“Uch avlod uchrashuvi” tadbiri oʻtkazildi

Yurtimizda inson qadrini ulugʻlash, keksa avlod vakillariga ehtirom koʻrsatish, yoshlarni milliy qadriyatlar va hayotiy saboqlar ruhida tarbiyalashga qaratilgan ezgu anʼanalar izchil davom etmoqda. Ayniqsa, nuroniylarning boy tajribasini jamiyat taraqqiyotiga daxldor muhim maʼnaviy boylik sifatida qadrlash, ularning hayot yoʻli va ibratli faoliyatini yosh avlodga namuna qilib koʻrsatish bugungi kunda alohida ahamiyat kasb etmoqda. Ana shunday maʼnaviy-maʼrifiy ahamiyatga ega tadbirlardan biri Amudaryo tumanida oʻtkazilgan “Uch avlod uchrashuvi” boʻldi.

Mazkur tadbir mazmun-mohiyati bilan nafaqat uch avlod — yoshlar, oʻrta va keksa avlod vakillarini bir davrada jamlagani, balki ular oʻrtasidagi maʼnaviy bogʻliqlikni yanada mustahkamlagani bilan ahamiyatli boʻldi. Uchrashuv davomida hayotning turli sinovlaridan oʻtgan, mehnat va jamoat faoliyatida katta tajriba toʻplagan nuroniylar bilan yoshlar oʻrtasida samimiy muloqot maydoni yaratildi.

Tadbirda “Nuroniy” jamgʻarmasi Qoraqalpogʻiston Respublikasi boʻlimi raisi Tursunboy Abdijabbarov, jamgʻarmaning tuman boʻlimi raisi Bekman Allaberganov, shuningdek turli sohalarda faoliyat yuritib, tumanning ijtimoiy-iqtisodiy, maʼnaviy va madaniy rivojiga munosib hissa qoʻshgan, ayni paytda nafaqada keksalik gashtini surayotgan nuroniylar ishtirok etdilar. Uchrashuvda faxriylar hayot yoʻli, mehnat faoliyati, yurt ravnaqi yoʻlida qilingan xizmatlar va bugungi tinch-osoyishta hayotning qadri haqida fikr almashdilar.

Ayniqsa, yoshi ulugʻ faxriylarning hayoti va mehnat faoliyati davomida toʻplagan boy tajribasi, yoshlik davridagi oʻziga xos qiyinchiliklar, mehnat pallasidagi mashaqqatlar, nihoyat nuroniylik paytida koʻrsatilayotgan hurmat-ehtirom haqida aytgan dil soʻzlari tadbir ishtirokchilarida katta taassurot qoldirdi.

Nuroniylar har bir davrning oʻz sinovi, oʻz masʼuliyati boʻlishini, biroq halol mehnat, sabr, matonat va vatanga sadoqat insonni hamisha yuksaklikka olib chiqishini alohida taʼkidladilar. Ularning samimiy xotiralari, hayotiy misollar bilan boyitilgan fikr-mulohazalari, ayniqsa yoshlar uchun oʻziga xos hayot darsi boʻldi.

Uchrashuv davomida tumanda davlat organlarida, jamoat tashkilotlarida bir necha yillar samarali mehnat qilgan Rustam Roʻzmetovga “Ardaqli nuraniy” koʻkrak nishoni topshirildi. Bu eʼtirof uning koʻp yillik samarali mehnati, el-yurt xizmatidagi fidoyiligiga berilgan munosib baho boʻldi.

