Arna boʻyi mahallasining faol yetakchisi tadbirkor yoshlarga yaqindan koʻmaklashmoqda

Mamlakatimizda yigit-qizlarning oʻz salohiyatini namoyon etishlari, tadbirkorlik tashabbuslarini roʻyobga chiqarishlari uchun keng imkoniyatlar yaratilgan. Ushbu imkoniyatlar natijasida jamiyat rivojiga hissa qoʻshishga intilayotgan, mahalladoshlariga oʻrnak boʻlayotgan faol va tashabbuskor yoshlar safi kun sayin ortib bormoqda. Bu borada ularga mahallalardagi yoshlar yetakchilari yaqindan amaliy yordam berib, qoʻllab-quvvatlab kelishmoqda.

Amudaryo tumanining Arna boʻyi mahallasi yoshlar yetakchisi Shahzod Nuratdinov ham oʻz xizmat vazifasiga masʼuliyat bilan yondashib, nafaqat nazariy, balki amaliy jihatdan ham mahalla yoshlariga yordam koʻrsatib kelmoqda. Zero, bugungi kunda mahallabay ishlash tizimida yetakchining roli faqat muammolarni oʻrganish emas, balki yoshlar bandligini taʼminlash va tadbirkorlik muhitini shakllantirishga hissa qoʻshishdan iboratdir.

Shahzod Nuratdinov mahallada yoshlar bilan bevosita muloqotda boʻlib, ularning orzu-intilishlari, muammolari va ehtiyojlarini yaqindan oʻrgandi. U yoshlar oʻrtasida ishsizlikni kamaytirish va ularni foydali mehnatga yoʻnaltirish uchun ularni avvalo kichik biznes va xususiy tadbirkorlik sohasiga jalb qilish lozimligini anglab yetdi. Sababi, tadbirkorlik faoliyatini boshlagan yoshlar kelgusida tengdoshlarini ham ish bilan taʼminlaydi. Shahzod Nuratdinov mahalla yoshlarining yetakchisi sifatida yoshlar orasiga kirib borib, bu borada faol targʻibot ishlarini yoʻlga qoʻydi. Natijada mahalla yoshlari orasidan tadbirkorlikka qiziquvchi yoki ishbilarmonlik bilan shugʻullanish qobiliyati boʻlgan yoshlar roʻyxatini tuzib, ular bilan doimiy aloqalarni yoʻlga qoʻydi.

Barno Hayitboyeva ham mahalladagi koʻplab yoshlar qatori ishsiz edi. Oilasiga daromad olib kirish maqsadida davlatimiz tomonidan yaratilgan imkoniyatlardan unumli foydalangan holda, hokim yordamchisining tavsiyasi bilan yakka tartibdagi tadbirkor sifatida oʻz faoliyatini yoʻlga qoʻydi. Uning tadbirkorlikka qoʻyilgan ilk qadamlar yurtimizdagi mavjud imtiyozlar va qulayliklar bilan yanada mustahkamlandi.

Xususan, Prezidentimizning 2025-yil 14-fevraldagi “Yoshlar tadbirkorligini rivojlantirish va bandligini taʼminlashga doir qoʻshimcha chora-tadbirlar toʻgʻrisida”gi 62-sonli qarori asosida Barno Hayitboyeva «Aloqabank», yaʼni «Yoshlar banki»ga murojaat qildi. Natijada, aylanma mablagʻni shakllantirish uchun hech qanday garovsiz, kafillarsiz, faqatgina sugʻurta polisi orqali 100 million soʻm miqdoridagi imtiyozli kredit mablagʻini qoʻlga kiritdi. Bu kabi moliyaviy koʻmak davlatning yoshlarga boʻlgan yuksak ishonchi ifodasi boʻlib, yangi tashabbuslarni qoʻllab-quvvatlashda muhim ahamiyat kasb etmoqda. Kredit mablagʻlarining soddalashtirilgan tartibda ajratilishi Barno kabi izlanuvchan yoshlarning oʻz rejalarini kechiktirmasdan amalga oshirishiga imkoniyat yaratmoqda.

Dastlab u mahalla hududida uyali aloqa va boshqa turdagi xizmatlar uchun toʻlov qabul qilish shoxobchasini ochdi. Ilgari bunday xizmatlardan foydalanish uchun uzoq masofa bosishga majbur boʻlgan mahalla ahli endilikda oʻz uylari yaqinida zarur toʻlovlarni amalga oshirish imkoniyatiga ega boʻlishdi. Bu esa vaqt va mablagʻ tejalishiga xizmat qilibgina qolmay, hudud iqtisodiyotining rivojlanishiga ham hissa qoʻshmoqda. Eng muhimi, mazkur loyiha doirasida Shahzod ikki nafar tengdoshining bandligini taʼminlab, ular uchun doimiy daromad manbaini yaratdi.

Barno Hayitboyeva erishilgan natijalar bilan toʻxtab qolgani yoʻq va berilgan imkoniyatlardan unumli foydalangan holda qisqa fursat ichida faoliyatini yanada kengaytirdi. Aholiga koʻrsatilayotgan xizmatlar turini koʻpaytirish maqsadida yangi gʻoyalarni hayotga tatbiq eta boshladi. U mahalla ahlining kundalik ehtiyojlarini tahlil qilib, oziq-ovqat mahsulotlari ishlab chiqarish tarmogʻini yoʻlga qoʻyishga qaror qildi. Shu maqsadda zamonaviy muzqaymoq ishlab chiqarish uskunasi hamda elektr pechlarini xarid qildi. Buning natijasida mahallada issiq non va non mahsulotlari tayyorlash xizmati yoʻlga qoʻyildi. Endilikda Arna boʻyi mahallasi aholisi uchun sifatli non mahsulotlarini mahallaning oʻzidan xarid qilish imkoniyati paydo boʻldi. Shuningdek, muzqaymoq ishlab chiqarish xizmati yoʻlga qoʻyilgani yozning issiq kunlarida yoshlar va bolajonlar uchun ayni muddao boʻldi.

Inson irodasi va mehnati davlat va jamiyat eʼtibori bilan birlashgan joyda har qanday maqsadga erishish mumkinligini Barno kabi shijoatli yoshlar oʻz faoliyati misolida koʻrsatib bermoqda. Uning faoliyati bugungi kun yoshlari uchun haqiqiy mahorat maktabidir. Barno Hayitboyeva misolida davlat tomonidan berilayotgan imtiyozlardan oqilona foydalanib, mahalla rivoji uchun hissa qoʻshish va tadbirkorlik orqali nafaqat oʻzini, balki boshqalarni ham ish bilan taʼminlash mumkinligi amalda isbotini topmoqda.