Amudaryo tumanida sayyor qabullar davom etmoqda

Amudaryo tumani hokimi Sobir Xoʻjametov tomonidan tuman aholisining muammolarini joyida oʻrganish, fuqarolarni qiynab kelayotgan masalalarga tezkor va samarali yechim topish maqsadida Daryo boʻyi, Bosuv hamda Gulzor mahallalarida sayyor qabullar tashkil etildi.

Mazkur sayyor qabullarda tuman hokimining oʻrinbosarlari, tegishli boʻlim va tashkilotlar rahbarlari, mahalla faollari hamda aholi vakillari ishtirok etib, fuqarolar murojaatlari bevosita joyida koʻrib chiqildi.

Tuman hokimi “Daryo boʻyi” ovul fuqarolar yigʻinida aholi bilan yuzma-yuz uchrashib, fuqarolar tomonidan bildirilgan murojaatlarni batafsil va toʻliq tingladi. Uchrashuv davomida aholini eng koʻp tashvishga solayotgan masalalar — elektr taʼminotini yaxshilash, koʻcha yoʻllariga shagʻal (tosh) yotqizish, koʻcha yoʻllari chegaralarini belgilab berish, taʼlim kontrakti toʻloviga koʻmaklashish hamda ish bilan taʼminlash kabi masalalar boʻldi.

Jumladan, sayyor qabul davomida 17 nafar fuqarolar tomonidan 20 ta murojaat bildirilgan boʻlib, ularning barchasi masʼullar tomonidan roʻyxatga olinib, alohida nazoratga olindi. Har bir murojaat yuzasidan aniq muddat va ijro mexanizmlari belgilandi.

Bosuv mahallasi aholisi bilan oʻtkazilgan uchrashuvda esa fuqarolar tomonidan asosan elektr taʼminotini yaxshilash, koʻcha yoʻllarini taʼmirlash va tosh yotqizish, shuningdek, tadbirkorlik faoliyatini yoʻlga qoʻyish uchun yer uchastkalari ajratib berish boʻyicha murojaatlar bildirildi.

Mazkur mahallada sayyor qabul davomida 5 nafar fuqaro tomonidan 5 ta murojaat kelib tushdi. Ushbu murojaatlar ham tegishli tashkilotlarga biriktirilib, ijrosi qatʼiy nazoratga olindi.

Gulzor mahallasi aholisi bilan boʻlib oʻtgan uchrashuvda esa ijtimoiy yoʻnalishdagi masalalar ustuvor boʻldi. Xususan, elektr taʼminotini yaxshilash, moddiy yordam ajratish, shuningdek, safarbarlik chaqiruv rezervi badal pulini toʻlashga koʻmaklashish boʻyicha murojaatlar bildirildi.

Ushbu mahallada 5 nafar fuqarolar tomonidan 6 ta murojaat qabul qilinib, ularning har biri yuzasidan tegishli chora-tadbirlar belgilandi.

Sayyor qabullar davomida tuman hokimi Sobir Xoʻjametov fuqarolar murojaatlari bilan ishlashda ochiqlik, shaffoflik va natijadorlik tamoyillariga qatʼiy amal qilinayotganini taʼkidladi. Bildirilgan har bir murojaat joyida oʻrganilib, imkon qadar tezkor hal etish, murakkab masalalar boʻyicha esa bosqichma-bosqich yechim topish vazifasi masʼullarga topshirildi.

Aholi bilan bunday bevosita muloqotlar joylardagi muammolarni chuqur tahlil qilish, fuqarolar ishonchini mustahkamlash hamda hududlarni ijtimoiy-iqtisodiy rivojlantirishda muhim ahamiyat kasb etmoqda.

Charos Arslonova, tuman hokimligining Axborot xizmati rahbari.