Rustam Roʻzmetov mehnat faoliyatining ilk yillarida tumanimizdagi 30-sonli maktabda oʻqituvchi boʻlib ishlagan. Keyinchalik tuman ijroiya qoʻmitasida faoliyat yuritgan. 1991-1996-yillarda Oʻzbekiston Xalq demokratik partiyasining Amudaryo tumani Kengashi kotibi, birinchi kotibi lavozimlarida, 1996-2004-yillarda esa tuman hokimligida hokimning birinchi oʻrinbosarigacha boʻlgan lavozimlarda sidqidildan mehnat qilgan. Uning ayniqsa “Mahalla” xayriya jamoat fondining tuman boʻlinmasi raisi sifatida mahallani aholiga chinakam xizmat koʻrsatuvchi xalqchil tuzilmaga aylantirish borasidagi xizmatlari alohida eʼtirofga sazovor.

Tadbir davomida, shuningdek, mahalla hayotidagi samarali ishtiroki, yosh avlodni milliy qadriyatlar, odob-axloq va vatanparvarlik ruhida tarbiyalash yoʻlidagi ibratli mehnati, shuningdek mahallada tinchlik, ahillik va totuvlikni mustahkamlashga qoʻshayotgan munosib hissasi uchun bir guruh nuroniylar tuman hokimligining tashakkurnomasi bilan taqdirlandi.

Tadbir davomida keksa avlod vakillarining jamiyat hayotidagi oʻrni, ularning oila va mahalladagi oʻrnak boʻlarli faoliyati, tinchlik va totuvlikni mustahkamlashdagi hissasi haqida ham alohida soʻz yuritildi. Qayd etilganidek, nuroniylar — mahallaning fayzi, xonadonlarning barakasi, yoshlar uchun esa donishmand maslahatgoʻydir. Shu bois ularga ehtirom koʻrsatish, holidan xabar olish, hayotiy tajribasidan bahramand boʻlish xalqimizga xos yuksak qadriyatlardan biridir.

Shu kuni “Nuroniy” jamgʻarmasi Qoraqalpogʻiston Respublikasi boʻlimi raisi Tursunboy Abdijabbarov boshchiligidagi masʼullar tumanning Beruniy mahallasida istiqomat qiluvchi Yoʻldosh Allaberganov xonadonida ham boʻldilar. U yerda oila rahbari bilan samimiy muloqot oʻtkazilib, uning hayot yoʻli, mehnat faoliyati, mahalla va tuman taraqqiyotiga qoʻshgan hissasi haqida iliq fikrlar bildirildi. Tumanning ijtimoiy-iqtisodiy rivojiga munosib hissa qoʻshgan Yoʻldosh Allaberganovga ham “Ardaqli nuraniy” koʻkrak nishoni topshirildi.

Bu eʼtirof nuroniylarning koʻp yillik halol mehnati, el manfaati yoʻlidagi xizmatlari hech qachon unutilmasligi, ularning hayot yoʻli bugungi va ertangi avlod uchun hamisha ibrat maktabi boʻlib qolishini anglatadi. Zero, yurt taraqqiyoti yoʻlida fidokorona mehnat qilgan insonlarni qadrlash — bu jamiyatning oʻz tarixi, oʻz qadriyatlari va oʻz kelajagiga boʻlgan hurmatidir.

Shuningdek, shu mahallada istiqomat qiluvchi 97 yoshli nuroniy Quvvat Abdurahmonov holidan ham xabar olindi. Muborak Ramazon oyi munosabati bilan tabarruk otaxonga bayram sovgʻalari topshirilib, duolari olindi. Bunday eʼtibor va gʻamxoʻrlik nuroniylar qalbidagi mamnuniyatni yanada oshirishi, jamiyatda mehr-oqibat, hurmat va insonparvarlik muhitini mustahkamlashi bilan qimmatlidir.

Xulosa oʻrnida aytish joizki, Amudaryo tumanida oʻtkazilgan “Uch avlod uchrashuvi” tadbiri avlodlar oʻrtasidagi maʼnaviy koʻprikni mustahkamlash, nuroniylarning boy hayot tajribasini eʼtirof etish va yoshlarni shu ruhda tarbiyalashga xizmat qilgan muhim maʼnaviy tadbir boʻldi. U nafaqat keksa avlodga ehtirom ifodasi, balki kelajak egalari