2026-yil hosili uchun muhim agrotexnik tadbirlar – nazoratda

Qishloq xoʻjaligi sohasi vakillari uchun yilning toʻrt fasli ham oʻziga xos masʼuliyat va tinimsiz mehnatni talab etadigan jarayondir. Ayniqsa, qish faslining ayni chillasida amalga oshiriladigan agrotexnik tadbirlar kelgusi yil hosilining taqdirini hal qiluvchi asosiy omillardan biri hisoblanadi.

Bugungi kunda mamlakatimizda oziq-ovqat xavfsizligini taʼminlash, gʻallachilik va paxtachilikda hosildorlikni oshirish masalasi davlat siyosati darajasiga koʻtarilgan bir paytda, joylardagi nazorat organlarining oʻrni va ahamiyati ham ortib bormoqda. Xususan, Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasining Amudaryo tuman boʻlimi tomonidan olib borilayotgan tizimli nazorat tadbirlari bunga yaqqol misol boʻla oladi.

Tumanning “Oq oltin” ovuli hududida ayni kunlarda 2026-yil hosili uchun zamin hozirlash ishlari qizgʻin pallaga kirgan. Inspektsiyaning qishloq xoʻjaligida agrotexnik tadbirlarni nazorat qilish boʻyicha bosh mutaxassisi tomonidan hududdagi fermer xoʻjaliklarida olib borilayotgan ishlar doimiy ravishda monitoring qilinmoqda.

Maʼlumki, kuzgi boshoqli don ekinlarini qishlovdan betalafot olib chiqish va erta bahorda jadal rivojlanishini taʼminlashda mahalliy oʻgʻitlarning oʻrni beqiyos. Shu bois, inspektsiya xodimlari tomonidan ovuldagi “Yakupova Gavhar” fermer xoʻjaligida 2026-yil hosili uchun ekilgan kuzgi boshoqli don maydonlaridagi parvarish jarayonlari alohida nazoratga olingan.

Mutaxassislarning taʼkidlashicha, ayni sovuq kunlarda gʻalla maydonlariga mahalliy oʻgʻit chiqarish nafaqat tuproq unumdorligini oshiradi, balki maysalarni sovuq urishdan saqlovchi tabiiy "koʻrpa" vazifasini ham oʻtaydi. Inspektsiya vakillari fermer xoʻjaligi rahbari va ishchilariga mahalliy oʻgʻitni meʼyorida va sifatli tarqatish boʻyicha oʻzlarining kerakli tavsiyalarini berib, bu tadbirning kelajakdagi hosil salmogʻiga ijobiy taʼsirini tushuntirmoqdalar. Zero, oʻz vaqtida oziqlantirilgan yerdan kutilgan natijani olish mumkin.

Bundan tashqari, qishloq xoʻjaligida suv resurslaridan oqilona foydalanish va yerlarni ekishga sifatli tayyorlash ham muhim ahamiyat kasb etadi. “Oq oltin” ovuli hududidagi yana bir ilgʻor xoʻjaliklardan biri — “Hoji Ismoil ota” fermer xoʻjaligida amalga oshirilayotgan ishlar ham tahsinga sazovor. Inspektsiya nazorati ostida mazkur xoʻjalikning kuzgi shudgor qilingan maydonlarida zamonaviy texnologiyalar asosida ishlar tashkil etilgan. Xususan, yerlarni lazerli uskunalar yordamida tekislash ishlari jadallik bilan olib borilmoqda.

Lazerli tekislash texnologiyasining qoʻllanilishi suv sarfini 20-30 foizgacha tejash imkonini beradi. Bu esa, suv taqchilligi sezilayotgan bugungi global sharoitda eng samarali yechimlardan biridir. Shu bilan birga, xoʻjalikda chel olish va shoʻr yuvishga tayyorgarlik koʻrish kabi muhim agrotexnik tadbirlar ham oʻz vaqtida bajarilmoqda.

Oʻzagroinspektsiyaning tuman boʻlimi mutaxassislari faqatgina nazorat qiluvchi emas, balki fermerlarga yaqin koʻmakchi va maslahatchi sifatida faoliyat yuritmoqdalar. Ular tomonidan “Hoji Ismoil ota” fermer xoʻjaligida oʻtkazilgan oʻrganishlar davomida tuproq iqlim sharoitidan kelib chiqqan holda agrotexnik tadbirlarni qanday ketma-ketlikda bajarish, texnikalardan samarali foydalanish va ish xavfsizligini taʼminlash yuzasidan tushuntirish ishlari olib borildi.

Inspektsiya tomonidan berilayotgan tavsiyalar, eng avvalo, fermerlarning xato va kamchiliklarga yoʻl qoʻymasligiga, pirovardida esa moʻl va sifatli hosil yetishtirishga qaratilgan.

Amudaryo tumani dalalarida bugun amalga oshirilayotgan har bir agrotexnik tadbir — ertangi kun rizq-roʻzi, dasturxonlarimiz toʻkinligi uchun qoʻyilayotgan mustahkam poydevordir. Nazorat va amaliyotning bunday uygʻunligi esa koʻzlangan yuksak xirmonlarga erishishda muhim omil boʻlib xizmat qiladi.