Арна бўйи маҳалласининг фаол етакчиси тадбиркор ёшларга яқиндан кўмаклашмоқда

Мамлакатимизда йигит-қизларнинг ўз салоҳиятини намоён этишлари, тадбиркорлик ташаббусларини рўёбга чиқаришлари учун кенг имкониятлар яратилган. Ушбу имкониятлар натижасида жамият ривожига ҳисса қўшишга интилаётган, маҳалладошларига ўрнак бўлаётган фаол ва ташаббускор ёшлар сафи кун сайин ортиб бормоқда. Бу борада уларга маҳаллалардаги ёшлар етакчилари яқиндан амалий ёрдам бериб, қўллаб-қувватлаб келишмоқда.

Амударё туманининг Арна бўйи маҳалласи ёшлар етакчиси Шаҳзод Нуратдинов ҳам ўз хизмат вазифасига масъулият билан ёндашиб, нафақат назарий, балки амалий жиҳатдан ҳам маҳалла ёшларига ёрдам кўрсатиб келмоқда. Зеро, бугунги кунда маҳаллабай ишлаш тизимида етакчининг роли фақат муаммоларни ўрганиш эмас, балки ёшлар бандлигини таъминлаш ва тадбиркорлик муҳитини шакллантиришга ҳисса қўшишдан иборатдир.

Шаҳзод Нуратдинов маҳаллада ёшлар билан бевосита мулоқотда бўлиб, уларнинг орзу-интилишлари, муаммолари ва эҳтиёжларини яқиндан ўрганди. У ёшлар ўртасида ишсизликни камайтириш ва уларни фойдали меҳнатга йўналтириш учун уларни аввало кичик бизнес ва хусусий тадбиркорлик соҳасига жалб қилиш лозимлигини англаб етди. Сабаби, тадбиркорлик фаолиятини бошлаган ёшлар келгусида тенгдошларини ҳам иш билан таъминлайди. Шаҳзод Нуратдинов маҳалла ёшларининг етакчиси сифатида ёшлар орасига кириб бориб, бу борада фаол тарғибот ишларини йўлга қўйди. Натижада маҳалла ёшлари орасидан тадбиркорликка қизиқувчи ёки ишбилармонлик билан шуғулланиш қобилияти бўлган ёшлар рўйхатини тузиб, улар билан доимий алоқаларни йўлга қўйди.

Барно Ҳайитбоева ҳам маҳалладаги кўплаб ёшлар қатори ишсиз эди. Оиласига даромад олиб кириш мақсадида давлатимиз томонидан яратилган имкониятлардан унумли фойдаланган ҳолда, ҳоким ёрдамчисининг тавсияси билан якка тартибдаги тадбиркор сифатида ўз фаолиятини йўлга қўйди. Унинг тадбиркорликка қўйилган илк қадамлар юртимиздаги мавжуд имтиёзлар ва қулайликлар билан янада мустаҳкамланди.

Хусусан, Президентимизнинг 2025 йил 14 февралдаги “Ёшлар тадбиркорлигини ривожлантириш ва бандлигини таъминлашга доир қўшимча чора-тадбирлар тўғрисида”ги 62-сонли қарори асосида Барно Ҳайитбоева «Алоқабанк», яъни «Ёшлар банки»га мурожаат қилди. Натижада, айланма маблағни шакллантириш учун ҳеч қандай гаровсиз, кафилларсиз, фақатгина суғурта полиси орқали 100 миллион сўм миқдоридаги имтиёзли кредит маблағини қўлга киритди. Бу каби молиявий кўмак давлатнинг ёшларга бўлган юксак ишончи ифодаси бўлиб, янги ташаббусларни қўллаб-қувватлашда муҳим аҳамият касб этмоқда. Кредит маблағларининг соддалаштирилган тартибда ажратилиши Барно каби изланувчан ёшларнинг ўз режаларини кечиктирмасдан амалга оширишига имконият яратмоқда.

Дастлаб у маҳалла ҳудудида уяли алоқа ва бошқа турдаги хизматлар учун тўлов қабул қилиш шохобчасини очди. Илгари бундай хизматлардан фойдаланиш учун узоқ масофа босишга мажбур бўлган маҳалла аҳли эндиликда ўз уйлари яқинида зарур тўловларни амалга ошириш имкониятига эга бўлишди. Бу эса вақт ва маблағ тежалишига хизмат қилибгина қолмай, ҳудуд иқтисодиётининг ривожланишига ҳам ҳисса қўшмоқда. Энг муҳими, мазкур лойиҳа доирасида Шаҳзод икки нафар тенгдошининг бандлигини таъминлаб, улар учун доимий даромад манбаини яратди.

Барно Ҳайитбоева эришилган натижалар билан тўхтаб қолгани йўқ ва берилган имкониятлардан унумли фойдаланган ҳолда қисқа фурсат ичида фаолиятини янада кенгайтирди. Аҳолига кўрсатилаётган хизматлар турини кўпайтириш мақсадида янги ғояларни ҳаётга татбиқ эта бошлади. У маҳалла аҳлининг кундалик эҳтиёжларини таҳлил қилиб, озиқ-овқат маҳсулотлари ишлаб чиқариш тармоғини йўлга қўйишга қарор қилди. Шу мақсадда замонавий музқаймоқ ишлаб чиқариш ускунаси ҳамда электр печларини харид қилди. Бунинг натижасида маҳаллада иссиқ нон ва нон маҳсулотлари тайёрлаш хизмати йўлга қўйилди. Эндиликда Арна бўйи маҳалласи аҳолиси учун сифатли нон маҳсулотларини маҳалланинг ўзидан харид қилиш имконияти пайдо бўлди. Шунингдек, музқаймоқ ишлаб чиқариш хизмати йўлга қўйилгани ёзнинг иссиқ кунларида ёшлар ва болажонлар учун айни муддао бўлди.

Инсон иродаси ва меҳнати давлат ва жамият эътибори билан бирлашган жойда ҳар қандай мақсадга эришиш мумкинлигини Барно каби шижоатли ёшлар ўз фаолияти мисолида кўрсатиб бермоқда. Унинг фаолияти бугунги кун ёшлари учун ҳақиқий маҳорат мактабидир. Барно Ҳайитбоева мисолида давлат томонидан берилаётган имтиёзлардан оқилона фойдаланиб, маҳалла ривожи учун ҳисса қўшиш ва тадбиркорлик орқали нафақат ўзини, балки бошқаларни ҳам иш билан таъминлаш мумкинлиги амалда исботини топмоқда.