир деб топилган, яъни “қизил” тоифага киритилган маҳалла ҳудудларида тўлиқ хатловдан ўтказиш ишлари жадал суръатларда олиб бориляпти. Ушбу жараёнда аҳоли ва тадбиркорлар билан бевосита мулоқотлар ташкил этилиб, замонавий хавфсизлик чораларининг аҳамияти ҳаётий мисоллар ёрдамида кенг тушунтирилмоқда.

Хусусан, жорий йилнинг 4 май куни Амударё туманидаги “Бўстон” маҳалласи ҳудудида жойлашган “Манғит Савдо комплекси” масъулияти чекланган жамиятига қарашли бозорда ҳам айнан шундай профилактик тадбир ташкил этилди. Ушбу йирик савдо масканида фаолият юритаётган 38 нафар тадбиркор билан юзма-юз учрашув ўтказилиб, уларга замонавий қўриқлаш хизматининг афзалликлари, мол-мулк дахлсизлигини таъминлашдаги ўрни ва ишончлилиги хусусида батафсил маълумотлар берилди. Ўз мол-мулкининг хавфсизлигидан кўнгли тўқ бўлган тадбиркоргина бор эътиборини ўз ишини ривожлантиришга қаратади, бу эса юртимиз иқтисодиётига ҳам ўзининг ижобий таъсирини кўрсатади.

Бугунги кунда Бўстон маҳалласи ҳудудида хавфсизликни таъминлаш борасидаги амалий ишлар ўзининг яққол ва ижобий натижасини кўрсатмоқда. Рақамларга эътибор қаратадиган бўлсак, ҳозирги вақтда ушбу ҳудуддаги 18 та фуқаро хонадони муҳофазага олинган бўлиб, эътиборлиси шундаки, уларнинг 5 таси якка-ёлғиз яшовчи фуқароларнинг уйлари саналади. Бундан ташқари, ҳудуддаги битта умумтаълим мактаби, давлат-хусусий шериклик асосида фаолият юритаётган иккита боғча, тўртта заргарлик дўкони, тўртта кафе-бар, олтита озиқ-овқат дўкони каби муҳим объектлар ҳам ишончли назоратда. Шу билан бирга, “Манғит Савдо комплекси” масъулияти чекланган жамияти ҳамда ушбу комплекс ҳудудида жойлашган турли йўналишдаги 19 та савдо дўконлари қўриқлашнинг техник воситалари, яъни марказлаштирилган кузатув тизимлари ва “Ташвиш” тугмалари орқали туну кун ишончли тарзда қўриқлаб келинмоқда.

Фуқаролар ва тадбиркорларнинг хавфсизлигини таъминлаш йўлида олиб борилаётган бу каби узлуксиз саъй-ҳаракатлар халқимизнинг тинч ва фаровон ҳаёт кечириши учун энг мустаҳкам замин яратади. Маҳаллалардаги ҳар бир хонадон ва ижтимоий соҳа объектлари қўриқлаш учун ишончли қўлларга топширилганини ҳис қилиш одамларда эртанги кунга бўлган умид ва хотиржамликни янада мустаҳкамлайди. Бундан кўзланган мақсад эса ягона – ҳар бир фуқаро ўз уйида, кўчада ва иш жойида ўзини тўлақонли хавфсиз ҳис қилишига эришишдир.