Mangʻit dehqon bozori atrofida harakat xavfsizligini taʼminlash choralari koʻrilmoqda

Amudaryo tumani Ichki ishlar boʻlimi Jamoat xavfsizligi xizmati Yoʻl harakati xavfsizligi boʻlimi inspektorlari hamda profilaktika inspektorlari bilan oʻzaro hamkorlikda Amudaryo tumanining Mangʻit shahri, Navoiy nomli mahallasi hududida joylashgan Mangʻit dehqon bozori oldida keng qamrovli reyd tadbirlari tashkil etildi. Mazkur tadbirlar hududda yoʻl harakati xavfsizligini taʼminlash, transport vositalari harakatida yuzaga kelayotgan tirbandliklarni bartaraf etish, shuningdek, yoʻl-transport hodisalarining oldini olish maqsadida amalga oshirildi.

Maʼlumki, Mangʻit dehqon bozori Amudaryo tumanidagi eng gavjum savdo maskanlaridan biri hisoblanib, ayniqsa kunduzgi vaqtda bu hududda transport oqimi keskin oshadi. Natijada Buyuk Turon va Berdaq koʻchalari kesishmasida tirbandliklar yuzaga kelib, haydovchilar va piyodalar uchun noqulayliklar tugʻdirardi. Ayrim hollarda yoʻl harakati qoidalariga amal qilmaslik holatlari kuzatilib, bu esa avariya xavfining ortishiga sabab boʻlar edi. Shu bois mazkur hududda manzilli va tizimli choralar koʻrish zarurati tugʻildi.

Reyd tadbirlari davomida Yoʻl harakati xavfsizligi boʻlimi inspektorlari tomonidan transport vositalarini boshqarishda yoʻl harakati qoidalarini buzayotgan haydovchilarga nisbatan qonunchilikda belgilangan tartibda maʼmuriy choralar koʻrildi. Xususan, belgilanmagan joylarda toʻxtab turish, yoʻl chetida tartibsiz parkovka qilish, piyodalar oʻtish joylarida harakat qoidalarini buzish kabi holatlar aniqlanib, ularning har biri yuzasidan tegishli bayonnomalar rasmiylashtirildi.

Shu bilan birga, reyd faqatgina jazolash bilan cheklanib qolmadi. Tuman Ichki ishlar boʻlimi masʼullari, Yoʻl harakati xavfsizligi boʻlimi hamda profilaktika inspektorlari tomonidan haydovchilar bilan tushuntirish va profilaktik suhbatlar olib borildi. Ushbu suhbatlar davomida yoʻl harakati qoidalariga rioya etishning ahamiyati, har bir haydovchining majburiyatlari, yoʻl-transport hodisalarining ogʻir oqibatlari haqida batafsil tushuntirishlar berildi.

Aniqlangan muammolarni bartaraf etish maqsadida Mangʻit dehqon bozori atrofidagi infratuzilmani yaxshilash boʻyicha ham qator amaliy ishlar amalga oshirildi. Xususan, mazkur hududdagi ayrim svetoforlar texnik nosoz holatga kelib qolgani aniqlanib, ular tezkor ravishda qayta taʼmirlandi va soz holatga keltirildi. Svetaforlarning toʻliq ishlashi transport vositalari va piyodalar harakatini tartibga solishda muhim ahamiyat kasb etishi inobatga olindi.

Shuningdek, tirbandliklarning oldini olish va harakat xavfsizligini doimiy taʼminlash maqsadida ushbu hududga ikki nafar Yoʻl harakati xavfsizligi boʻlimi inspektori doimiy ravishda biriktirildi. Ular kun davomida transport oqimini nazorat qilib boradi, qoidabuzarliklarning oldini oladi hamda haydovchilarga amaliy koʻmak koʻrsatadi. Bu esa yoʻllarda tartib-intizomni mustahkamlashga xizmat qilmoqda.

Kelgusida yoʻl harakati xavfsizligini yanada kuchaytirish maqsadida mazkur hududga maxsus video qayd etish moslamalarini oʻrnatish boʻyicha ham tegishli takliflar ishlab chiqildi. Ushbu qurilmalar orqali qoidabuzarliklarni avtomatik aniqlash, tirbandliklar sabablarini tahlil qilish hamda tezkor choralar koʻrish imkoniyati yaratiladi. Bu tashabbus zamonaviy texnologiyalarni yoʻl harakati xavfsizligini taʼminlashga keng joriy etishga qaratilgan.

Koʻrilgan kompleks chora-tadbirlar natijasida Mangʻit dehqon bozori atrofidagi Buyuk Turon va Berdaq koʻchalarida yuzaga kelgan tirbandliklar bartaraf etildi. Ayni paytda transport vositalarining yoʻllarda toʻsiqsiz, erkin va xavfsiz harakatlanishi taʼminlanib, piyodalar uchun ham qulay sharoitlar yaratildi.