2026 йил ҳосили учун муҳим агротехник тадбирлар – назоратда
Қишлоқ хўжалиги соҳаси вакиллари учун йилнинг тўрт фасли ҳам ўзига хос масъулият ва тинимсиз меҳнатни талаб этадиган жараёндир. Айниқса, қиш фаслининг айни чилласида амалга ошириладиган агротехник тадбирлар келгуси йил ҳосилининг тақдирини ҳал қилувчи асосий омиллардан бири ҳисобланади.
Бугунги кунда мамлакатимизда озиқ-овқат хавфсизлигини таъминлаш, ғаллачилик ва пахтачиликда ҳосилдорликни ошириш масаласи давлат сиёсати даражасига кўтарилган бир пайтда, жойлардаги назорат органларининг ўрни ва аҳамияти ҳам ортиб бормоқда. Хусусан, Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Амударё туман бўлими томонидан олиб борилаётган тизимли назорат тадбирлари бунга яққол мисол бўла олади.
Туманнинг “Оқ олтин” овули ҳудудида айни кунларда 2026 йил ҳосили учун замин ҳозирлаш ишлари қизғин паллага кирган. Инспекциянинг қишлоқ хўжалигида агротехник тадбирларни назорат қилиш бўйича бош мутахассиси томонидан ҳудуддаги фермер хўжаликларида олиб борилаётган ишлар доимий равишда мониторинг қилинмоқда.
Маълумки, кузги бошоқли дон экинларини қишловдан беталафот олиб чиқиш ва эрта баҳорда жадал ривожланишини таъминлашда маҳаллий ўғитларнинг ўрни беқиёс. Шу боис, инспекция ходимлари томонидан овулдаги “Якупова Гавҳар” фермер хўжалигида 2026 йил ҳосили учун экилган кузги бошоқли дон майдонларидаги парвариш жараёнлари алоҳида назоратга олинган.
Мутахассисларнинг таъкидлашича, айни совуқ кунларда ғалла майдонларига маҳаллий ўғит чиқариш нафақат тупроқ унумдорлигини оширади, балки майсаларни совуқ уришдан сақловчи табиий "кўрпа" вазифасини ҳам ўтайди. Инспекция вакиллари фермер хўжалиги раҳбари ва ишчиларига маҳаллий ўғитни меъёрида ва сифатли тарқатиш бўйича ўзларининг керакли тавсияларини бериб, бу тадбирнинг келажакдаги ҳосил салмоғига ижобий таъсирини тушунтирмоқдалар. Зеро, ўз вақтида озиқлантирилган ердан кутилган натижани олиш мумкин.
Бундан ташқари, қишлоқ хўжалигида сув ресурсларидан оқилона фойдаланиш ва ерларни экишга сифатли тайёрлаш ҳам муҳим аҳамият касб этади. “Оқ олтин” овули ҳудудидаги яна бир илғор хўжаликлардан бири — “Ҳожи Исмоил ота” фермер хўжалигида амалга оширилаётган ишлар ҳам таҳсинга сазовор. Инспекция назорати остида мазкур хўжаликнинг кузги шудгор қилинган майдонларида замонавий технологиялар асосида ишлар ташкил этилган. Хусусан, ерларни лазерли ускуналар ёрдамида текислаш ишлари жадаллик билан олиб борилмоқда.
Лазерли текислаш технологиясининг қўлланилиши сув сарфини 20-30 фоизгача тежаш имконини беради. Бу эса, сув тақчиллиги сезилаётган бугунги глобал шароитда энг самарали ечимлардан биридир. Шу билан бирга, хўжаликда чел олиш ва шўр ювишга тайёргарлик кўриш каби муҳим агротехник тадбирлар ҳам ўз вақтида бажарилмоқда.
Ўзагроинспекциянинг туман бўлими мутахассислари фақатгина назорат қилувчи эмас, балки фермерларга яқин кўмакчи ва маслаҳатчи сифатида фаолият юритмоқдалар. Улар томонидан “Ҳожи Исмоил ота” фермер хўжалигида ўтказилган ўрганишлар давомида тупроқ иқлим шароитидан келиб чиққан ҳолда агротехник тадбирларни қандай кетма-кетликда бажариш, техникалардан самарали фойдаланиш ва иш хавфсизлигини таъминлаш юзасидан тушунтириш ишлари олиб борилди.
Инспекция томонидан берилаётган тавсиялар, энг аввало, фермерларнинг хато ва камчиликларга йўл қўймаслигига, пировардида эса мўл ва сифатли ҳосил етиштиришга қаратилган.
Амударё тумани далаларида бугун амалга оширилаётган ҳар бир агротехник тадбир — эртанги кун ризқ-рўзи, дастурхонларимиз тўкинлиги учун қўйилаётган мустаҳкам пойдевордир. Назорат ва амалиётнинг бундай уйғунлиги эса кўзланган юксак хирмонларга эришишда муҳим омил бўлиб хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
