Amudaryoda zamonaviy paxta terish texnikalari taqdimoti oʻtkazilib, sohani mexanizatsiyalash istiqbollari muhokama qilindi

Bugungi kunda mamlakatimiz agrar sektorida amalga oshirilayotgan keng koʻlamli islohotlarning tub mohiyati qishloq xoʻjaligini toʻliq modernizatsiya qilish, qoʻl mehnatini qisqartirish va sohaga ilgʻor innovatsion texnologiyalarni joriy etishga qaratilgan. Xususan, paxtachilikda hosilni qisqa muddatlarda, nes-nobud qilmay yigʻib-terib olishda zamonaviy texnikalarning oʻrni beqiyos. Shu maqsadda joylarda fermer va klasterlar uchun maxsus koʻrgazmali seminarlar tashkil etilmoqda. Ana shunday muhim tadbirlardan biri 19-yanvar kuni Amudaryo tumani hokimligining majlislar zalida boʻlib oʻtdi.

Zamonaviy paxta terish texnikalari taqdimotiga bagʻishlangan mazkur seminar Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov boshchiligida tashkil etildi.

Tadbirning asosiy maqsadi Fargʻona viloyatida Xitoy Xalq Respublikasi bilan hamkorlikda faoliyat yuritayotgan qoʻshma korxona tomonidan ishlab chiqarilayotgan zamonaviy paxta terish mashinalarini keng jamoatchilikka tanishtirishdan iborat boʻldi.

Maʼlumki, soʻnggi yillarda Oʻzbekistonda qishloq xoʻjaligi texnikalarini mahalliylashtirish boʻyicha katta qadamlar tashlanmoqda. Mazkur korxona faoliyati ham aynan jahon andozalariga mos keluvchi, yuqori samaradorlikka ega texnikalarni yurtimizda ishlab chiqarish va dehqonlarimizga yetkazib berishga yoʻnaltirilgani bilan ahamiyatlidir. Seminar davomida mutaxassislar tomonidan mazkur texnikaning texnik imkoniyatlari, yoqilgʻi tejamkorligi, paxtani toza terish koʻrsatkichlari va eng muhimi, daladagi harakatchanligi borasida batafsil maʼlumotlar berildi.

Yigʻilishda taʼkidlanganidek, paxta yigʻim-terimida mexanizatsiyalash darajasini oshirish — bugungi kunning eng dolzarb vazifalaridan biridir. Bu nafaqat hosilni yogʻin-sochinli kunlarga qoldirmasdan yigʻib olish imkonini beradi, balki iqtisodiy jihatdan ham fermer xoʻjaliklariga katta foyda keltiradi. Taqdimot jarayonida ushbu mashinalarning paxta terish jarayonida mehnat unumdorligini oshirishdagi roli hamda amaliy qoʻllash tajribalari hayotiy misollar bilan tushuntirildi.

Tadbirda Qoraqalpogʻiston Respublikasi Qishloq xoʻjaligi vazirligi, Agrosanoat majmuasi ustidan nazorat qilish inspektsiyasining hududiy boshqarmasi, Qoraqalpogʻiston fermerlari kengashi, shuningdek, “Oʻzagrolizing” aktsiyadorlik jamiyati Qoraqalpogʻiston Respublikasi filiali masʼullari ishtirok etgani masalaning har tomonlama muhokama qilinishiga zamin yaratdi.

Shuningdek, yigʻilishda ilm-fan va ishlab chiqarish integratsiyasini taʼminlash maqsadida Qoraqalpogʻiston qishloq xoʻjaligi va agrotexnologiyalar instituti olimlari, tuman hokimliklarining qishloq va suv xoʻjaligi masalalari boʻyicha oʻrinbosarlari, agroinspektsiya mutaxassislari, hududdagi paxta toʻqimachilik klasterlari hamda yirik fermer xoʻjaliklari rahbarlari qatnashdilar.

Muloqot davomida ishtirokchilar oʻzlarini qiziqtirgan savollar, xususan, texnikaning servis xizmati, ehtiyot qismlar taʼminoti va lizing shartlari boʻyicha mutaxassislardan atroflicha javob oldilar. Fermerlarning texnikani boshqarish qulayliklari va mahalliy tuproq-iqlim sharoitiga moslashuvchanligi borasidagi fikrlari ham tinglandi.

Seminar yakunida zamonaviy texnikalarni qishloq xoʻjaligiga keng joriy etish, bu borada fermer va klasterlar bilan ishlab chiqaruvchilar oʻrtasidagi hamkorlikni yanada kuchaytirish boʻyicha aniq taklif va tavsiyalar ishlab chiqildi.

Xulosa oʻrnida aytganda, Amudaryo tumanida oʻtkazilgan ushbu tadbir 2026-yilgi paxta mavsumiga tayyorgarlik jarayonida muhim qadam boʻldi. Zero, dalalarimizda zamonaviy va samarador texnikalarning koʻpayishi — qishloq xoʻjaligimiz barqarorligi va dehqonlarimiz daromadining oshishiga xizmat qiladigan asosiy omildir.